بلوچستان ءِ یونیورسٹی ءِ ہما کہ جیڑہ اِنت مروچی ایشی ءَ ماہ یے سرجم بوئگ ءَ انت بلئے تنی وہدے چہ حکومت ءِ نیمگ ءَ جوانیں گامگیجے زورگ نہ بوتگ۔پمشکا زارشانی نندانک ءُُ روانک در کنگ بوتگ ءُُ بوئگ اَنت۔قبائلی دمگے ءِ چنائی ءَ درائیں معالہ سک نازرک اَنت بلئے آ جیڑہ کہ گوں جنین آدمے ءَ بندوک بہ بیت آسک باز ترند بیت پرچکہ بلوچ دپتر ءَ چشیں سداں وئیل بوتگ اَنت کہ آوانی پشدر جنین آدم بوتگ اَنت بارین چنچو جنگ ءُُ جدلانی پشدر ہمے جنین آدم بوتگ اَنت بلوچ راج ءَ جنین آدم آوانی غیرت اِنت آوانی ننگ ءِ بہرے،ءُُ ایشی ءِ پہازی ءِ ہمک بلوچءَ سوگند وارتگ۔
آ جاہ ءَ کہ جنین آدم جنگے ءِ نیام ءَ بئیت انت آ جنگ دارگ بیت،گڈاں آجاہ ءَ جنین آدم ءِ چونیں بلائیں عزت ءُُ شرپے است بیت پمشکا اے جیڑہ اگاں زوتاں چہ زوت گیشوارنہ بوت بلکیں آوکیں روچاں جاور چد ءُُ حراب تر بہ بنت۔ہما مردم اے تک ءَ گناہ گار اَنت آوانی سزا دئیگ ءُُ چہ نوکریاں درکنگ بس۔۔۔پریشی ءَ حکومت پرچہ چار ءُُ بچار کنگ ءَ اِنت جیڑہ یک ءُُ دومردمانی بوتیں داں بلکیں بلئے اداں ہزاراں مردمانی لج ءُُ غیر ت ءِ گپ اِنت ہمے شاہ دربرجاہ ءَ حکومت ءِ وتی چک ءُُ مردم وانگ ءَ اَنت۔اے واقعہ کہ مرچی دریں زالبولاں گوں کپتگ باندہ آوانی وتی مردمانی گوما بوت کنت پمشکا اے چیز ءَ را ہمے زوتاں گیشوار کنگ بہ بیت۔
اے جیڑہ ایوک ءَ بے ننگیں عکس ءُُ ویڈیانی نہ اِنت بلکیں ہما ماحول ئیگ اِنت کہ باریں چنت سال انت کہ یونیورسٹی ءَ بوہگ ءَ اِنت۔یک دوستے ءِ جوانیں حبرے کتگ اَت کہ اگاں اے عکس ءُُ ویڈیو دارگ بوتگ اَنت ءُُ مرد م سزا اوں دئیگ بوتاں بلئے ہما کہ ایم فل ءُُ پی ایچ ڈی ءَ تھیسز ءِ نبشتہ کنگ ءَ مردمانی دئے ءُُ زور بیت آوانی دارگ ءِ چے سوڈگ اِنت،سمسٹر سسٹم ءَ وتی نمبرانی گیش کنگ ءُُ وتی سی جی پی ءِ گیش کنگ ءَ کہ مردمانی دست ہواری انت آئی ءِ بابت ءَ چونیں گامگیج زورگ بوئگ اَنت۔کلاس ءَ ایڈمیشن زورگ ءَ پد سرجمیں سال ءَ نیائگ پدا چکاس ءَ نندگ ءُُ پاس بووکیں مردمانی گر ءُُ دار چون بیت۔
اے درائیں جیڑہ ہم گوں ہمے جیڑہ ءَ بستگیں جیڑہ اَنت۔گپ ایوک ءَ سکسشول ایراسمنٹ ءِ نہ اِنت بلکیں ہما درائیں بے راہبند ءُُ ناجائیں کارانی اِنت کہ یونیورسٹی ءَ بوئگ ءَ اِنت ءُُ ایشی ءِ ذمہ وار ایوک ءَ ایڈمنسٹریشن نہ اِنت بلکیں وت نودرہم است انت کہ اگاں یک نودربرے زانت کہ گوں آئی ءَ زوراکی یے بوتگ ءُُ چرئی کم زانتیں نودربرے ءَ را گیش نمبر دئیگ بوتگ یاکہ آئیءِ تھیسز دگہ مردمے ءَ نبشتہ کتگ بائد آئی ءِ حال ءَ ایڈمنسٹریشن ءَ سر بہ کنت ءُُ ہما دمان ءَ ایشی ءِ حلاف ءَ کاروائی بہ بیت۔
ہما نودربراں گوں کسے ءَ چونائیں ہم ناجائیں گپے یا کارے کت ایشی ءَ دل ءَ مہ داریت ہمے دمان ءَ ایشی ءَ پاشک بہ کنت ءُُ مردم ءِ نام ءَ نشان بدنت دانکہ آئی حلاف ءَ کاروائی بہ بیت۔اے درائیں گپ کہ انوں جنگ بوئگ ءَ اِنت اے یک ءُُ دو ماہی نہ اِنت بلکیں سالانی گپ اَنت کہ مردماں دل ءَ داشتگ اَنت ءُُ کسی گورا درشان نہ کتگ اَنت باریں آ کجام شیر زال بوتگ کہ آئی ہمت کتگ ءُُ گپ درشان کتگ۔
پمشکا ایشی ءَ پیسر کہ ما اے گپ ءَ بے حال بہ کناں حکومت اے جیڑہ ءَ جلد از جلد گیشوار بہ کنت ءُُ ہما لوٹانی کہ نودربر لوٹ کنگ ءَ اَنت آوانی بہ من اَنت ءُُ کاروائی ءَ ترند بہ کن اَنت پرچکہ اے قوم ءَ را بے حالی ءِ نادراہی گون اِنت ایشی ءَ پیش کہ اے وئیل ءُُ واقعہ ہم چہ پگراں بے حال بہ بنت پریشی ءَ سوڈگے بہ بیت۔
مردمانی وانگ چریشی ءَ متاثر بوئگ اَنت انت بازیں زہگانی انوں چکاس بوئگ ءَ اِنت آوانی وانگ حراب بوئگ اَنت دومی اے اوں گپ شنگ انت کہ کہول ءِ مردم وتی جنین چکاں پہ وانگ شاہ دربرجاہاں نوں نیل اَنت پرچکہ آواداں اے پیمیں اگاں ماحولے است انت داں کس وتی زہگاں اے پیمیں ماحولے ءَ وانگ ءَ روان نہ دنت۔