بلوچستان حکومت ءَ تنی وہدی پہ لس مہلوک ءَ چشیں کارے نہ کتگ کہ کسے آئی ءَ نام پہ جوانی ءَ بہ گپت۔انوگیں تازگیں وہیل کہ یونیورسٹی ءَ بوتگ چریشی باریں چنت زالبولانی وانگ حراب بوتگ باریں چنت لوگ ءِ مردماں وتی جنک چہ اے یونیورسٹی ءَ در کتگ اَنت۔بلئے ہما جیڑہ کہ نودربراں حکومت ءُُ نیب ءِ دیم ءَ پہ گیشوار ی ءَ داتگ ات آ سردخانہ ءَ ایر کنگ بوتگ ءُُ ایشی ءَ بابت ءَ کسءَ ہچی سرپدی دئیگ بوہگ ءَ نہ انت۔
حکومت ءِ پگر انت بلوچستان ءِ مردم زوت چیزاں بے حال کن انت اے مردماں وتی زہگانی مسخ کتگیں لاش دیستگ اَنت ءُُ بے حال کتگ اَنت اے قوم کسان سالیں زہگانی،پیریں ماتیانی پہ شپادی یک بلائیں پندے ءِ برگ ءَ دیستگ اَت ءُُ حاموش بوتگ،اے قوم ءَ ہما کیمپ کہ کوئٹہ ءِ دلبند ءَ انت اوداں باریں چنت مات ءُُ گہار پہ وتی بیگواہیں برات ءُُ چکانی ودار ءَ نشتگ ءُُ ارس گوارگ اَنت اے ارساں اے قومءِ دل ءِ رحم ودی کت نہ کتگ اے کسانیں جیڑہ کہ گہارانی ننگ ءُُ عزت ءِ بابت ءَ انت ایشی ءَ ہم بے حال کن انت۔
ہمے جیڑہ ءِ بابت ءَ چنت روانک ءُُ زارشانی کنگ بوتگ بلئے سرکاری مردمانی گوش ءَ مورے نہ وارت ہما منگ کہ نودربراں حکومت ءِ دیم ءَ ایر کرتگ اَنت آواناں چہ باریں کجام منگ بوتگ ءُُ کجام زورگ نہ بوتگ اے انگت ءَ لس مہلوک ءَ را گشگ نہ بوتگ۔واجہ اسد بلوچ ءَ مجلس ءَ یک جوانیں گپے کتگ کہ ما حکومتی مردم اگاں یک ادارگے ءَ چہ وی سی یے کہ آئی ءِ حلاف ءَ انچو شکایت ءُُ پدریں ثبوت رستگ ءُُ کاروائی کت نہ کناں گڈاں مارا اے کرسیانی نندگ ءِ حق نہ انت۔
اے گپ پہ کنگ وش اَت بلئے ایشی ءَ پد آئی ءِ کرد پہ اے جیڑہ ءَ چے بوتگ اَنت اے گار اَنت بائد حکومتی سروک کہ وت ءَ قوم دوست کن اَنت آ اے وہدے وت یونیورسٹی ءَ ساڑی بوتین اَنت بلئے یکے ءَ سر نہ جتگ بلکیں آوانی اوں دل ءَ انت کہ اے جیڑہ ءَ اے بے حال بہ کن اَنت۔بلئے اے بری چوش نہ بیت دانکہ اے جیڑہ گیشوار نہ بیت نودربرانی گشگ انت کہ آ وتی زارشانی ءَ بند نہ کن اَنت۔
ہما روچ ءَ کہ نیب ءَ بازیں مردم پہ جست ءُُ پرس ءَ دستگیر کتگ اَنت یونیورسٹی ءِ بازیں لکچرار ءُُ پروفیسر اں یونیورسٹی ءَ آئیگ یلہ داتگ دو سے ہفتگ اِنت کہ بازیں لکچرار ءُُ پروفیسر یونیورسٹی ءَ پیداک اَنت چریشی ءَ زانگ بیت کہ اے درائیں مردم اے جیڑہ ءَ گون بوتگ اَنت بائد نیب ایشانی چار ءُُ تپاس ءَ بہ کنت ءُُ زوتاں چہ زوت اے جیڑہ گیشوار بہ بیت۔انوں یونیورسٹی ءِ جاور سک نازرک اَنت درائیں زالبولانی دل ءَ پہ حکومت ءُُ یونیورسٹی ءِ کاردارانی حلاف ءَ زارشانی است انت بائد حکومت اے جیڑہ ءَ گیشوار بہ کنت چو مہ بیت اے جاور چد ءُُ حراب تر بہ بنت۔
آقوم ہچبر دیمروئی کت نہ کنت کہ آئی ءِ زالبولاں وانگ نہ رسیت بلوچستان ءَ چنائی ءَ پہ زالبولاں جوانیں وانگی کدگ نیست انت اے مزن شاہ دربر جاہ ءَ گوستگیں بازیں سالاں بلوچ ءُُ پشتوزالبول وانگ اَنت کہ آ چہ قبائلی دمگاں اتکگ اَنت۔اگاں اے پیمیں گپ ءُُ حال آوانی لوگاں سر بہ بیت کہ گوں جنکاں اے یونیورسٹی ءَ چے پیمیں کار کنائینگ بیت آ ہچبر وتی ننگ ءُُ عزت ءَ اے یونیورسٹی ءَ روان نہ دیاں چریشی ءَ بلوچستان ءِ دیمروئی پدا سداں سال پشت ءَ روت انت۔
حکومت ءِ بائد انت کہ وانگی کدگانی اے پیمیں جاوراں ہچبر اوپار مہ کنت ءُُ ہما مردم کہ اے کاراں گون اَنت آ گرگ ءُُ سزا دئیگ بہ بیت بلکیں چریشی ءَ ہما مردماں کہ وتی زالبول چہ یونیورسٹی ءَ درکتگ اَنت یا درکنگ ءَ دلمان اَنت آ دوبر چار ءُُ بچار ے بہ کنت۔
حکومت ءَ اے جیڑہ ءِ گیشواری ءِ ہمے ماہ ءِ گڈ ی ءَ کنگی اَت بلئے ماہ آسر بوت ءُُ اے جیڑہ ءِ گیشواری انگت ءَ نہ بوتگ حکومت ءَ را بائد انت اے جیڑہ ءَ زوتاں چہ زوت گیشوار بہ کنت۔