بلوچی زبان ءُُ لبزانک ءِ عمر سک دراج نہ انت بلئے ہمے عمر ءَ بلوچی لبزانک ءَ پہ وت جہانی لبزانک ءَ یک جاہے جوڑ کنگ ءَ سوبین بوتگ۔مرچی اگاں بلوچی لبزانک چہ گار ءُُ بیگواہی ءَ رک اتگ داں ہما پیشی واجہانی برکت ءَ کہ آیاں بلوچی لبزانک ءِ ہما پڑانی ارزشت زانتگ ءُُ آواناں یکجا رد ءُُ بند داتگ اَنت۔مرچی ہمے رد ءُُ بند داتگیں کتاب پہ مئے نوک باہنداں رہشونی ءُُ سکین اَنت۔ہمے واجہاں کہ اے پڑ کار کتگ چمایاں یکے ایثر عبدالقادر شاہوانی ات۔

ایثر عبدالقادر ءَ کساس ششت ءَ برز کتاب نبشتہ ءُُ رد ءُُ داتگ اَنت۔واجہ ءَ را بلوچی ءَ ابید براہوئی ءُُ اردو ءَ ہم بلد بوتگ ءُُ نبشتہے کتگ۔آداں زند ءِ گڈی روچاں روتاکانی گچین نبشتہ کاراں بوتگ۔ایثر عبدالقادر شاہوانی ءَ را مردماں گوں بلوچی اکیڈمی کوئٹہ جنرل سیکرٹری ءُُ اکیڈمی ءِ اگدہ داری ءِ حساب ءَ یاکہ آئی ءِ کتابانی پشدر ءَ زانتگ بلئے باز کم مردم زانت کہ اٰثر قادر شاہوانی بلوچی اکیڈمی ءِ جوڑ کنوکاں شمار بیت۔ بزاں ہما واجہ کہ آواناں بلوچی اکیڈمی کوئٹہ ءَ را اے جاہ ءَ سرکتگ چماہاں یکے شاہوانی بوتگ۔وت شاہوانی ٹک ءِ سردارخیل اَت کہ مرچی وتی پت ءُُ پیروکی گورستان کلی سردہ سریاب ءَ پہ دائمی واب انت۔

واجہ اچ وتی کماشی ءَ پد اوں بیرانی ءِ دوروچ ساری اکیڈمی ءَ اتکگ اَت آئی ءِ ہما کندگ ءُُ مسکرا ہچبر بے حال نہ بنت۔انچو کہ پیسرا گپ بوہگ ءَ ات ءَ رد ءُُ بندی کتابانی ارزشت ءَ باز مردم کم لیک ایت کہ اے چہ ساچشت ءَ کم انت بلئے ایشی ءِ نپ چہ ساچشت ءَ گیش انت کہ پرچکہ ہمے مواد انت کہ جتا جتائیں تاک ءُُ مہتاکاں شنگ ءُُ شانگ اَنت کہ کسے وانت نہ کنت ہمے واجہانی منت انت کہ مرچی یک کتابے ءَ درائیں مواد دست کپ انت۔

اگاں صباء بلوچی زبان ءِ آکبیت رد ءُُ بند مہ داتگیں داں مرچی ءَ مئے زبان زانت گوں تاک ءُُ ماہتاکاں سر ءُُ لینڈ اتاں پہ موادے ءِ شوہازی ءَ،اگاں فقیر شاد ءَ میراث ءُُ جان محمد دشتی ءَ وش اتنت عہدی دور بلوچانی،رد ءُُ بند مہ داتین انت داں مرچی بلوچانی مستریں مڈی بزاں آوانی شعرانی گنج گار بوتگ اِتاں ہمے پیم ءَ اگاں ایثر قادر شاہوانی بلوچی زبان گرائمر،بول چال،بلوچی دوسوت، گچین کسمانک،بلوچی شاعری ءِ درائیں دروشم،بلوچی زبان و ادب، سائنسی کمال، اولس گچین،گلزمین، پاکستان ءِ لیب،ءُُ اے دگہ کتاب رد بند مہ داتین انت بلکیں لبزانک ءِ اے پڑ اوں تاک ءُُ ماہتاکاں اندیم بوتاں۔

ایثر قادر شاہوانی ءِ نبشتہ ءِ بازیں پڑے است انت چوکہ آئی تاریخ ءِ بابت ءَ اوں کتاب نبشتگ چوکہ آئینہ خاران اے درگت ءَ شرتریں کتاباں گچین بیت۔ابید چریشی ءَ آئی ءِ کتاباں چہ بلوچی اکیڈمی ایک تعارف،مکتبہ درخانی، بلوچی ثقافت گیتوں میں،براہوئی اردو لغت، کردوکردستان،بلوچستان کے مسائل و وسائل ءَ ابید دگہ بازیں کتابے آئی ءِ براہوئی ءُُ اردو زباناں ہم است انت۔ آئی ءَ بازین نبشتانکے اردو ڈائجسٹ، آساپ، جنگ،بلوچی دنیا ملتان، مشرق، نوائے وقت، زمانہ،زمانہ کوئٹہ،بلوچی،اولس، ءُُ اے دگہ تاک ءُُ روتاکاں نبشتہ کتگ۔

ایثر عبدلقادر شاہوانی ءَ بلوچی زبان ءُُ لبزانک ءَ بازیں پہناتے ءَ کار کتگ ءُُ آئی ءِ کار پہ بلوچ ءُُ بلوچی ءَ نیاب اَنت۔آئی ءِ بیرانی الم ءَ راج ءَ کہت انت ءُُ تورناک اِنت بلئے زند ءَ اگاں وفائے بوتیں داں بلوچی ءَ را چوشیں گوہر قیمتے ءَ باز اَت کہ اچ ماں گسر بوتگ اَنت۔