شعبہ بلوچی بلوچستان شہدربرجاہءِ چیردستیءَ بلوچی زبانءِ نمیرانیں تژنءُ بچکند نویس ھُدا مرزی محمد بیگ بیگلءِ یاتءَ 29نومبرءَ یک جستءُ پُرسی دیوانے برجم کنگ بوت۔ شعبہ بلوچیءَ برجم بوتگیں اے جُستءُ پرسی دیوانءَ بی ایس بلوچی، ایم اے بلوچی، ایم فل اسکالرءُ پی ایچ ڈیءِ نودربراں بہر زُرت۔ اے دیوانءَ نودربراں بلوچ،بلوچی، بلوچستانءِ راجدپتر، سیاست،دودءُ ربیدگ ءُ زبانءُ لبزانکءِ بابتءَ جُست کنگ بوت اَنت۔ ہر یک جستےءِ راستیں پسوءَ پہ دہ کتاب پہ نودربراں سوگات ایر اَت۔سوبمندیں نودربراں پانزدہ سدءِ کچءَ کتاب داد دئیگ بوت اَنت۔

پہ اے جستءُ پرسی مراگشءِ ھاترا کتابانی دروشمءَ مستریں کمک بلوچی اکیڈمی کوئٹہءَ کتگ اَت کہ کساس شش سد کتاب بلوچی اکیڈمیءَ پہ نودربراں سوگات کتگ اَت ءُ اشیءَ ابید بلوچستان اکیڈمی کیچ،عزت اکیڈمی پنجگور، اوتاک مکران، چمگ پبلی کیشن، مہردرپبلی کیشن، سنگت اکیڈمی آف سائنسز،استین پبلی کیشن،زنداکیڈمی نوشکی، انسٹی ٹیوٹ آف بلوچیا، سچکان پبلی کیشن،علم و ادب پبلی کیشن،بلوچی میوزک پروموٹرسوسائٹی ءُ ایندگہ لبزانکی گلءُ ادارگانی نیمگا ھوں چہ بازیں کتابے پہ اے مراگشءَ بہر زورکیں نودربرانی واستہ دیم بوتگ اِت اَنت۔ کل کساس1500 جتا جتائیں سرھالانی بلوچی،اردوءُ انگریزی زبانانی تہءَ نوستگیں کتاب نودربراں پہ داد دئیگ بوت اَنت۔ اے مراگشءَ بلوچی ءِ نودربراں بلوچستانءِ راجدپتر،زبانءُ ادب، دودءُ ربیدگءُ راجمانءِ بابتءَ جُست کنگ بوت۔

دیوانءِ ھاسیں مھمان بلوچستان مزن شہدربرجاہءِ پرو وائس چانسلر ڈاکٹر سعود تاج اَت کہ آئیءَ گوں نودربراں تران کنانءَ گُشت کہ بلوچی ڈیپارٹمنٹءِ نیمگا برجم بوتگیں اے مراگش یک باز ارشت داریں دیوانے۔ آئیءَ گشت کہ اولی رنداِنت کہ شہدربرجاہءِ تہءَ بلوچی ڈیپارٹمنٹءِ سروکءُ ادءِ استاد پہ سوبمندیں نودربراں کتاب بہر کنگءَ اَنت کہ ایندگہ جاگہاں اے روایت مروچی باندا گار ءُ بیگواہ اِنت۔ کتاب انسانءِ مستریں دوست اَنت۔ نودربرانی گوں کتاباں یک مھکمیں سیادی یے المی اِنت پرچہ کہ مروچی ئیں نوکیں دنیاءِ تہءَ نودر کتاباں کمءُ ایندگہ ٹیکنالوجیءَ گوں زیات نزیک بوتگ اَنت اے ھاترا المی اِنت نودربراں یک رندے پدا کتابانی نیما دلگوش گور کنائینگ بہ بیت۔

آئیءَ گشت کہ اے مراگشءَ چہ نہ تہنا سرجمیں شہدربرجاہءُ بلوچی ڈیپارٹمنٹءِ نام رژناہ بیت بلکیں کتاب وانگءُ کتاباں گوں نزیکیءِ ربیدگ یک رندے پدا زندگ مانیت۔ ڈاکٹر سعود تاجءَ گشت کہ اے وڑیں مزن شانیں علمی ءُ زانشتی دیوان بائندگیں ھمک ڈیپارٹمنٹ جم بدار اَنت دانکہ نودربرانی علمءُ زانگ بہ ودیتءُ آ گوں کتاباں مہر بدار اَنت۔ آئیءَ دیمترا گشت کہ ما بلوچی ڈیپارٹمنٹءِ استادءُ نودربرانی ھر وڑیں کمکءَ مدام ساڑی ئیں۔

دیوانءَ تران کنانءَ بلوچستان مزن شہدربراجاہءَ اکیڈمک اسٹاف ایسوسی ایشنءِ سروک پروفیسر ڈاکٹر کلیم اللہ بڑیچ، براہوئی ڈیپارٹمنٹءِ سروک پروفیسر ڈاکٹر لیاقت سنی، سوشل ورک ڈیپارٹمنٹءِ سروک پروفیسر ڈاکٹر،ممتاز بلوچ، تربت یونیورسٹیءِ پروفیسر ڈاکٹر گل حسن، سوشل ورک ڈیپارٹمنٹءِ پروفیسر ڈاکٹر سراج بشیر ءُ ایندگراں گشت کہ اے جستءُ پرسی دیوان یک پہکیں زانشتی مراگشے کہ چریشیءَ نودربرانی نیامءَ باج بریءِ ھب ودیتءُ گوں کتاباں آھانی سنگتی گیشتر مھکم بیت۔ آہاں گشت کہ اے پئمیں دیوانانی اڑ دئگءَ چہ نودربرانی علمی کچءُ کساس گیش بنتءُ آہاں وتی راجدپتر، ربیدگ، دودمانءُ لبزانکءِ ھاترا بازیں سرپدی ھوں رسیت۔

بلوچی ڈیپارٹمنٹ ءِ سروکءُ استادانی جہد اے درگءَ ستا کرزاَنت کہ آہاں اے وڑیں نوکیں رنگےءَ جستءُ پرسی دیوانے اڑ داتگ ءُ نودربراں کتاب داد دئیگا اَنت۔ دیوانءِ گڈ سرا بلوچی ڈیپارٹمنٹءِ سروک پروفیسر ڈاکٹر رحیم بخش مہرءَ دراھیں مہمانانی منت گپتءُ گشت کہ بلوچی ڈیپارٹمنٹ 2013ءَ چہ اے وڑیں جستی مراگشی کنانءُ پیداک اِنت۔ اے وڑیں دیوانانی برجم کنگءِ مولءُ مراد بلوچیءِ نودربرانی تہءَ سرپدی ودینگءُ آہاں چہ وتی ربیدگءُ زبانءُ راجدپترءَ شناسائی دئیگ اِنت۔

استیں دؤرءَ بلوچی ڈیپارٹمنٹ یک مھکمیں ادارگےءِ دروشمء َ انت، مئے مولءُ مراد تہنا نودربراں کاگدی دگرے دئیگ نہ اِنت بلکیں آہانی اندرءَ علمی ھُبے ودی کنگ اِنت دانکہ آ وتی ڈگریءَ سرجم کنگ ءَ پد وتی زبانءُ لبزانکءِ ھزمتءَ بکن اَنت۔ آئیءَ گشت کہ چرے مراگشءَ نودربرانی چکاسانی ھوں شریں وڑےءَ تیاری بیتءُ آہاں ھمے کتاب کہ پہ داد دئیگ بنت اے کتاب آہانی کورسءِ ھاترا ھوں المی اَنت۔

شعبہ بلوچیءِ دروازگءُ ادءِ استادانی دل مُدام پہ وتی نودربراں پچ اَنت۔ بلوچستانءِ ھرچ دمگءَ چہ آئیوکیں نودربراں ما ادءَ وش اتک کنیں۔ پروفیسر ڈاکٹر رحیم مہرءَ گشت کہ اے جستءُ پرسی مراگشءِ اڈ دئیگءَ پہ بلوچیءِ استادانی کمک ستا کرزاَنتءُ ما دراھیں اکیڈمی، ادبی گلءُ پبلشرانی منتواریں کہ آہاں پہ اے دیوانءَ وتی کتاب دیم داتگ اَنت۔

اے وھدءَ بلوچی ڈیپارٹمنٹءِ گوستگیں سروک پروفیسر ڈاکٹر حامد بلوچی، گل خان نصیر چئیرءِ سروک پروفیسر نسرین گل، پروفیسر اے آر داد، پروفیسر شریف میرءُ ایندگہ ڈیپارٹمنٹانی پروفیسرء ُ لیکچرار ھوں ساڑی اِت اَنت وھدے کہ اسٹیجءِ ذمہ واری بلوچی ءِ پروفیسر ذاہد دشتی، پی ایچ ڈی ءِ نودربر مجاہد بلوچءُ سعید عاقلءَ گون اَت۔