قدیر لقمان ءِ نبشتہ ءِ سفر ءَ بیست سال کبل انت۔آ ئی ءَ وتی نبشتہ ءِ سفر ۰۰۰۲ ءَ بنا کتگ بلے یک درچ ءَ نبشتہ کنگ ءَ انت۔آ آ زمانک نبشتہ کنت(کتاب پہ چھاپ ءَ جریدگ انت)،شاعری ہم کنت ءُُ نبشتانک ءُُ نگد ہم نبشتہ کنت۔ آ ئی ءَ بلوچی،انگریزی ءُُ اردو بتلانی سرا یک پولکاری کارے ہم کتگ کہ سے وار چھاپ بوتگ۔وت لبزانکی تک ءَ بلوچستان اکیڈمیءِ کار گشاد ءِ جہت ءَ کار ءَ انت۔

قدیر لقمان ءِ نوک تریں کتاب انت ’تمک کہ علم وادب پبلشر کراچی ءَ چھاپ کتگ۔اے کتاب ءَ آ ئی ءِ نبشتانک ہوار انت کہ آئی ءَ جتا جتائیں وہد ءُُ پاس ءُُ جتا جتائیں بنگپ ءُُ سر حالانی سرا نبشتہ کتگ انت اگاں کہ بلوچی ءَ نبشتانکاناں ساچشتی ارزشتے دیگ نہ بیت بلے دنیا ءَ نبشتانک لبزانک ءِ المیں بہرے آں۔پہ گچینی برٹرینڈ رسل ءُُ مارک ٹوئین ءِ۔اگاں ساچینک ءِ ساچگ ءَ ساچشت ءِ مزنیں کردے گڑا ہمے وڑا یک نبشتانکے ءِ نبشتہ کنگ ءَ ہم یک پولکاری ساچشتے (تخیل)ءِ پکار بیت کہ آئی ءِ پش در ءَ مردم دری (معروضی) راستیانی شوہاز ءَ سرشون ءِ پدا کپ ایت پمیشگہ اے ہم یک ارزانیں کارے نہ انت۔

البت اے گپ چارگ کرز ایت کہ بنگپ چونین انت ءُُ کجام درچ ءَ نبشتہ کنگ بوتگ انت اے بابت ءَ قدیر لقمان وت نبشتہ کنت کہ”اے نبشتانک وتی بن گپاں جتا انت،سر گوست اش ہوار ءُُ پٹ ءُُ پول ات ہم۔اے لبزانکی گیشی یے یا حب ءِ سرءِ پروشگ یا دل ءِ سوک۔۔۔ اے بن گپاں من وتی لبزانکی سپر ءَ گنداں۔لبزانکی چست ءُُ ایراں گنداں“۔قدیر ہم زانت کہ آ کہ ساچینکی نبشتہ کار انت،آ زان انت کہ ہرچ بنگپ ءَ وتی کالبے (فارمے) گون۔

لہتیں بنگپ ایوک ءَ نبشتانک ءِ کالب ءَ جلوہ دیئنت بلے نبشتانک ءِ مستریں لوٹ آئی ءِ روانی ءُُ ریچ انتءُُ دومی دری زانت(معروضی علم)۔بلوچی گام جنان انت نوں گمان انت کہ بلوچی ءَ چشیں تہرے سر نئیت کہ پرآئی ءَ نبشتہ کارے مہ بیت۔”تمک“ءِ سرا پروفیسر ڈاکٹر عبدالصبور بلوچ نبشتہ کنت کہ”تمک ءِ سر جمی ءَ وَ نبشتانک نہ انت،جاگہ یےءَ آزمانکی دروشمے گندگ بیت،جاگہ یے سر گوستے ءِ صورت زاہر بیتِ،جاگہ یےءَ پولکاری ءِ گمان بیت بلے موادانی گیشتریں کساس ءِ ردا من ”تمک“ ءَ نبشتانکانی کتابے گش ایں“اگاں کہ وت نبشتانک ءِ جندءِ بازیں تہر بنت ہمے وڑا اوتاگ (کالم) ءِ،چو کہ کسہ دروشم (پریشی ءَ اردو ءُُ سندھی ءَ امر جلیل نامدار انت) ءُُ تژن ءُُ کندی ءُُ دگہ۔

پمیشگہ پہ کسانیں پرک ءُُ تپاوتے ءَ نبشتانک ءِ تہر بدل نہ بیت بلے اگاں نبشتانک دری سرشوناں چٹ ہورک بہ بیت گڑا ریزمانکے بیتءُُ ہمے وڑا چہ راستیاں زبہر بہ بیت گڑا کسہ یے ءِ پوشاک ءَ پوش ایت بلے ڈاکٹر صاحب ءِ گپ راست انت کہ ”سالونک بادشاہ انت“۔ ”تمک“ ءَ کل ۲۲ نبشتانک ہوار کنگ بوتگ انت کہ جتا جتائیں سر حالانی سرا نبشتہ کنگ بوتگ انت کہ اشانی تہا لبزانکی،چاگردی،راجگیری،تہ سمائیءُُ جندمانی(شخصیتی) سر حال ہوار انت۔کتاب ءِ پیش لبز مزن زانتیں استاد پروفیسر ڈاکٹر عبدالصبور بلوچ ءَ نبشتہ کتگ۔