بلوچی اکیڈمی ءِ چئرمین سنگت رفیق ءَ گوں اقبال اکیڈمی پاکستان ءِ ڈائریکٹر رؤف رفیقی ءَ گند ءُ نند کتگ ، دوئیں سروکاں زانشتی ءُ لبزانکی کاراں ہمکاری ءِ واہگ پدّر کتگ۔
دیوان ءَ بلوچی اکیڈمی ءِ وائس چئرمین ہیبتان عمر ، سکریٹری جنرل ڈاکٹر بیزن سبا ، فنانس سکریٹری ظاہر جان جمالدینی ءُ ایگزیکٹیو باڈی ءِ باسک ہم ساڑی بوتگ انت۔
بلوچی زبان ءُ لبزانک ءِ دیمروئی ءَ بلوچی اکیڈمی ءِ کرد ءَ ساڑاہان ءَ ڈاکٹر رؤف رفیقی ءَ گوٛشتگ کہ بلوچی زبان ءَ بازیں زانشتی ءُ ساچشتی کتاب چھاپ بوتگ انت کہ آہانی تہا علامہ اقبال ءِ فلسفہ ہم بحث ءُ ترٛان کنگ بوتگ ءُ بلوچی شاعری ءَ اقبال ءِ فلسفہ ہم گندگ بیت، بلوچستان ءِ یونیورسٹی آں اقبال وانینگ بیت ۔ بلوچستان ءَ علامہ اقبال ءِ زانت ءُ فلسفہ ءَ شنگ ءُ تالان کنگ المی انت کہ ورنائیں شاعر ءُ نبشتہ کار چہ آئی ءِ فکر ءُ فلسفہ ءَ سرپد بہ بنت۔
بلوچی اکیڈمی ءِ چئرمین سنگت رفیق ءَ گوٛشتگ کہ بلوچی زبانءَ ساچشتی ءُ پولکاری کاراں گہتری اتکگ ، شاعر ءُ نبشتہ کار ہر وڑیں بنگپاں وتی ساچشتانی تہا آرگ ءَ انت۔ اے بابت ءَ المی انت کہ وفاقی ءُ دود ءُ ربیدگی ادارہ گوں بلوچستان ءِ ادارہاں نزیکی ءُ ہمگرنچی آں گیش بہ کن انت۔
سنگت رفیق ءُ ڈاکٹر رفیقی ءَ وت ماں وتی تعاون ءُ کاراں گیشی آرگ ءِ واہگ درشان کتگ۔
منتوار:آساپ