امریکا میں مسلح شخص نے فائرنگ کرکے پانچ افراد کو ہلاک کردیا، مرنے والوں میں پولیس اہلکار بھی شامل ہے۔

امریکی ذرائع ابلاغ سے جاری رپورٹس کے مطابق واقعہ امریکی ریاست نارتھ کیرولینا میں پیش آیا، جہاں جمعرات 13 اکتوبر کو مسلح شخص نے فائرنگ کرکے موقع پر ہی 5 افراد کو قتل کردیا۔

واقعہ کی اطلاع فوری طور پر پولیس کو دی گئی، جس کے بعد مسلح شخص کو آلہ قتل سمیت حراست میں لے لیا گیا ہے۔

فائرنگ سے پولیس اہلکار سمیت تین افراد زخمی بھی ہوئے، جنھیں فوری طبی امداد کیلئے اسپتال منتقل کردیا گیا۔ پولیس حکام کے مطابق فائرنگ کرنے والا سفید فام نوجوان ہے، واقعےکی مزید تفتیش کررہے ہیں۔

قانون نافذ کرنے والے اہلکاروں کے مطابق حملہ آور کم عمر ہے، جس نے نیویوز ریور کے قریب فائرنگ کرکے لوگوں کو ہلاک کیا۔ حکام کی جانب سے حملہ آور سے متعلق مزید تفصیلات جاری نہیں کی گئی ہیں۔