ملک ءَ داں بنگالی است ات اَنت گڈا ملک واہند ءُ حاکمانی دلیل ءُ توجیل اِش اَت کہ ملک ء ِوسیلہ آبادی ءُ جاہ منندی ءِ بدل ءَ رقبہ ءُ پد منتگی ءِ زلورت سر ءَ بہر ءُ بانگ کنگ بہ بنت بلے وھدے بنگال سست ءُُ بنگلادیش بوت گڈا ملک ءِ ہمے حاکماں وتی توجیل ءُ دلیل بدل کت اَنت،ھما دلیل ءِ سرا کہ بنگال سندگ ءُُ دورا کنگ بوت گوں ھمے دلیل ءِ سرا بنجاہ گوں ایندگہ دمگاں (صوبہ) دیم پہ دیم بوت بزاں بنگال ءِ ھما گپ کہ بائد اِنت کہ ملک ءِ وسیلہ آبادی ءُُ جاہ منندی ءِ سرا بہر ءُ بانگ کنگ بہ بنت۔

بیھال کنگ بوت پرچکہ کہ نوں حاکمانی جند ءِ دمگ ءِ آبادی چہ ُ ایندگہ سیُیئں دمگانی آبادی ءَ گیش تر اَت۔ اے ہنچیں ”یو ٹرنے“ اَت کہ عمران خان ءِ درائیں زندءِ ”یوٹرن“ یکجا ہ کنگ بہ بنت اِشی ءِ کوپگ ءَ نیاا َنت۔ چوکہ ایندگہ دمگاں تنیگا چشیں حکومتے نہ یتکگ کہ گوں بنجاہ ءِ واکداراں وتی حق ءُ مزانی گپ ءَ پہ بے ترس ءُ لپرزگ بجنت پمیشگہ وسیلہانی بہر ءُ بانگی منگ بوتگ ءُُ برجاہ انت چوکہ دمگاں ہم گیشتر ھنچیں داشتگیں مردم حکومت ءَ آرگ بنت کہ گوں بنجاہی واکداراں گپے جت کت مکن اَنت۔

پمیشگہ ایندگہ سیئیں دمگاں حکومت بنجاہی حکومت ءِ پلہ مرز ءُُ آئی سوڈگنی منوک اَنت چو ھما شیرئیگ ءَ کہ گوں روباءُُ تولگ ءَ شکار ءَ در کپت۔ اشاں یک خرگوشکے، یک شنکےءُ یک مزنی سیدجت گڈا شیر ءَ گوں تولگ ءَ گشت کہ شکاراں بہر بکنت۔ تولگ گشت خرگوشک منی اِنت، شنک روبا ئیگ اِنت، سید توئے شیرئیگ اِنت۔شیر زھرگپت ءُُ پرگپتءُُ تولگے گپت ءُ ششلینت ءُُ پدا روبا ءَ را گوشتے کہ تو شکاراں بہر کن،۔روبا ءَ گشت شیر! خرگوش تئی ارز بند اِنت، شنک تئی ناری اِنت، سید تئی شام اِنت، تئی ارز بند، ناریءَ شام ءَُ پد ھرچ ھڈءُ کنڈگے کہ سر کیت آ منی ئیگ ءُُ تولگے ئیگ اَنت۔

شیرءَ گشت، سک وش، تو ئے روبا سکیں انصاف پسندے ئے۔ اے پاکستان ءَ بنجاہی واکدار گوں ایندگہ دمگاں وسیلانی بہر ءُ بانگ ءَ چو شیر ءَ نشتگ اَنت ءُُ دمگانی کماش چہ شیرءِ ترس ءَ وت وتی بہرءُُ ونڈاں بنجاہی واکدارانی حوالہ کن اَنت نباکہ شیر آہاں کبند مہ کنت۔ بدبختی پہ بلوچستان ءَ دواَنت یکے ایش اِنت کہ اے ملک ءِ پد منتگیں دمگ اَنت اشی ءَ ایندگہ دمگانی برابری آرگ ءَ گیشتر در وسیلہ ءِ زیلورت اِنت دومی ایش اِنت کہ گوں وتی مادنی دور وسلیہاں اے پاکستان ءِ سیرتریں دمگ انت۔

بنجاہی حکومت ایوک ءَ سوئی گیس ءِ مدءَ بلوچستان ءِ ارباں کلدارءِ وام دار انت، سیندک، ریکوڈک، حبکو پاور، حب گولڈ اینڈ کاپر مائن پروجیکٹ ءُُ دگہ 12 سد کلو میٹر ءِ تیاب ءِ عالمی ٹیکسءُُ ایندگہ وسیلہ کہ چہ بنجا ہی حکومت ءَ گرگ نہ بوتگ اَنت۔ اے درچ ءَ بازیں زانتکارانی گوشگ ایش اِنت کہ اگاں بنجاہی واکدار ایوک ءَ 2001 ءِ افغانستانءِ سرا امریکہارش ءِ داتگیں ذراں بدنت بلوچستان ءَ دگہ حاجتے نہ بیت بلے بل جہندم چہ گیس رائیلٹی، جہندم چہ بنجاہی نوکریاں بلوچستانءِ کوٹہ،جہندم چہ ریکوڈک، جہندم چہ سیندک ءُ ایندگہ وسیلہاں۔

بنجاہی حکومت ھمک سال ءِ بلوچستانءِ داتگیں ذراں پد ا پچ گپت۔ پیسرا اے وڈا بوتگ کہ بنجاہی حکومت ءِ نیمگ ءَ کہ ھر چ فنڈے دئیگ بوتگ آ مئی ءِ ماہ لیپس کنگ بوتگ نوں بنجاہی حکومت پہ مئی ءَ ہم صبر کنگ ءَ نہ اَنت بلکیں نوکیں سال ءِ جنوری ہم ناں،دسمبر ءَ ذراں برگ ءَ اِنت بلوچستان حکومت ءَ ھنچو توفیق نیست کہ بگش اِت کہ” واجہ! مئے گناہءُُ میار؟ “