اے گہ دنیا ءَ ہما ہند کہ ابرمی مادنے درکیت انت آہندءَ کلاں گیش ہما مادن سر کنگ بیت بلئے بلوچستان ءِ دنیا ءِ یکیں ءُُ تہنائیں شہر اِنت کہ اداں ابرمی ہر پیمیں مادنے کہ درکیت انت آئی بہر ءَ ہچی نئیت انت۔بلوچستان ءَ سہر، چاندی، پوپل، نگرہ،یک مزنیں تیابے کہ سرجمیں دنیا ءَ وتی گرمی آپی ءَ نامدار انت پرچکہ اے دگہ زرانی آپ زمستان ءِ موسم ءَ بدانت بلئے بلوچستان ءِ زر ہردو موسماں کار گرگ بوت کنت بلئے چیریشی ءَ بلوچستان ءِ نندوکیں مردماں ہچ پیمیں کٹ ءُُ سیتے رسگ ءَ نہ اِنت۔

بلوچستان ءَ را وتی ابرمی مال ءُُ مڈیانی بابت ءَ سرجمیں دنیا ءَ زانگ بیت پمشکا بلوچستان ءِ ہر پیمیں جیڑہ سرجمیں دنیا ءِ دیم ءَ پدری اژدری انت کہ گوں بلوچاں چے ءُُ چون بوئگ ءَ انت۔انوں سوئی ءَ گیس پیداک اِنت بلئے سوئی ءِ جندئے شہر ءَ گیس سر کنگ نہ بوتگ اگاں ہما جاہ ءَ کہ گیس ءِ جند درکپگ ءَ انت آہند ءَ گیس نیست انت بلوچستان ءِ اے دگہ ہنداں چتور گیس بیت کنت۔بلوچستان ءِ اے دگہ دمگانی گیس ءِ نیستی انگت ءَ پہمگ بیت کنت کہ وفاق ءَ را وَ چہ بن ءَ بلوچستان ءَ سر ءُُ کارے نہ بوتگ بلئے بلوچستان ءِ بنجاہی شہر بزاں کوئٹہ ءَ را وَ بائد انت اے مادن سرکنگ بوتیں بلئے اپسوز ءُُ سد اپسوز کہ اے شہر ءَ اوں گیس ءِ نیستی انت۔

بلوچستان ءِ بنجاہی شہر کوئٹہ ءَ ہر وہد ءَ کہ زمستان بندات بیت گیس ءِ نیستی ءِ جار اوں جنگ بیت۔انوں کوئٹہ ءِ بازیں ہنداں گیس نیست انت،اگاں جاہ یے است انت داں آ جاہ ءَ گیس پریشر انچو نزور انت کہ اُپ کنگ ءَ آس مریت۔گیس نیستی ءِ اولی ذمہ وار مئے سرکار ءُُ حکومتی مردم اَنت دومی ہما کمپنی انت کہ آئی ءَ گیس سرکنگ ءِ ٹھیکہ زرتگ سیمی وفاق ئیگ انت کہ بئید چہ آئی حکم ءَ اے کار بوت نہ کنت۔انوں زمستان انت ہور انی موسم انت گوستگیں سے روچ انت کہ کوئٹہ ءَ ہور برجاہ اِنت پمشکا سردی اوں گیشی بوہان انت بلئے گیس نیست انت پمشکا اے یک بلائیں جیڑگے کہ انگت ءَ گیشوار نہ بوتگ ءُُ کس ایشی ءِ منگ ءَ ساڑی اوں نہ انت کہ اے قصور ءُُ ذمہ واری ہمائی ئیگ انت۔

کوئٹہ ءَ انوں چہ ہمے گیس ءِ نیستی ءَ را انگت ءَ مردم اوپار کت کنت بلئے ہمے کہ است ءُُ بلئے ہچی ءِ درا نہ روت ایشی ءِ دگہ گیشواری یے اوں نیست انت۔ہمے گیس ءِ کم پریشر ءَ باریں چنچو جان ءُُ مالی تاوان بوتگ ءُُ ایشی ءِ گیشی ءِ ہم گمان انت پرچکہ مردم گیس پریشر ءِ گیشی ءِ ودار ءَ گیس ءَ انچو یلہ دینت پمشکا وہدے گیس پریشر کہ شر بیت اے وہد ءَ بازیں مردمے واب بیت یا لوگ ءَ ساڑی نہ بیت چریشی ءَ بازیں ویلے بیت۔درائیں دنیا ءَ اگاں گیس بجلی، آپ اگاں پہ جیڑہ یے سوب ءَ بند کنگ بوتگ داں آوانی مہلوک ءَ را یک ءُُ دو روچ پیسر حال ءُُ احوال کنگ بیت کہ اے روچاں پلان چیز ءِ سرا کار بوئگی انت پمشکا اے بند بیت۔

بلئے بلوچستان ءَ چش نہ انت ہرکس ہرچی کنت بہ کنت کس جست ءُُ پرس کنوک نیست انت۔انوگیں اے گیس پریشر ءِ کمی ءُُ بازیں جاگہاں نیستی ءِ حال ءَ کس سہی نہ انت۔بلکیں مہلوک حیران ءُُ پریشان انت کہ آخر کجام سوب ءَ اے گیس پریشر کم کنگ بیت پرچکہ بلوچستان ءَ وَ فیکٹری یے نیست انت کہ ہمائی کار ءِ سوب ءَ اے بند بیت۔اگاں اے مردماں پیسرا احوال بہ کتیں مردم وش تر بوتگ اِتاں بلئے چون کنیں کہ ملک ءَ نہ ایمانداری است ءُُ ناں ایماندار۔۔۔۔۔