گوادر : گلاب سمندری طوفان کے متاثرین کی اشک شوئی کی جائے۔طوفان سے ہماری کشتیاں سمندر برد ہوگئیں۔متعلقہ اداروں کی جانب سے سروے کے باوجود تاحال مالی امداد نہ ہونے سے متاثرین ذہنی کوفت کا شکار ہیں۔
وزیر اعلیٰ بلوچستان فوری طور پر ریلیف پیکجز کا اعلان کرے۔متاثرین۔ گلاب سمندری طوفان کے متاثرہ ماہیگیروں پر مشتمل ایک وفد نے گوادر کے صحافیوں سے ملاقات کرکے اپنے حالت زار بیان کرتے ہوئے بتایا کہ حالیہ گلاب سمندری طوفان میں ان کی کشتیاں معہ جال انجن،اور آلات مائیگیری سمندر برد ہوگئیں جس سے انھیں لاکھوں روپے مالیت کا نقصان ہوا۔انھوں نے بتایا کہ ان کی روزی روٹی کا واحد ذریعہ یہی کشتیاں تھیں۔
جن کے اب نہ ہونے سے انھیں اور ان کے بچوں کو فاقوں کا سامنا ہے۔انھوں نے کہا کہ محکمہ فشریز اور ضلعی انتظامیہ کی جانب سے گلاب سمندری طوفان کی متاثرین کی نقصانات کا ازالہ کرنے کے لیے باقاعدہ سروے کیا گیا۔ مگر سروے کے باوجود ابھی تک متاثرین کی کسی طرح کی اشک شوئی اور مالی امداد نہیں کی گئی۔جس سے ان کی پریشانیوں میں مزید اضافہ ہورہا ہے۔
انھوں نے ضلعی انتظامیہ،محکمہ فشریز اور وزیر اعلیٰ بلوچستان قدوس بزنجو سے مطالبہ کیا کہ گلاب سمندری طوفان کے متاثرہ ماہیگیروں کے لیے فوری طور پر ریلیف پیکجز کا اعلان کیا جائے۔