دوحہ :  قطر میں جاری فیفا ورلڈکپ میں نیدلینڈز اور سینیگال کی ٹیم نے اپنے، اپنے میچز جیت کر پری کوارٹرفائنل میں جگہ بنالی۔تفصیلات کے مطابق نیدرلینڈز نے قطر کو شکست دے کر ایونٹ سے باہر کر دیا۔البیت اسٹیڈیم میں کھیلے گئے میگا ایونٹ کے 34 ویں میچ میں نیدرلینڈز نے قطر کو 0-2 سے شکست دے دی۔ نیدر لینڈز کی جانب سے کوڈی گیپکو نے 26 ویں منٹ میں پہلا گول اسکور کرتے ہوئے ٹیم کو برتری دلائی جس کو فرینک دی جونگ نے 49 ویں منٹ میں دْگنا کر دیا۔

گروپ اے میں 7 پوائٹس کے ساتھ سرِ فہرست نیدرلینڈز کی ٹیم ناک آؤٹ راؤنڈ کے لیے کوالیفائی کر گئی۔ ایک اور میچ میں سینیگال نے اِیکواڈور کو شکست دے کر ناک آؤٹ مرحلے میں رسائی حاصل کرلی۔خلفیہ انٹرنیشنل اسٹیڈیم میں کھیلے گئے میگا ایونٹ کے 33 ویں میچ میں سینیگال نے اِیکواڈور کو 1 کے مقابلے میں 2 گول سے شکست دے دی۔

سینیگال کی جانب سے اسماعیلا سار نے 44 ویں منٹ میں پینلٹی پر گول اسکور کرتے ہوئے ٹیم کو برتری دلائی جس کو اِیکواڈور کے موئسز کائسیڈو نے 67 ویں منٹ میں برابر کر دیا۔70 ویں منٹ میں کالِیڈو کولیبالی نے دوسرا گول اسکور کر کے سینیگال کو ایک بار پھر برتری دلائی جو میچ ختم ہونے تک برقرار رہی۔ گروپ اے کے پوائنٹس ٹیبل پر دوسری پوزیشن پر موجود سینیگال نے نیدرلینڈز کے بعد ناک آؤٹ مرحلے میں رسائی حاصل کرلی۔