لبزانک ء ِ گشاد گیر ی ءِ چہ مراد اش انتک ہ لبزانک ءِ درائیں پڑانی سرا نبشتہ کنگ بزاں لبزانک ءِ درائیں پڑاں بورتاچی کنگ شاعری،آزمانک،گدار، کسمانک سرگوست ءُُ اے دگہ درائیں پڑاں نبشتہ کنگ بلئے پدا زانگ لوٹیت کہ گشادی کنگ ءِ مول ءُُ مراد ایوک ءَ اے نہ انت کہ ایشانی سرا نبشتہ کنگ بیت بلکیں جوانی ءَ گوں ایشانی سرا نبشتہ کنگ اِنت۔
انچیں شاعری کنگ کہ در ملکی شاعرانی دیم پہ دیمی ءَ دات ئے بہ کن اَنت انچیں گدار نبشتہ کنگ کہ ٹالسٹائی،چیخوف،کافکا ءُُ کامیو ءِ نام بے ہال کنگ ءُُ مئے بلوچ گدار نویسانی نام پہ درور گرگ بہ بنت گڈاں بزاں لبزانک تئی لبزانک گشاد پراہ اِنت اگان چش نہ انت گڈا تئی لبزانک ءِ دامن ہالیگ اِنت۔
انچو گشگ بیت کہ دنیا ءِ درائیں چیزانی شر ءُُ جوان کنگ ءِ دو منزل بنت یکے ہما چیز ءِ تہا گیشی کنگ بزاں quantityءُُ دومی آئیءِ تہا جوانی آرگ بزاں Quality،نوں زانگ بیت کہ اولی پد یانک دیمروئی ءِ کچ ءُُ کساس ءِ ودینگ انت ءُُ دومی پدیانک ہمے کچ ءُُ کساس ءِ کم کنگ ءُُ شر کنگ اِنت بلوچی لبزانک ءِ لبزانکار ءُُ ندکار اں وت ءَ را اولی پدیانک ءَ یک کچے ءَ داں سر کتگ پرچکہ مئے لبزانک ءِ تہا بازیں تہرانی تہا سک باز نبشتہ کنگ ءُُ نگدکاری کنگ بوتگ۔
کہ آہاں جاگہ نیست ہمک دومی مردم ہما پڑ ءِ ندکار انت نوں بائد انت بلوچی لبزانک ءِ ندکار ءُُ لبزانکار دومی پدیانک ءِ نیمگ ءَ بروت انت بزاں چیزانی گیش کنگ ءِ بدلہ آئیءِ شر ءَ چہ شر کنگ ءِ جہد کنگ بہ بیت گڈاں مئے لبزانک دیمروئی کت کنگ اگاں پد اوں ما ایوک ءَ کچ ءُُ کساس ءِ پشت ءَ بوتیں گڈا مئے لبزانک انچو پد منتگ بیت ایشیءِ تہا دیمروئی کنگ نہ بیت۔
مئے لبزانک ءِ تہا کتاب بائد نوں درملکی چاپ ءُُ شنگی مجلسانی وڑ ءَ چار ءُُ تپاس کنگ بہ بنت ءُُ ہمک مردم ءِ کتاب چاپ اوں کنگ مہ بنت اگاں اے ہساب بہ بیت ءُُ ہمک لٹے ءُُ داری ءِ کتاب چاپ بہ بیت گڑا لبزانک دیمروئی ءِ جاہ ءَ پد منتگ بیت بلکیں چاپ ءُُ شنگی یک سرکاری ءُُ پروائٹ ادارگے جوڑ کنگ بیت نگدکارانی آ ہانی کار کتابانی چارگ بہ بیت ءُُ آہانی نگدکاری ءُُ چمچاری ءَ رند نوں کتاب پہ چاپ ءَ روان دئیگ مہ بیت۔
بلئے مئے چاگرد ء َ چو بوہگ ءَ نہ انت اگاں اکیڈیمزانی تہا کسی مردمے یا سنگتے است انت گڈا آئیءِ کتاب چاپ کنگ بنت اے چارگ اوں نہ بیت کہ کتاب ءِ تہا چے نبشتہ کنگ بوتگ بائد اکیڈیمزانی کارمستر چو بوہگ ءَ مئیل اَنت ہرکس ءُُ ناکس ءِ کتاب اگاں چاپ بنت گڈا اے ہساب ءَ ما ایوک ءَ کتابانی کچ ءُُ کساس ءَ باز کت کن اَنت بلئے کتابانی شری ءُُ موادانی جوانی ءَ ہچ گیشی کنگ نہ بیت پمشکا مارا انچیں وڑءُُ پیمے جوڑ کنگ اِنت کہ چہ ایشیءَ کتاب گیش اوں چاپ بہ بیت بلئے کتاب پہ قوم ءُُ راج ءَ نپ ءُُ سیت اوں دات بہ کن انت۔
مرچان مئے لبزانک ءِ تہا ڈنی لبزانک ءَ تب دوست کنگ بوہگ ءَ انت ءُُ ہماآنی وڑ ءُُ پیم ءَ نہ ایوک ءَ شاعری بلکیں ردانک اوں ہماہانی ہساب ءَ نبشتہ کنگ بوہگ ءَ انت بلئے اے پہ نہ ایوک ءَ لبزانک ءَ بلکیں وتی جند ءِ پجار ءَ پہ شر نہ انت پرچکہ دگر ءِ پشک ءِ وتی گور ءَ نہ روت یا وَ سک دراج بیت کہ ماں آکاں ہوار بیت یا کہ سک لک بیت کہ جان ءِ نیم برہنگ در بیت پمشکا مارابائد انت کہ ما دومی ءِ جامگ ءَ گور ءَ مہ کن اَنت کہ بلکیں وتی جامگ ءَ انچو زیبدار بہ کن اَنت۔
کہ دومی مردم وت مئے جامگ ءِ گور کنگ ءَ ساڑی بہ بیت۔اگاں ما دومی زبان ءِ وڑ ءُُ پیماں زور اَنت بلے مارا وتی جند ءِ تب شموشکا کنگی نہ انت مارا اے ہبربے ہا ل کنگی نہ اِنت کہ مارا وتی جند ءِ یک دودمانے یک راجدپترے ءُُ ہما قول ِ انگریزانی ءَ code of onerیے است انت بائد ما آئیءَ چہ اوں بے ہال مہ بیں چو مہ بیت باندی ما وتی جند ءَ چہ بے ہال بہ بیں ءُُ ددومی ءِ ہساب ءَ زندگی کنگ بندات مہ کن اَنت۔
نوں کتابانی گیش چارگ بائد مہ بیت بلکیں ہما کتاب کہ لائک وانگ ءُُ نپ بکش اِنت ایوک ءَ ہما چاپ بہ بیت ءُُ ہما کتابانی نیمگ ءَ اوں دلگوش دئیگ بہ بیت کہ آ تک ءَ انگت ءَ ہچی نبشتہ کنگ نہ بوتگ یاکہ ہما پڑاں نبشتہ کنگ ءِ عاجت انت چوکہ مئے لبزانک ءِ تہا انشائیہ ءِ کتاب نیست خاکہ نویسیءِ کتاب نیست یا چشیں کتابے اوں نیست کہ نوکیں تبے ءِ جارچینی یے بہ کنت چوکہ اے دگہ زبانانی لبزانک مدام انچیں نوکیں چیزانی نویسی ءَ دلگوش اَنت کہ چد ءُُ ساری ءَ کس ءَ نبشتہ نہ کتگ اَنت۔