واجہ صدیق بلوچ سرجمیں بلوچستان ءَ کسی توسیپ ءِ حاجت ءَ نہ داریت آئی ءَ پہ بلوچ ءُُ بلوچستان ءِ جہد کاری ءَ انچیں کار ءُُ کارپد ءِ واجہ بوتگ کہ آئی ءِ نام بلوچ راجدپتر ءَ دائم ءَ گرگ بیت۔

6-2020 ءَ واجہ صدیق ءِ سال روچ ماں پریس کلب کوئٹہ ءَ جم دارگ بوتگ اَت۔

دیوان ءَ واجہ صدیق ءِ ہردوئیں بچانی کماش بزاں آئی دوئیں روتاکانی باسک ءُُ ممبر روتاک آزادی ءُُ بلوچستان ایکسپریس ءِ کارندہاں بہر زرتگ اَت۔
اے ہردوئیں روتاک لالا صدیق ءَ را چہ وتی زہگاں دوست تر بوتگ اَنت۔آئی ءَ را مدام وتی روتاکانی گم پر بوتگ ءُُ آئی ءَ ہمے روتاکاناں چو زہگے ءَ ردوم داتگ انچو کہ آئی ءَ را وتی زہگ دوست بوتگ اَنت ہمے پیم ءَ وتی روتاک اِش دوست بوتگ اَنت۔

ہما گڈی روچ ءَ کہ واجہ ءِ تب ناجوڑات اے روچاں ہم آئیءَ روتاکانی کار مہتل نہ داشتگ۔ہمے واجہ ءِ یاتگاری دیوانے ماں پنچ شمبئے ءَ پریس کلب ءَ جم دارگ بوتگ اَت۔دیوان ءِ پاگواجہی چیف آف سراوان نواب اسلم رئیسانی ءَ کتگ اَت۔ آئی ہمراہی ءَ ثنا بلوچ،شہزادہ،کاظلم،قمبر دشتی،ناصر بلوچ ءُُ اے دگہ گہیں سروکاں دیوان ءَ بہر زرتگ اَنت۔

دیوان ءِ جار چین واجہ وحید زہیر اَت۔اے دیوان ءَ واجہ صدیق بلوچ ءِ کوئیں زہگانی ہمراہی ءَ روتاک آزادی ءُُ بلوچستان ایکسپریس ءِ درائیں کارندہ ہوار اِتاں دیوان ءَ درائیں گشتانک دیوکاں صدیق بلوچ ءِ جتا جتائیں پہناتانی سرا تران کتگ اَت۔چیزے آئی سیاست ءِ بابت ءَ گپ کتگ اَت ءُُ چیزے ءَ آئی کرد پہ بلوچ قومی جد ءُُ جہد ءَ پلہ مرزی ءَ کتگ اَت۔

دیوان ءِ بندات ءَ طارق بلوچ ءِ سروکی ءَ یک کسانیں انٹرو فلمے واجہ لالہ صدیق بلوچ ءِ بابت ءَ پیش کنگ بوتگ اَنت۔ اے انٹرو ءَ لالا ءِ گڈی چیزے ترانگ ءُُ ہما مردمانی حیال تران اِتاں کہ آواناں لالا صدیق بلوچ ءِ بابت ءَ درشان کتاں چریشاں حامد میر، وسعت اللہ،اے دگہ زانتکار ہوار اِتاں۔ہمے دیوان ءَ بلوچی روتاک ءِ یوٹیوب چینل ءِ بابت ءَ ہم تران کنگ بوت ءُُ ایشی ءِ لاگو ءِ دیمدرائی کنگ بوت۔ لالا صدیق بلوچ ءِ بلوچستان ءَ پہ فرنٹ میڈیاشونکاری ءَ انچیں کردے بوتگ کہ آ ہچ رنگ ءَ ڈالچار کنگ نہ بیت بلکیں ہر وہد ءَ کہ فرنٹ میڈیا ءِ گپ بیت داں کلاں سر لالا صدیق بلوچ ءِ نام گرگ بیت۔

لالا صدیق بلوچ نہ ایوک ءَ یک روتاکے ءِ ایڈیٹر بوتگ بلکیں بلائیں زانتکاریں مردمے بوتگ آئیءِ نبشتگیں درائیں کتاباں،آئی ءِ نبشتگیں آرٹیکل ءُُ ایڈوٹوریلاں کسے بچار یت آ زانت کنت کہ واجہ ءَ را بلوچستان ءِ ءُُ میان استمانی دنیا ءِ چنچو سمائی بوتگ۔ انچو حال ءُُ احوال کہ بلوچستان ءِ اکنامکس ءِ بابت ءَ لالا صدیق ءَ را بوتگ من پہ ستک گشاں کہ گوں کس ءَ نہ بوتگ۔لالا یک بلوچ دوست ءُُ ادب دوستیں مردمے بوتگ۔

وہدے بلوچی اکیڈمی کوئٹہ ءِ جہد کاری ءِ بنداتی دور ءِ گپ بیت داں اے جاہ ءَ ہم لالا صدیق ءِ نام گرگ بیت۔بائد وَ ہمیش اَت کہ لالا صدیق وڑیں مردمے ءِ یاتگاری دیوانے ءَ را حکومت ءِ بلوچستان ءَ بہ کتیں بلئے مئے انوگیں حکومت گوں کمشیر بنے گا پاکستان ءَ گوں مشگل اَنت آئی ءَ را گوں وتی زانتکارءُُ شیواریں مردمانی یاتگاری دیواناں گوں ہچی سروکار نیست اِنت۔بلئے داں بلوچ مانیت لالا ءِ نام مانیت۔۔۔۔