نوکیں ایجوکیشن سکریٹری کہ ایجوکیشن ءِ وزیر ءِ قبیلہ ءِ مردم انت۔ آئی ءِ آہگ ءَ پد بلوچستان ءَ ایجوکیشن ڈیپارٹمنٹ روچ پہ روچ پد منتگی ءِ نیمگ ءَ روگ ءَ انت۔ اول سرا پنجگور ءَ مزنیں کساسے ءَ ٹیچراں غیر حاضر پیشدارگ بوتگ ات بلئے پنجگور ءِ نمائندہ ءُُ سوشل ویلفئرءِ وزیر اسداللہ (کہ آئی ءِ سیادی گوں باپ پارٹی ءَ نہ انت) ءِ گامگیجاں سکریٹری ایجوکیشن مجبور بوت کہ پنجگور ءِ اے غیر حاضریں ٹیچرانی جیڑہ ءَ گیشوار بہ کنت۔

چدوپد کیچ ءَ سکریٹری ایجوکیشن ءَ باپ پارٹی ءِ یک کارندہ یے ضلع کیچ ءِ کماش نامینت ءُُ آئی ءِ باپشت ءَ 114 ٹیچراناں یکپارگی بیدء جست ءُُ پرس ءَ چہ نوکریاں درکت پدا وہدے چہ اپوزیشن ءِ نیمگ ءَ وہدے بلوچستان اسمبلی ءَ جاک ءُُ سلوات بوت گڑا سکریٹری ایجوکیشن ءَ وتی اے ضلعی آفیسر ءَ رکینگ ءِ حاترا یک کمیٹی یے جوڑکت حالانکہ چدو پیش بلوچستان ءِ سروزیر میر جام کمال ءَ وتی تربت ءِ تروتاب ءِ وہد ءَ ضلعی تک ءَ یک کمیٹی یے جوڑ کتگ ات۔

آ کمیٹی ءِ رپورٹ ءِ ردا اے درائیں ٹیچراناں ضلعی آفیسر ءَ باپ حکومت ءِ لہتیں وزیر ءُُ اسمبلی ءِ ممبرانی سر ءُُ سوج ءِ سرا درکتگ ات بلئے چوکہ ضلعی آفیسر کارگشادیں مردمے نہ ات ایشی ءَ نہ ایوک ءَ اے لسٹ ءِ تہا وت باپ حکومت ءِ وزیر ءُُ اسمبلی ءِ ممبرانی جند ء ِمردمانی نام ہور کت انت ءُُ لہتیں ہما مردمانی نام کہ گوستگیں سالاں ریٹائرڈ بوتگ ءُُ بازیں بیران بوتگ انت چرے بیرانیں ءُُ ریٹائریں مردمانی نامانی ہوار بوہگ ءَ درائیں ملک ءَ سکرٹیری ایجوکیشن ءُُ ضلعی آفیسر ءِ مزنیں بدنامی یے بوتگ ات کہ آئی ءِ دیمپانی سکریٹری ایجوکیشن صوبہ ءِ تک ءَ یک کمیٹی یے جوڑ کنگ ءَ گوں کت بلئے ہمے زوتاں چاگردی رسانک در ءَ وہدے نوکیں لسٹ کمیٹی ءَ دیما آورتگ ات گڑا اے لسٹ ءِ تہا ایوک ءَ اے کار کتگ ات کہ ہمے لسٹ ءِ تہا مرتگیں ءُُ ریٹائریں مردمانی نامانی کشگ ءِ ہواری ءَ باپ حکومت ءِ وزیر ءُُ اسمبلی ممبرانی سیاد ءُُ عزیزانی نام پدا ہوار گیتکگ ات انت بلئے ہما ٹیچر کہ بازیں سالاں اسکولاں ڈیوٹی دئیگ ات انت آہانی نام ہوار کنگ نہ بوت انت۔

ہمے وہد ءَ ماں کیچءَ سکریٹریءِ لاڈوکیں ہمے ضلعی آفیسر ءِ نیمگ ءَ سی ٹی ایس پی ءِ نوکیں بھرتیانی جار جنگ بوت بلئے وہدے نوکیں بھرتیانی حال مہلوک ءَ سر بوت گڈا مہلوک حیران بوت کہ ضلعی آفیسرءَ نیم ءَ چہ گیش نوکری وتی سیادہ ءُُ عزیزاں ءُُ ایندگہ پہ زر بہر کتگ انت۔ چرے گامگیج ءَ کیچ ءِ مہلوک ءَ کیچءِ جتا جتائیں پارٹیانی کماشی ءَ زہر شانی کت۔ مہلوک ءِ ہمے زہر شانی ءِ ترس ءَ سکریٹری ایجوکیشن ءَ وتی لاڈوکیں ضلعی آفسیر چہ پوسٹ ءَ ٹرانسفر کت۔

نوں مہلوک ءِ گشگ ایش انت کہ ہمے ضلعی آفیسر ہنچو کہ اے نوکیں پوسٹ بہا کتگ انت ہمے وڑا آئی ءَ پیسریگیں 114ٹیچراں درکت انت تنکہ ادا ہم آئی ءَ کمائی ءِ موقع یے برس ایت بلئے گپ ایش انت کہ سکریٹری ایجوکیشن پرچہ اے وڑیں ضلعی آفیسرے ءِ سرا ہنچو باور کنت سکریٹری ایجوکیشن چہ باپ پارٹی ءِ ایجوکیشن وزیر ءَ مجبور انت۔۔۔۔؟