سئے چار سال انت کہ بلوچی اکیڈمی وتی چھاپ کتگیں کتاباں پہ نودربر ءُُ وانوکاں مفت ءَ بہر کنگ ءَ انت۔ چرے گپ ءَ بازیں مردم حیران انت ءُُ گوں اکیڈمی ءَ دل رنج انت کہ اکیڈمی پرچہ کتاباں مفت دنت۔ آہانی گوشگ انت کہ ایشی ءِ نقصان ایش انت کہ یکے وَ بلوچی ءِ وانوک کتاب بہا نہ زور انت گڑا نبشتہ کار ءُُ چھاپکاراں تاوان انت کہ آہانی پرنٹنگ ءِ حرچ ءُُ درچ در نئیت،دومی ایش کہ کتاب اگاں مفت بہ رس اِیت گڈا کتاب ءِ ارزشت کم بیت۔

چوناہا اے لیکہ تاں حدّے ءَ راست انت بلئے بلوچی اکیڈمی ءِ واکدار اے معاملہ ءَ یک دگہ رنگے ءَ چاراَنت۔ چوشکہ بازیں نودربر ہم اے گپ ءَ وت پریشان بنت کہ مارا اے کتاب کجام سبب ءَ مفت دیگ بوئگ ءَ انت یا بلوچی اکیڈمی ءِ مقصد چے انت کہ آ وتی کتاباں مفت ءَ دیَگ ءَ انت؟ پریشی ءَ اکیڈمی ءَ چے فائدگ رس اِیت۔ اے پسّو آنی جواب ایش انت کہ:
۱۔ بلوچی اکیڈمی ءَ را چہ بلوچستان ءِ سرکار ءَ سالینہ گرانٹ رَس اِیت کہ پہ بلوچی زبان، دود ءُُ ربیدگ ءِ پہازگ ءُُ دیما برگ ءَ جہد بہ کنت۔چرے گرانٹ ءَ بلوچی اکیڈمی سالے بیست یا سی کتاب چھاپ کنت۔لبزانک، زبان ءُُ ربیدگانی پہازگ ءِ توجیل ءِ در گیجگ ءَ سیمینارءُُ ورکشاپ اَڑکنت۔ بلوچی اکیڈمی کہ ہرچ کتابے چھاپ کنت گڈا ہما نبشتہ کار، شاعر یا پولکار ءَ را رائلٹی ءِ مدّ ءَ مُزّے ادا کنت کہ چریشی ءَ نبشتہ کارے ءَ را مالی آسراتی یے رس اِیت۔

۲۔ یک وہدے اے ہم بوتگ کہ بلوچی اکیڈمی ءَ کتاب چھاپ کتگ گڈا آہانی کساس پنچ صد(۰۰۵) بوتگ بلئے اے کتاب پہ بہا بوتگ انت پمیشا بلوچستان ءِ ایندگہ دمگاں سر نہ بوتگ انت۔ اگاں کسے شال (کوئٹہ) ءَ اتکگ ءُُ سرے اکیڈمی ءَ کپتگ گڈا پرائی ءَ اے الم بوتگ کہ آ بلوچی ءِ کتاباں بہا بہ زور اِیت۔ بلوچ نودربر کہ چہ وتی ہلک ءُُ دمگاں پہ وانگ ءَ کوئٹہ ءَ کاینت گڈا آہاں اینچو واک ءُُ وسیلہ نیست کہ آ گراں قیمتیں کتاب بہا بہ زور انت، پدا آہانی جندءِ فیلڈ ءِ کتاب ہمنچو گران انت کہ آہاں پہ گیشیں کتابانی بہا زورگ ءَ زرّ ءُُ مال پشت نہ کپ اِیت۔پدا اے وہد ءَ ہرچ بلوچ اے گپ ءَ سرپد انت کہ ورناہاں کار ءُُ روزگار نیست، گڈا آ چوں گران قیمتیں کتاب بہا زُرت کن انت۔ پمیشا بلوچی اکیڈمی ءِ واک داراں اے گپ ماراِتگ کہ ہما نودربر یا بلوچی ءِ حب ناکیں مردم کہ کتاب بہا زرت نہ کن انت آہاناں اے کتاب دیگ بہ بنت۔

۳۔ وہدے بلوچی اکیڈمی ءَ کتابانی بہر ءُُ بانگ ءِ دود بندات کت گڈا بلوچستان ءِ جتاجتائیں ہلک ءُُ دمگاں کتابجاہ ءِ دود رواج گپت۔ مرچی ا سکول، کالج ءُُ یونیورسٹی آنی کتاب جاہاں ابید ۰۰۵ءَ گیش انچیں پرائیوٹ لائبریری جوڑ کنگ بوتگ کہ اودا بلوچی اکیڈمی ءِ کتاباں ہوار بازیں وانگی کتاب ایر انت ءُُ ورنا اودا رَواَنت،علمی مجلس کن انت ءُُ کتاب ہم وان انت۔

۴۔ چار پنچ سال ءَ پیش بلوچی زبان ءَ ہر نبشتہ کار یا چھاپکار ءَ کہ کتاب چھاپ کتگ گڈا آہانی کساس ۰۰۵ بوتگ بلئے ایش ہم لس وانوکانی دست رس ءَ نہ بوتگ انت۔ اے لیکہ مشہور بوتگ کہ بلوچی ءِ وانوک ایوکا ہما انت کہ وت شاعر انت یا نبشتہ کار انت۔ بلئے مرچی کہ بلوچی اکیڈمی ءَ وتی کتاب بلوچستان ءِ کُنڈ کُنڈ ءَ ابید دری ملکاں ہم پُجّارینتگ انت گڈا نودربراں بلوچی ءِ وانگ ءِ حب گیش بوتگ۔ مرچی بلوچی اکیڈمی ہرچ نبشتہ کار یا شاعر ءِ کم چہ کم دو ہزار (۰۰۰۲) ءِ کساس ءَ کتابے چھاپ کنت گڈا شش ماہ ءِ مدّت ءَ آکتاب ہلاس بیت ءُُ وانوکاں سر بیت۔

۵۔ بلوچی اکیڈمی ءِ کتاب ملکی دمگ لاہور، اسلام آباد، پشاور، کراچی، ڈیرہ غازی خان، نصیر آباد، کچھی، سبی،پنجگور، خاران،نوشکی، تربت، گوادر ءُُ ایندگہ مزن ءُُ کسانیں شہراں ابید در ملکاں چوشکہ مسقط، بحرین، لندن، سویڈن،اٹلی،ایران ءِ بلوچاں بغیر مُزّ ءَ سر کنگ بوتگ انت۔ چریشی ءَ بلوچی زبان ءِ وانوکانی کساس ودّاِتگ ءُُ مرچی بلوچی زبان ایوکا یک دمگے ءَ یا لہتیں نبشتہ کار ءُُ شاعرانی زبان نہ انت بلکن ءَ کتاب ءِ وانگ ءِ حُب ہرچ مردمانی تہا ودی بوتگ۔

اے دراہیں سبب آنی برکت انت کہ مرچی ہرچ نودربرے کہ تُری کجام ہم فیلڈ ءَ وانگ ءَ انت آ بلوچی زبان ءِ وانگ ءَ حب ناک انت۔ اگاں یک ڈاکٹرے، انجینئرے، سائنس زانتے یا چاگرد ءِ ایندگہ تک ءِ زانت کارے وتی زبان ءَ سرپد بیت، نبشتہ کنت گڈا آ وتی زبان ءَ ہما فیلڈ ءِ باروا معلوماتی کتاب ہم نبشتہ کت کنت۔
ہمے وڑا اگاں ماں اسکول ءُُ کالجانی زہگ چہ بندات ءَ وتی ماتی زبان ءَ وان انت ءُُ سرپد بنت گڈا آ گیشر علم ءُُ زانت ءِ نیمگ ءَ دلگوشی دینت۔ بلوچی اکیڈمی ءِ واہگ ءُُ جہد انت کہ بلوچی زبان پہازگ بہ بیت ءُُ دیمروئی بہ کنت، پریشی ءَ الّم انت کہ بلوچی ءِ وانوک گیش بہ بنت، بلوچی ءِ نبشتہ کار ودی بہ بیت ءُُ بلوچی زبان ءَ دنیا ءِ ایندگہ علم ءُُ زانتانی باروا کتاب دیما بئیت انچو کہ ایندگہ راجانی زبان ءَ دیمروئی کنگءَ انت۔