پسنی : اصل آفت ذدہ ایم پی ایز اور بلوچستان کی بیوروکریسی ہے۔ ضلع بھر میں ترقی کے نام پر 170 ارب روپے خرچ ہونے کے باوجود نکاسی آب کا نظام موجود نہیں ۔ 30 سالہ کرپشن،بد انتظامی، بندر بانٹ اور وسائل کی لوٹ کھسوٹ کے لیے شفاف تحقیقات کے لیے کمیشن بنائی جائے. منتخب نمائندوں نے ڈیفنس میں بنگلے بنائے ہیں جبکہ ہماری ماؤں،بہنوں کے سروں پر چھت میسر نہیں ہے۔

وہ اپنے گھروں میں سکون کی نیند سے خوفزدہ ہیں۔بلوچستان کو حق دو تحریک کے سربراہ مولانا ہدایت الرحمان بلوچ کا پسنی پریس کلب میں پریس کانفرنس تفصیلات کے مطابق بلوچستان کو حق دو تحریک کے سربراہ مولانا ہدایت الرحمان نے پسنی پریس کلب میں پریس کانفرنس سے خطاب کوتے ہوئے کہا کہ بارش خدا کی رحمت ہوتی ہے جبکہ ہمارے پاس بدانتظامی، نکاسی آب کا نظام نہ ہونے کی وجہ سے علاقوں میں نقصانات کا سبب بنتا ہے۔انہوں نے کہا کہ اس جدید دور میں نکاسی آب کا نہ ہونا 30 سال سے ہمارے اوپر مسلط کردہ نمائندوں کی ناکامی ہے اور جس ٹولے نے یہ حالت پیدا کیے ہیں انھیں اللہ اور قوم سے معافی مانگنی چاہیے۔ انہوں نے کہا ضلع گوادر پر براجمان کرپٹ ٹولہ نے ڈیفنس اور اسلام آباد میں بنگلے بنائے ہیں اور ہماری ماوں ، بہنوں کے سروں پر آج چھت نہیں ہے جو بارشوں میں خوف کے مارے اپنے گھروں میں سکون کی نیند سے خوفزدہ ہیں۔

انہوں نے کہا علاقے کو آفت زدہ قرار دینے کا مقصد راشن مہیا کرنا نہیں ہے بلکہ جن لوگوں کے گھر گر گئے ہیں انکے گھر بنائی جائیں اور جن کے بندات ٹوٹے ہیں انکے بندات تعمیر کئے جائیں۔ نقصانات کا شفاف طریقے سے سروے کیا جائے اور انھیں پبلک کیا جائے تاکہ غریبوں کی جگہ منتخب نمائندے اپنے ناراض ارکان کو نہ نوازیں۔ انہوں نے کہا کہ امدادی سامان کے وقت بلوچستان حق دو تحریک کے کارکنان بھی انکی نگرانی کریں گے تاکہ مستحق افراد کے حقوق پر ڈاکہ نہ ڈالی جائے دریں اثناء مولانا ہدایت الرحمان بلوچ نے پسنی پریس کلب کے سامنے احتجاج پر بیٹھے میونسپل کمیٹی پسنی کے ڈیلی ویجز ملازمین سے اظہارِ یکجہتی کرتے ہوئے کہا کہ یہاں کرپشن کی آزادی ہے جبکہ میونسپل کمیٹی کے ملازمین جو چھ دن سے دھرنے پر بیٹھے ہیں جنکی تنخواہیں بند ہیں جو 16 سالوں سے اپنے مستقلی کے منتظر ہیں جنہوں نے شہر بھر کی صفائی کا بیڑا اٹھایا ہے۔ انکی مستقلی اور تنخواہوں کی ادائیگی ان کا قانونی حق ہے اگر اس متعلق اقدامات نہیں اٹھائے گئے تو ان کوساتھ لے کر احتجاج کریں گے۔