ابن خلدون ء ِ حیال اِنت کہ‘ عصبیت وہدے حراب بہ بیت گڑا دودمان زوال ءِ آماچ بیت۔ اے لیکہ ء ِ رِد ء َ وہدے عصبیت حراب مہ بیت بزاں ایشی ء ِ تہا دگہ نسلے ء ِ مردم ہوار مہ بنت گڑا دودمان بام ء َ سر بیت۔ خلدون ء ِ رِد ء َ عصبیت ء ِ تہا دگہ نسلے ء ِ ہوار بوہگ ء ِ سبب اِیش اَنت۔ اول: دگہ نسل ءُُ عصب ء ِ مردمے دومی عصبیہ ء ِ تہا پمیشکا ہوار بیت کہ آ دیم ء ِ عصبیہ ء َ گوں ہمدردیں واہگے داریت۔

دومی: آ دیم ء ِ عصبہ ء ِ ماسٹر الائنس (بزاں الکاپیں وڑے ء َ یکمْشتی) ء َ گندیت ءُْ وتا ہمیشانی تہا پناہ دنت کہ وتا چہ ایدگہ تْرساں بہ رکینیت۔ سِہمی: آ وتی عصبیہ ءُْ نسل ء ِ تہا بدیں کارے کنت ءُْ دیم ء ِ عصبیہ ء َ گوں (اے بنیاد ء َ) ہوار بیت کہ اْود ء َ ایشی ء ِ راز ء َ مردم سَہی نہ اَنت۔خلدون ء ِ لیکہ عصبیت ء ِ حراب ءُْ محکم بوہگ ء ِ بنیاد ء َ گردش ء ِ لیکہ ء ِ درس ء َ دنت۔ خلدون ء ِ راجدپتری گردش لیکہ ء ِ پہمگ ء ِ سے شرط ہست۔ اول: ہما چیز ء ِ بابت ء َ زانگ بوہگ ء َ اِنت اول سرا چارگ بہ بیت کہ آچیز ء ِتہا بام ءُْ زوال ء ِ نیچر ءُْ جوہر ہست۔ دومی: آئی ء ِ زمانی بدلی یاکَزا ہست یا نیست۔ ءْ سِہمی: ہما چیز ایشی ء ِ تہا جاہ دئیگ مہ بنت کہ اے وڑا ’رویداد‘ نہ بنت بزاں بوت نہ کنت اَنت۔

خلدون ء ِ رِد ء َ ما گردش ء ِ لیکہ ء َ اے وڑا زانیں کہ اول سرا مارا اے زانگی اِنت کہ بام raise ءُْ زوال fall بیت۔ اگاں ما آئی ء ِ گردش ء ِ لیکہ ءَ کارمرز کنگ ءَ اِیں گڑا مارا اے زانگی اِنت کہ مئے بْنگپ ء ِ سبجکٹ اَنچینے بہ بیت کہ آئی ء ِ نیچر ء ِ تہا بام ءُْ زوال ء ِ جوہر ہست بہ بیت۔آئی ء ِ زمانی رنگ چو ظاہر بہ بیت کہ ما ایشی ء َ ماضی ء َ گوں یک رنگ بوہگ ء ِ بنیاد ء َ بست بکنیں۔

اگاں ما اے بام ءُُ زوال ء َ دودمان ء ِ نگاہ ء َ بچاریں گڑا اول سرا مارا اے زانگی اِنت کہ آیا دودمان ء ِ بام ءُْ زوال ممکن اِنت ایشی ء ِ تہا بام ءُْ زوال ء ِ جوہر ہست یا نیست۔ دودمان ء ِ بام ءُْ زوال ء ِ نیچر ء َ ما چہ عصبیت ء ِ حراب (کنفیوز) بوہگ ء ِ بنیاد ء َ زانیں۔ وہدے عصبیت کنفیوز بیت گڑا زوال بیت وہدے زگر بیت گڑا بام بیت۔ ہمے گپ ء ِ رِد ء َ ما مہر گڑھ ء ِ دودمان ء َ ہم چار اِت کنیں۔

خلدون ء ِ وانگ ء َ چہ مردم ہمے سرپد بیت کہ مہر گڑھءِ بام پمیشکا بوتگ کہ اے سرزمین ء َ یکیں عصبیت (آریائی) نشتگ اَنت۔ وہدے ایشانی عصبیت ء ِ تہا دگہ نسلے ء َ جاہ کْتگ گڑا اے دودمان زوال بوتگ۔ خلدون ء ِ گردش ء ِ لیکہ ء ِ رِد ء َ اے بام ءُْ زوال دائما روان کنت۔ بلے ایشی ء ِ مطلب اے نہ اِنت کہ پدا مہر گڑھ ء ِ بام بیت۔ پرچہ کہ بنگپ ء ِ سبجکٹ مہر گڑھ نہ اِنت بلکیں دودمان اِنت۔ وہدے مہرگڑھ ء ِ دودمان زوال بوت گڑا ہڑپہ ء ِ دودمان رْست۔ ہڑپہ زوال بوت موئن جو داڑو ء َ بام رَست۔

ہستیں دؤر ء َ مئے سرزمین ء ِ سرا نیشنل ازم یک دودمانی شکلے کہ اے انسان ء ِ یک مخصوصیں تصور ءُْ مقامے داریت، ہمے بنیاد ء َ راجمانی ساختے گوں ہمسنگی ء َ برجاہ کنگ لوٹیت۔ بلے مروچاں نیشنل ازم ہم زوال ء َ کپان اِنت ءُْ ایشی ء ِ جاگہ پوسٹ ماڈرن سرمایہ داریت یک دودمانے ء ِ رِد ء َ گِران اِنت کہ ایشی ء ِ گورا انسان ء ِ مخصوصیں تصور ہمیش اِنت کہ آ ’گِرَاکے‘ ءُْ ہمے بنیاد ء َ ایشی ء ِ مقام بندگ بیت۔

خلدون ء ِ لیکہ ء ِ رِد ء َ ما ہمسریں اَہد ء َ یا ایشی ء ِ دودمان ء َ اے وڑ زانت کنیں کہ ما دودمان ء ِ نیچر چاراِت، ایشی ء ِ آفاقی بوہگ کہ اے انسان ء ِ مخصوصیں تصور ءُْ مقامے داریت، زانت ءُْ پدا اے ہم مار اِت کہ پوسٹ ماڈرن سرمایہ داریت انسان ء ِ ضرورت اِنت۔ بلے اے سِہمی نکتہ ماوتی راجمان ء ِ نگاہ ءَ چار اِتگ۔ مئے راجمان یا دودمان (ربیت) کہ ساری ء َ نسلیت ء ِ بنیاد ء َ محکم بوتگ۔

پدا نیشنل ازم ء ِ کیٹاگوریکل امپیریٹیو رنگ ء َ اتکگ (کہ ہما زمانگ ء ِ سرمایہ دارانہ بیان اَت)۔ چو کہ نی سرمایہ داریت ء َ ہم وتی بیان (ٹونی بلئر) ء ِ زبان ء َ بدل کْتگ ءُْ انسان ء ِ ہما مخصوصیں تصور ءُْ مقام چیلنج کْتگ اَنت چہ ایشی ء َ آئی ء ِ زوال بوتگ ءُْ یک نوکیں دودمانے (بوڈریلارڈ) ء ِ زبان ء َ اے وڑا بام ء َ اتکگ۔

اگاں نیشنل ازم ء َ دودمان ء ِ بنیاد ء َ بچاریں گڑا نیشنل ازم ء ِ دودمان ء ِ زوال ء ِ سبب ساخت ء ِ گورا نیشنل ازم ء ِ پجار ء ِ بوہگ اِنت۔ آ نیشنل ازم ء ِ اَنچیں پجارے اڑ کنت کہ ایدگہ مْچی ء ِ شکل ء َ ہستیں وجوداں ایشی ء ِ ہمراہی ء َ وتی پجار ء ِ ہلاسی سما بیت۔ پجار ء ِ ہلاس بوہگ یک جیڑہ یے کہ ایشی ء ِ پاد آہگ نیچرل اِنت۔

نیشنل ازم بْن اصل ء َپجار ء ِ جنگ اِنت۔ ایدگہ مْچیّانی تہا ہلاسی ء ِ تْرس بوہگ نیشنل ازم ء ِ زوال ء ِ نام اِنت ءُْ اے بنیاد ء َ زمانی بدلی یا کَزا پمیشکا بیت کہ نیشنل ازم ہڑدہمی و نوزدہمی کرن ء ِ چیزے بلے ما ایشی ء ِ بنیاد ء َ وتی کْلیں راجدپتر ء َ بیان کنیں کہ مئے ہست بوہگ ءَ ماڈرن دنیا ء ِ جتاہیں وڑے ء َ دلبڈی دئیگ ءُْ مئے حق ء َ ہم گپے بہ بیت۔