نہ ایوک ءَ بلوچی بلکیں دنیا ءِ گیشتریں زبانانی دیمروئی گوں شاعری ءَ بوتگ۔ بلکیں چوش بہ گش کہ لبزانک ءِ بندات چہ شاعری ءَ بوتگ ءُُ شاعری ءَ پد اے دگہ ندکاراں نثر ءُُ ردانک نبشتہ کنگ بندات کتگ۔زی بلوچی زبان ءَ چتوریں شاعری کنگ بوتگ،آئی ءِ شاعری ءِ لوٹ چے چے بوتگ اَنت،آئی شاعری ءِ نگد چے بوتگ،آئی ءِ گوشداروکانی واہگ چے پیمیں شاعری ءَ بندوک بوتگ اَنت،اے درائیں جستانی انگت ءَ جوانیں پسوے نگدکاراں دیم ءَ آروت نہ کتگ۔ایوک ءَ ہما مغربی نگدکارانی لیکہ دیم کنگ ءُُ وتی شاعری تپاسگ بوتگ۔۔۔۔من نہ گشاں کہ اے دگہ لیکہ دارانی لیکہ چار گ ءُُ تپاسگ مہ بنت بہ بنت بلئے وتی جندئے لیکہانی زانگ اوں اژدری انت۔
بلوچی لبزانک ءَ انگت ءَ پہ وتی لبزانک ءَ جوانیں لیکہ یے ودی کت نہ کتگ،نیکہ چشیں نگدی لیکہ یے است انت بلکہ من اوں گشگ ءَ چک ءُُ پد نباں کہ بلوچی ءَ را انگت ءَ وَ نگدکارے نیست انت اگاں نگدکارنیست داں نگدی لیکہ ءُُ نگدکاری چون بیت۔پمشکا بلوچی لبزانک ءَ ہرکس ہرچی کہ نبشتہ ءُُ چھاپ کنگ ءَ انت کس ایشی ءَ مکنئے اوں نہ کنت۔
لبزانک ءِ اے دگہ تہرانی بابت ءَ نہ گشاں بلئے سوشل میڈیا ءُُ ہمے چھاپی کتاباں چہ چم کپ انت داں دل ارمانی بیت کہ
شر ِانت مرتگ وتی کسانی ءَ
زند ءِ بازیں اڈاں چہ پشت کپتگ
اے شاعری کہ مرچی بوئگ ءَ انت اگاں سید ءُُ کریم ءُُ عطا ءِ وڑیں شاعراں بدیستن اَنت داں باریں آوانی حال چے بوت۔من جزماں کہ آوانی ارواح انوں اے شاعری ءَ کہ گندگ ءَ اَنت سک بژنی اَنت۔
چیزے شاعر اَنت کہ نوکی ءُُ پد نوکی ءِ پداں باریں چے پیمیں شعر نبشتہ کنگءَ اَنت،روچ ءِ کیسگ ءَ کنگ ءُُ ماہ ءَ را سواس پادا ئیگ ءَ انت ءُُ ایشی ءِ نوکی ءِ نام دئیگ بوئگ اَنت۔بلئے اے بزگ نزاناں کہ نوکی ءِ جند چے چیزے؟؟؟؟
دگہ یکے گروپے وَ شعر ءِ جندءَ نزانت بلئے انگت ءَ شعر گشگ ءَ مشگل انت کہ من ہم شاعرے اوں ءُُ شاعراں کناں۔اصل ءَ اے دوئیں پگرءِ مردماں بلوچی تب ءُُ بلوچی شاعری ءَ را ارجان جتگ۔ بلوچی نوکیں دور ءِ اولی ءُُ دومی دور ءِ شاعری ءِ شاعراں یلہ دئے انوں کسے نام بہ گپت کہ اے بلوچی ءِ جوانیں شاعر انت؟؟؟؟کس نام گپت نہ کنت۔دور مہ رو اردو لبزانک ءَ ہمک دور ءَ پہ وت انچیں لہتیں نام ایر کتگ کہ آئی ءِ دیمروئی ءَ بس اَنت ہمک دور ءَ را یک غالبے گون انت۔ہمک دور ءَ انچیں شاعری رستگ کہ آوانی نام ابدمان اِنت۔بلئے بلوچی ءَ بیاکہ تنی وہدے فاضلے پہ وت ودی کت نہ کتگ۔
ایشی ءِ سوب نگد انت اردو ءَ نگد بوہگ ءَ انت ہمک کتابے کہ چھاپ بیت آئی سرا نگد کنگ بیت آ تری چنائیں شاعرے بہ بیت کسانیں یاکہ مزنیں بلئے نگد الم بیت انوں ہمے گشگ بوئگ انت کہ منیر مومن ءِ شاعری بلوچی تب ءَ نہ انت اے ایوک ءَ گپ اَنت کسے نبشتہ وَ بہ کنت کہ چون بلوچی تب ءَ نہ اِنت؟
اے کار ءَ یک نگدکارے کت کنت بلئے اگاں نگد کار نیست انت داں نگد چون ءُُ چتور بیت۔انوں ہرکس درکیت کہ من شاعرے ءَ بلئے آئی ءَ جست بیت کہ تو وتی کلاسیک وانتگ،تو سرپدئے کہ تئی تب چے انت،چو زانئے کہ شاعری صنف کجام اَنت،شعرے ءَ را شعرے کجام چیز کن اَنت،ایوک ءَ قافیہ بندی ءَ کس شاعرنہ بیت۔پمشکا گشنت کہ
”شاعری لیبے نہ اِنت اے وَ حدائی دادے“ اے داد ہرکسی بہر ءَ نہ کپتگ پمشکا جہد مہ کن ات ءُُ بلوچی ءِ دیم ءَ چد ءُُ سیاہ مہ کن ات ءُُ شاعری ءَ چہ پیسر ءَ الم ءَ شاعری ءَ سرپد بہ بنت۔