شیخ حمد رجانکاری داد یک میان اوستمانی رجانکاری دادے کہ چہ قطر سرکار ءِ نیمگءَ ماں دنیاءِ دگہ دگر زباناں چہ عربی زبانءَ رجانک کتگیں کتابانی رجانکاری ءِسرا دیگ بیت-

اے داد ءِ بنگیج 2015ءَ چہ قطر سرکار ءِ نیمگءَ بوتگ ءُ ہمک سال دنیاءِ جتا جتائیں زبان پہ اے داد ءَ گچین کنگ بنت ءُ ہما زبانءِ ادارہءُ لبزانکارءُ نبشتہ کارءُ پولکار لوٹائنگ بنت ءُ کارانی سرا یک مراگشے بیت مراگشءَ ہما زبانءِ ندکارءُ زانتکار بہر زورانت ءُ ماں وتی زبانءَ عربی کتابانی رجانکاری ءِ کارءُ ہمازبانءِ گوں عربی زبانءَ نزیکیءُ ہمے پیمیں بنگپانی سرا تران کنگ بیت۔

ایدگہ زبانانی پیمءَ سال 2024ءَ دنیاءِ ایدگہ زبانانی ہمرائیءَ بلوچی زبان ہوں پہ اے دادءَ گچین کنگ بوت ءُ گوں بلوچی زبانءِ لبزانکارءُ نبشتہ کاراں اے گلءِ کار داراں حال ءُ احوال کت ءُ اے درگتءَ یک مراگشے ہم کنگ بوت۔ مراگش ماں قطرءَ بؤگی ات بلے لہتیں جاورانی سوبءَ اے گلءَ اے مراگش آنلائن کت ءُ نبشتہ کاراں عربیءُ بلوچی زبانءِ نزیکی،بن دفتر ءُ بلوچی زبانءَ عربیءَ بوتگیں رجانکی کار ءُ ادارہانی کردءُ چھاپ بوتگیں ساچینک، ساچشتءُ کتابانی بابتءَ تران کنگ بوت ۔اے مراگش انگت شمارا پہ گوش دارگءَ ماں حمد جائزۃ للترجمۃ قطرءِ فیسبک تاکءُ ویب سائیٹءَ دست کپیت۔

اے مراگشءَ بلوچی زبانءِ نیمگءَ نامداریں نبشتہ کارءُ رجانکار حافظ عطا آسکانی کہ آئیءَ بلوچی شعری دریانی سرا یک مزنیں علمیءُ لبزانکی کارے کتگءُ لچہءُ سنگءِ دروشمءَ دیمءَ آؤرتگ۔ ایشیءَ ابید آئیءَ یک ادارہے ٹہینتگ “زامران پبلیکشن مکران ‘نامءَ کہ اے ادارگءِ مولءُ مراد عربیءَ ایدگہ زبانانی کتاباں بلوچیءَ رجینگءُ چھاپگ انت ءُ بحت ایش انت کہ کسانیں وہدےءَ اے ادارہءَ میاں اوستمانی داد وتی نامءَ کتگ ،ڈاکٹر علی جان بلوچ (مدینہ یونیورسٹی سعودی عربءَ ماں اسلامک لاءَ ماسٹرے کتگءُ اے وہدءَ ماں اسلامک یونیورسٹی اسلام آبادءَ پی ایچ ڈی کنگءِ ہمرائیءَ بلوچی زبانءَ عربیءِ کتاباں رجینگءَ انت گیشتر دینی کتاب ہوار انت) ضیاء بلوچ کہ بلوچی زبانءَ ابید عربیءُ ایدگہ زباناں آئیءَ مہارت است ءُ یک منّتگیں زبان زانتے کہ آئیءَ بلوچی زبانءَ بلوچی ریشّگ زانتی،راست نبیسّگءُ وندءُ چسپال نامیں علمی مڑی بلوچیءَ بخشاتگ انت۔اسداللہ امیر الحسنی کہ بندرءَ بلوچستانءِ دمگ قلاتءَ جہمنندانت ءُ آئیءَ بلوچیءِ اولی گدار نازک کہ واجہ سید ہاشمیءَ نبشتگ ،ماں بلوچیءَ عربیءَ رجینتگءُ نامداریں اردو آزمانکار عابد میرءِ اردو کسہ ماں عربیءَ رجینتگ انت،مولوی عبدالحکیم بلوچ کہ روکپتی بلوچستانءِ نامداریں دینی زانوگرے،مولانا سیف اللہ تگرانی کہ آئیءَ حدیثانی نامداریں کتاب صحیح مسلم شریفءِ رجانک کتگ ءُ مدینہ یونیورسٹی ءِ شاہ دربرجاہءَ دراتکگیں علمی استی ئے۔ ایشاں ابید نامداریں نبشتہ کار شاہین البلوشیءَ اے مراگشءَ بہر زرتگ ءَ تران کتگ-

اے مراگش ماں عربی زبانءَ بوتگ ءُ بہر زوروکاں ماں عربی زبانءَ وتی نبشتانک ونتگ انت-

مراگشءَ پد ہمک ادارہءُ نبشتہ کارءَ گوشگ بوتگ کہ وتی رجینتگءُ چھاپ کتگیں کاراں پہ شیخ حمد جائزۃ قطرءَ دیم بدانت کار چارگءُ تپّاسگ بنت اے درگت ءَ بازیں بلوچ ندکارءُ چھاپکاراں وتی کتاب روان داتگ انت۔
بحت ایش انت کہ اے دادءِ واستہ حافظ عطا آسکانیءِ ادارہ “زامران پبلیکیشن مکران”ءِ کار ساڑاہگ بوتگ انت ءُ بلوچی زبانءِ داد ہمائیءَ دیگ بوتگ-

شیخ حمد رجانکی داد کمیٹیءِ نیمگءَ ماں قطرءِ دار الحکومت دوحہءَ اے دیوان گوستگیں روچاں برجم دارگ بوت ءُ چہ دگہ دگہ زباناں پہ دادءَ گچین بوتگیں ندکارءُ ادارہانی سرکماش لوٹائنگ بوت انت ءُ داد دیگ بوت۔

بلوچی زبانءِ جہگیری ماں اے مراگشءَ حافظ عطا آسکانی ءُ ڈاکٹر علی جان بلوچءَ کت-

حافظ عطا آسکانی نامداریں دینی زانوگر واجہ مولانا عبدالغفار زامرانی رحمہ اللہءِ مستریں بچّ انت،حافظ عطا آسکانی ذہینءُ سرپدیں ورنائےءَ ابید دینءُ لبزانکءِ دل پہکءُ مہکمیں جہدکارے ہمے امیت انت کہ آ پہ بلوچ راجءُ بلوچی زبانءَ شریں رنگےءَ وتی جہداں برجاہ دارایت۔

ہمے پیمءَ ڈاکٹر علی جان بلوچ ہوں ہمے کہولءِ علمی زانوگراں یکے کہ مدینہءَ وتی علمی سپرے سرجم کتگ ءُ بلوچی زبانءَ ہوار دینی مسلہءُ جیڑہانی سرا آئیءَ دزرس است امیت انت کہ وتی راجءُ چاگردءَ فائدہ دنت-

اے داد پہ بلوچءُ بلوچی زبانءَ یک جوانیں ٹیکی ئے ءُ زبانءِ زندگ دارگءُ دیمءَ روگءِ یک گامے۔ امیت انت کہ مئے لبزانکار،نبشتہ کارءُ ادارہ گیش پہ زبانءِ دیمروئیءَ وتی واگاں ترند کن انت ءُ جنزان بنت ءُ پہ زبانءُ لبزانکءَ حذمت کنوکیں ہمک پڑا جہد کنوکیں جہدکارءُ نبشتہ کارانی جہد ءَ دلبڈی دینت-