تیا دپی ہوٹل ءِ ڈنی نیمگ ءَ اسپیتیں کپودر چیرمین ماو ءِ بت ءِ چپ ءُُ چاگرد ءَ گواز کنگ ءَ ات انت۔ کامریڈ گوں ہمے ندارگ ءَ دلگوش ات کہ ہوالدارے ءِ دست ءَ پیلالہےء ات کہ آئی ءَ بے ترک ءُُ توار ءَ پیالہ ءِ گرمیں چاہ کامریڈ ءِ سرا مان ریتگک انت۔

کامریڈ ہوالدار ءِ سرا برانز گپت کوکارے کت۔ مہلوک بے کساس ءَ مچ بوت انت۔چیزے ءَ گوں آئی ءِ گماں ہور بوئگ ءِ جار جت ءُُ لہتیناں آئی ءِ سرا کندت ءُُ آ کلاگ زرت۔ بلئے ہوالدار ءَ اے گپ نہ من ات کہ آٰٗ ءَ کامریڈ ءِ سرا گرمیں چاہ پر ریتکگ، ہوالدار ءَ کامریڈ ءِ دستاں کڑی جت ءُُ دیم پہ کلات ءَ برت۔

کامریڈ ءَ وتی راج ءِ حدمت ءِ سرا ایمان ات ہمے زوتاں آٗی ءَ لیٹریچر وانینگ بندات کتگ ات۔ سپاہیاں کامریڈ کڈن کت کہ آ وتی ڈوہ ءَ بہ منیت۔
کامریڈ ءَ درائینت آ یک ادیب ءُُ شاہزانتے آئی ءِ کار ایوک ءَ راج ءِ وانینگانت۔

دگہ ہچ وڑیں گناہ ءُُ میار ءَ گون نہ انت زوریں آوریں ہوالدار ءَ آئی ءِ سرا گرمیں چاہ پر ریتکگ سپاہی کانود ءِ رکینگ ءِ ہاترا انت ناں کہ پروشگ ءِ کامریڈ بزانت گپت ءُُ پدا گوں دلیل گشگ ءَ بوت،آئی ءِ پاد ءِ ٹپ وت اے گواہی ءَ دینت کہ کہ ہوالدار ءَ مپت ءُُ ناہک آٗی ءِ سرا گرمیں چاہ پریتکگ۔بلئے سپاہیاں بہتام جت کامریڈ ٹگے وت وتی سرا گرمیں چاہے پریتکگ ءُُ نام ءَ ہوالدار ءِ کنت۔

کرسی ءِ سر ءِ نشتگیں سپاہیانی سروک ءَ سگریٹ کشت ءُُ دور دات کامریڈ ءِ دیما دراجیں کاگدے ایر کت کہ آٗی ءِ تہ ءَ نبشتہ ات۔ ہوٹل ءِ درائیں مردماں گواہی داتگ کہ کامریڈ ءِ سک ءَ کوکار کتگ کہ چریشی ءَ اود ءِ نندوکیں درائیں مردم ڈانبرتگ ءُُ بیم ءِ آمااچ بوتگ انت بازینے چرے کوکاراں دلسیاہ بوتگ۔ کانود ءِ نز ءَ اے یک ٹوہیں گناہے۔

کامریڈ ءَ گشگ بوت کہ آ وتی اے گناہ ءَ بہ منیت سپاہیاں کامریڈ ءِ دست پشت ءَ بست انت۔ گورجیگ ئے گپت گران ئے کت ءُُ دیم پہ تہاریں کوٹی ءَ شت انت آ گوں زمزیلاں بست ءُُ ٹیپ ات ئے۔

یک سپاہی یے آئی ءِ سینگ ءِ سرا اوشتات ءُُ دگر ءَ وتی پاد آئی ءِ گردن ءَ سک داتنت۔چد ءُُ پیش آئی ءَ اے ڈولیں ازیت ہجبر نہ دیستگ ات۔ اے سزا ءُُ جزا ءِ نیام ءَ آ ایوک ءَ یک گپے جیڑگ ءَ ات۔آئی ءِ کلاساں کئے گیپت ءُُ آئی ءِ نودربراں باریں کئے وانینیت بس ہمے پگر ءَ ات پرچہ راج ءِ ہذمت آٗی ءِ ایمان ات۔

آئی ءِ کش ءِ کوٹی ءَ بندیگے بے کساس گریوگ ءَ ات پریات جنگ ءَ ات توبہ انت دگہ پداں اے وڑ نہ کناں یلہ کن ات۔۔۔آٗی ءِ سر ءُُ پیشانی ءِ حون دیم ءُُ چمانی سرا پٹگ ءَ اِت انت۔ سپاہیاں ہچ بزگ نہ بوت۔۔۔

کامریڈ ءِ چم بندیگ ءَ کپ انت گمانے بوت آئی ءِ کلاس ءِ نودربرے کہ کش ءِ کوٹی ءَ لٹ ورگ ءَ بوتگ۔ وکیلی ہمے زوتاں ہیل ئے کتگ ءُُ مرچاں لیٹریچر ءِ کلاس گرگ ءَ انت۔ آئی ءَ سرکش ات کوٹی ءِ دپ ءِ ہوالدار جت گپت۔ اے ورنا پرچہ بندیگ کنگ بوتگ؟

ہوالدار ءَ پسو دات اے وتا بلائیں مز مردے کنت مئے افسر ءِ سرا زہر گپتگ ءُُ ترندی ءَ گپ جتگ ئے افسر ءَ گپتگ ءُُ بندیگ کتگ۔ اے بندی ءِ دواکشگ انت۔ ہوالدار ءَ دیم ترینت ءُُ پدا ہاموش بوت۔

کامریڈ سدک ات آٗی ءِ کلاس ءِ اے نودربر الم آئی ءِ پد جنگ ءَ اتکگ کہ وتی وکیلی زوراں بہ جنت ءُُ آئی ءَ چہ سرکار ءِ بندی جاہ ءَ بہ کشیت بلئے نوں وت بندیگ انت۔ کامریڈ ءَ سپاہیگ توار کت انت۔سپاہیانی گشتن ءِ سرا دزرند ءَ مہر کنگ ءُُ دروگیں ڈوہ ءِ منگ ءَ ساڑی بوت بلئے ہما رنگ ءَ کہ آ پہک کنگ بہ بیت۔آ ءُُ اٰٗ ءِ کش ءِ کوٹی ءِ بندی آضو کنگ بہ بنت۔ آآجو بوت انت۔

نودربر ءَ گمان بوت کہ کامریڈ ءِ دیم ءِ براہداریں رنگ ءُُ جلوا نوں شتگ۔ آ نادراہی ءِ آماچ انت۔ دیر نہ گوست کامریڈ ءِ اے نادراہی ءَ میتگ سرا زرت۔ میتگ ءِ درائیں مردم ہمے نادراہی ءَ گپت انت۔بازینے بیران بوت ءُُ بازینے وتی زند ءِ گڈی ساہ ءَ کشگ ءَ ات۔