تہران /کوئٹہ : پاک ایران بارٹر ٹریڈ (Barter Trade) معاہدے پر دستخط ہو گئے ہیں، معاہدے پر گزشتہ روز ایران کے شہر تہران میں پاک ایران جوائنٹ ٹریڈ کمیٹی کے نویں اجلاس کے اختتامی سیشن میں ایوان صنعت و تجارت کوئٹہ بلوچستان کے صدر فدا حسین دشتی اور زاہدان چیمبر آف کامرس اینڈ انڈسٹری کے صدر عبدالحکیم ریگی نے دستخط کئے اس کے علاوہ وزیر اعظم پاکستان عمران خان کے مشیر تجارت عبدالرزاق داد اور ایرانی ہم منصب نے بھی تجارتی معاہدے پر دستخط کئے۔

اس موقع پر میڈیا سے بات چیت کرتے ہوئے وفاقی مشیر تجارت عبدالرزاق داد کا کہنا تھا کہ ان کی ایران آمد باعث فخر ہے ہم اپنے برادر اسلامی ملک ایران کے ساتھ بہتر تجارتی تعلقات کے خواہاں ہیں جوائنٹ ٹریڈ کمیٹی کا نواں اجلاس بھی اس سلسلے میں سنگ میل ثابت ہوگا،انہوں نے کہا کہ اگلے تین مہینوں میں ایران کے ساتھ تجارتی تعلقات میں مزید بہتری کیلئے ترجیحی بنیادوں پر کام کیا جائے گا انہوں نے کہا کہ جوائنٹ ٹریڈ کمیٹی کے نویں سیشن میں دوطرفہ تجارتی تعلقات کو مزید مستحکم کرنے کے لیے تفصیلی غور و خوض کیا گیا اور دوطرفہ تجارتی اہداف کے حصول کے لیے مختلف تجاویز زیر غور لائی گئی۔اس موقع پر چیمبر آف کامرس اینڈ انڈسٹری کوئٹہ بلوچستان کے صدر فدا حسین دشتی اور سنیئر نائب صدر محمد ایوب مریانی کا کہنا تھا کہ جوائنٹ ٹریڈ کمیٹی کے نویں سیشن کے دوطرفہ کاروباری تعلقات پر انتہائی مثبت اثرات مرتب ہوں گے ہم ایران حکومت اور تجارت پیشہ افراد کی بھر پور مہمان نوازی پر شکر گزار ہیں۔

انہوں نے کہا کہ چیمبر آف کامرس اینڈ انڈسٹری کوئٹہ بلوچستان کے وفد نے صوبے اور ملک کی صنعت و تجارت سے وابستہ افراد کی بھر پور انداز میں نمائندگی کا فریضہ بخوبی نبھایا ہے بلکہ اس سلسلے میں مستقبل میں بھی کوئی لمحہ فروگزاشت نہیں کیا جائے گا، انہوں نے کہا کہ چیمبر آف کامرس اینڈ انڈسٹری کوئٹہ بلوچستان ہمسائیہ ممالک کے ساتھ مستحکم کاروباری تعلقات کے فروغ کیلئے روز اول سے ہی کوشاں ہیں بلکہ اس سلسلے میں ہمارا حکومت کو ہر ممکن تعاون بھی حاصل رہے گا۔انہوں نے کہاکہ صنعت و تجارت کے فروغ سے ہی ملک اور صوبے کی معیشت میں بہتری لائی جاسکتی ہے اوربے روزگاری کی عفریت پر بھی قابو پایا جا سکتا ہے۔انہوں نے کہاکہ بارٹر ٹریڈ معاہدہ سنگ میل ثابت ہو گا یہ دوطرفہ تجارتی اہداف کے حصول میں بھی معاون ثابت ہو گا۔