اے نوں چیریں گپے نہ انت کہ ملک ءِ معاشی بدحالی ءِ پش در ءَ بنجائی حکومت سوڈگ انت کہ بلوچستان حکومت نوکری ءُُ ملازمت ءِ دیگ ءَ دست ءَ سبک بدار ایتءُُ ہرچ سالیگیں بجٹ ءَ پد دمگی حکومت ءَ کہڈن کنگ بیت کہ داتگیں زرانی ایوک ءَ یک بہرے ہرچ کنگ بہ بیت ءُُ ایندگہ بہر پدا بنجاہی حکومت ءَ دیگ بہ بیت۔داں ۳۱۰۲ ءَ ہمے وڑا بوہگ ءَ انت۔

پدا وشتریں گپ ایش انت کہ بنجاہی حکومت ءِ نیمگ ءَ اے بہتام ہم جنگ بیت کہ بچارئے بلوچستان حکومت ءَ کہ چنچو نابود ءُُ بے سنچ انت کہ داتگیں زراں ہرچ کت نہ کنت دومی ایش کہ یکے وَاے داتگیں زراں ہرچ کت نہ کن انت بلے مدام بنجاہی حکومت ءَ اے بہتام ءَ جن انت کہ بلوچستان ءِ حق ءُُ مز ءَ نہ دنت؟بلے کئے بگش ایت کہ بلوچستان ءِ حکومت ءَ اے بود ہم نیست انت کہ بگش ایت کہ”مارا جن انت پدا گریوگ اوں نیل انت“؟

اے درائیں پاکستان ءَ مالی بدحالی پشت ءَ سرکاری روزگار ءِ در ءُُ وسیلہ ُ بند انت دومی نیمگءَ ازلی دشمن ہم بڑءُُ سرا کپتگ پمشگہ بلوچستان ء ِ جہگیر چشیں گیشیں زورے مہ جن انت کہ سرین بہ پروش ایت بلے یک راستی یے چہ چماں چیر نہ بیت، آ ایش انت کہ بلوچستان ءَ ناں فیکٹری ءُُ کارخانہ یے ہست ءُُ ناں کشت ءُُ کشاری ءِ دروسیلہ یے،ناں واہگہ بارڈرے ہست ءُُ ننکہ طورخمے!اے درچ ءَ آؤکیں روچ پہ بلوچ مھلوک ءَ سک سک بنت۔

اگاں بلوچ جہگیراں پہ وہد ءُُ موسم سر نہ گپت گڑا بلوچ مزنیں شد لاپی یے ء ِآماچ بنت۔اگاں بنجاہی ءُُ دمگی حکومت نہ لوٹ انت گڑا اشانی اولی ز مہ واری انت کہ آپہ بلوچ مھلوک ءَ دو راہ ءُُ در پچ بکن انت یکے ایش بلوچستان ءَ فشریز ءَ دیمروئی بدیئنت پرچکہ فشریز بلوچستان ءَ ہما در انت اگاں اے پچ کنگ بوت گڑا اے نہ ایوک ءَ بلوچستان ءَ آباد کنت بلکیں پاکستان ءِ وام ہم ہلاس بنت بلے اگاں گوں حکومت ءَ زوت اے کار نہ بیت گڑا دومی راہ بلوچستان ایران بارڈر ٹریڈ انت۔

چریشی ءَ مستریں بدبحتی چے بہ بیت کہ بائدانت کہ بلوچستان اسمبلی ءَ نشتگیں جہگیر پہ بلوچ شدلاپیں مھلوک ءَ بیپار ءِ راہ ءُُ درے شوہاز بکن انت، آہمک سے ماہ ءِ سرا پہ یک کسانیں بہانہ یے بیپار ء ِبند کن انت ءُُ اشانی توجیل ایش انت کہ ”مئے مھلوک شپکی ءَ بیپارے گوش ایت“۔حالانکہ نوں مھلوک جوانی ءَ سر پد انت کہ جیڑہ گوں شپکی ءُُ بے شپکی ءَ نہ انت بلکیں حاکم نہ لوٹ انت کہ نِبا سعودی عرب ناراز بہ بیت؟؟

بلے کئے بلوچ ءِ جہگیرانی سینگ ءَ اے دل ءَ مان بہ کنت کہ اگاں سعودی عرب گوں ایران ءَ بیپار نیل ایت گڑا اے دمگءِ مردمانی روزگار ءِ بند ءُُ بست ءَ بہ کنت دومی اے جہگیرانی زمہ واری انت کہ سعودی ءَ سرپد بکن انت کہ پہ بلوچانی ۲ لک آبادی زاناں ایران کجاں سوب ءَ کنت؟؟ اگاں ایشاں چوش نہ کت گڑا بلوچستان اسمبلی ءَ نشتگیں اے مردم وت اوں چہ ٹھیکہ ءُُ کمیشناں زبہر بنت۔