زانتکارانی حیال ہمیش اِنت کہ چہ شامءَ پد نوکیں سال 2025ء وتی ہمبرائیءَ ایرانءِ نمبرءَ کاریت۔ گُوش اَنت کہ دیمترا نمبر پاکستانءِ کیت البت اے ہم گوش اَنت کہ پاکستان کُوہنیں وفادارءُ ہمکارے، وتارا گوپچالاں نه دنت۔

اِے جاگہءَ بدواہ پہ تژن ءُ شگانءَ چوش ہم گوش انت کہ کِراہکارےءِ بستارءَ وتارا چہ نمبرءَ دَر کُت کنت ءُ پرے کار ءَ الّم ہم نہ اِنت کہ پاکستان وتارا جمہوری مُلکے ءِ دُروشُم ءَ برجمءُ مُحکم بہ کنت بزاں مالیءُ علمی صورتءَ نیزگاری ءُ پدمنتگی ءِ دورءَ حلاس بہ کنت ءُ وش حالیں ہند ےءِ واجہ ءُ واہند یا سیاسی صورتءَ مضبوط ءُ توانا بہ بیت اے ہم کہ بزّگیں عوامءِ حقءُ اختیارانی پرواہءَ بہ کنت یا اے نیمگ ءَ دلگوش به کنت اَنچو کہ پیسرا شاہینانی چَنگُلاں بوتگ ءُ ملکءِ رعیت اِمروز ءِ تماہ ءُ لِزتّاں زِبہر بوتگ، ہما پیما بہ بیت، ہم قابلِ قبول بوت کنت۔

البت پرے مقصدءَ الّمی اِنت کہ پاکستان اسرائیل ءُ امریکہ ءِ کمے کار ءُ ذمہ داریاں پُورا بہ کنت ،چرے ذمہ داریاں اوّلی ہمیش اِنت کہ پاکستان سیٹو ءُ سنٹوئے دورءِ بزاں امریکہ ءُ روسءِ سرد جنگءِ زمانگءِ وڈا ایرانءَ امریکہ ءُ اسرائیلءِ ہمدردیں سرکارے آرگءِ بند و بستءِ جُہد و کوشستءَ گوں ہمکار بہ بیت۔ ایرانءِ حلاپءَ جاسوسی ئےءِ اڈہ ئے بہ بیت ءُ ضرورتانی وھدءَ پہ جنگی مقصدانی حاترا ایرانءِ صلاحءُ ازبابانی سرا حملہے ءِ اجازتءَ بِدنت، دومی اے کہ چو روسءُ افغانیانی جنگءِ دورءِ وڑا امریکہ ءُ اسرائیلءِ مردماں بِلیت کہ آ ایرانءِ حلاپءَ جنگءِ حاترا ماں پاکستانءَ پہ وتا جاگہ ءُ موچکین جوڑ بہ کن انت ءُ جنگ به کن انت دانکہ ایرانءَ اسرائیلءُ امریکہ ءِ ہم دستیں سرکارے دیما آرگ ءُ محکم کنگ بہ بیت ۔

دومی ذمہ داری ہمے بوت کنت کہ امریکہ دنیاءِ کماشءِ بستارءَ بگندے افغان طالباناں وتی کم شرپیءُ سُبکّی ءِ بیرءُ بدلءَ بہ گیپت اِے درگتءَ گیر آرگ بہ بیت کہ امریکہ افغانستانءَ وتی سُبکّی ، کم شرپی ، ناکامی ءُ تاوانءِ ذمہ داریءَ چَہ طالباناں دو گام دیماتر پاکستانءِ حاکمانی دوتلءُ دو پوستیں پالیسی ءُ کردءَ سرپد بیت کہ یک نیمگےءَ امریکہ ءِ ہمبراہ ءُ دومی نیمگءَ افغانستانءِ طالبانانی ہمدرد ، ہمفگر ءُ کُمکار بوتگ اَنت اے بابتءَ دفاعی میدانءِ زانتکارءُ کوّاسیں صحافی ہم ہمے گوش اَنت کہ امریکہ افغانستانءَ وتی ناکامی ءِ ذمہ دار چَہ طالباناں گیش پاکستانءَ سرپد بیت۔

دیمترا آہانی گوشگ انت کہ امریکہ طالبانانی حکومتءَ سالےءَ شش ءُ ہفت ارب ڈالر مفتءَ پہ انسانی ہمدردی ءِ نامءَ کُمک دیگءَ انت اِدا ہمے انسانی ہمدردیءُ مفتیں کمکءِ لبزاں ہچ معنا نیست انسانی ہمدردیءُ مفتءِ جاگہءَ مردم گوشت کنت کہ امریکہ کمک پرے حاترا دیّگءَ اِنت کہ طالبان امریکہءِ بگیر ءُ بدواہ مہ بنت ءُ ضرورتانی وہدا کارمرز کنگ بہ بنت ۔

پاکستانی زانتکار گوش انت کہ پاکستانءِ تہا ٹی ٹی پی ءُ بلوچ سرمچارانی کاراں دیما بکنئے او بچارئے گڑا پاکستانءُ چینءِ ابَد مانیں دوستی ءِ حلاپءَ ءُ سی پیک ءِ ناکام کنگءِ حاترا ایشانی کردءُ کار امریکہ ءِ گریٹ گیمءِ بہرے گندگ بیت پدا اے ہم کہ اے گیمءِ توکءَ ہندوستان سر ظاہرءَہوار انت ہمے ذوتءَ اماراتءَ ہندوستانءُ افغانستانءِ دری کارانی وزیرانی ملاقاتءِ بوتگ ۔

گمان ہمیش اِنت کہ اماراتءُ سعودی عربءِ جند ہم چیروکائیءَ اے گیمءِ بہرےءِ اَنت ، چوش ہم گوشگ بیت کہ ایران ہم اے گیمءِ بہرے ۔اے درگتءَ دلیل ہمے دیّگ بیت کہ گوادر پورٹءُ سی پیکءِ منصوبہءَ ایرانءِ چابہار پورٹ اثرمند بیت ءُ چَہ سی پیکءَ واخان کوریڈور متاثر بیت یک نیمگےءَ پاکستان چہ وتی تہی گِروکشءُ جنجالاں گیش نہ اِنت پدا پاکستانءِ پشتونءُ افغانی ہم ڈیورنڈ لائنءَ سرحدے منّگءَ تیار نہ اَنت وہدیکہ دومی نیمگءَ رپورٹ ہمیش اَنت کہ پاکستان واخانءِ سرا قبضہ کنگ لوٹیت یا افغانستانءِ طالبانانی دشمن ناردن الائنسءَ گوں کمک کنگ لوٹیت دانکہ سی پیک ءُ پاکستانءَ ٹی ٹی پی ءِ حملہانی جوابءَ واخان کوریڈورءُ افغانستان متاثر بہ بنت پرے مقصدءَ سر کنگءِ واستا پاکستان ءِ منصبدارےءَ ہمے ذوتءَ تاجکستانءِ دورہ ےءِ کتگءُ تاجکستانءَ نندوکیں ناردن الائنسءِ سروکاں گوں ملاقاتئےکتگ۔اے درگتءَ عجبیں جاور حالے پیداک بوتگ کہ پاکستان یک نیمگےءَ ایوکءُ تہنا گندگ بیت وہدے کہ دومی نیمگءَ امریکہءَ بگر تا عربءُ ہندوستانءَ دراہ پاکستانءِ حلاپءَ گِندگ بنت۔اے درگت ءَ چین ہم پاکستانءِ سرا وش وش نہ اِنت کہ پاکستانءَ مردم ئے جنگ بوتگ اَنت (دوست ناراض انت حُدا حیر بہ کنت ).

گپ ایش انت کہ افغانستانءَ بیر گرگءِ واستا امریکہءَ پاکستانءِ ضرورت کپیت کہ امریکہ ءِ مردماں جاگہ بدنت ءُ گوں آہاں کمک بہ کنت چریشاں ابید داعشءُ القائدہءَ ( اِدا بژنءِ حبر ایش اِنت کہ افغانستان ہم اے دوئیں تنظیماں گوں کمک کنگءِ الزامءَ پاکستانءِ سرا جَنت ) پروش دیّگءُ نزورتر یا حلاس کنگءِ حاترا ہم امریکہءَ پاکستان ءِ کمک درکار اِنت دانکہ اے تنظیم اسرائیلءُ امریکہءِ حلاپءَ کاروائی یا جُہد کنگءِ قابل مہ بنت امریکہ اے ہم لوٹیت کہ پاکستان ابراہَم معاہدہ (اِکارڈ) ءَ بِہ منّیت ءُ اسرائیلءَ قبول بہ کنت۔

امریکہ اے واہگءَ ہم داریت کہ پاکستان گوں ہندوستانءَوتی تعلقاتاں محکم بہ کنت ءُ کشمیرءِ سوالءَ ویل بہ کنت یا اے کہ کشمیرءِ جنجال دوئیں ملکانی کاروبارءُ تجارتءِ دیما رکاوٹئے ءِ دروشم ءَ مہ زُوریتءُ گوں ہندوستانءَ وتی تعلقاتاں حراب مہ کنت۔

بُرز ءِ حبر وتی جاگہ اہمیت دارنت بلے چرے دُرستاں گیش امریکہ ءِ دلءِ مستریں حبر ہمیش اِنت کہ پاکستان چینءَ چَہ گوادرءَ دُور بداریت دانکہ چین آزاد یا سرمایہ دار دنیاءِ تیلءَ بگر تہ کاروبار ءُ بیپار(تجارت)ءِ راہءُ راہسراں دُورءُ دَر بہ بیت. اے کارانی بدلءَ امریکہ پاکستانءَ کمک دنتءُ آئی ایم ایفءِ وامانی ضامن بیت کہ پاکستانءَ رس اَنت ءُ پاکستان دیوالیہ نہ بیت ءُ بلاہیں جنجالےءَ نہ کپیت۔

اگاں پاکستان اے گپّاں مہ زوریت ءُ اَڈی بہ کنت گڑا بوت کنت کہ چَہ ایرانءَ پد پاکستانءِ نمبر بہ بیت بلے اوّل وا ایش کہ اے دورءَ نِزوریں ملک ءُ مردماں حبر نیست پدا ملکئے کہ وتی پالیسیانی غلطیءُ کمزوریانی سوبءَ پِنڈگ ءَ سر بہ بیت آ ملک تُری سُہر ءُ تلاہانی ہندءُ ہنکین یا صلاحءُ ازبابانی بابشتءَ مُہرءُ محکم بہ بیت ،آ ملکءَ کس حساب یا کِمار نہ کنت ۔

آئیءِ دولت ءُ صلاحہچ کارءَ نَیآ اَنت چو کہ وتی دور ءُ باریگءَ سوویت روس بوتگ ،دومی 9/11 ءَ پد ءِ امریکہ ءِ جنرل مشرفءَ فون کالءِ مثال ءَ دیما بکنئے ءُ بچارئے گڈا انسان ہمے آسرءَ سر بیت کہ پاکستانءِ حکمران چو کہ وتی نفءُ نقصءَ زان انت پرے حاترس زیادہ امکان بگندئے پکّائیں حبر ہمیش انت کہ پاکستان امریکہ ءِ گپءُ شرطاں منّیتءُ وتارا تاوان بار نہ کنائینیت۔

ادا اے حبرے بابتءَ زاننگ ہم المی انت کہ پاکستان پہ ہمے مقصدانی حاتراجوڑ کنگ بوتگ کہ اے وڑیں کاراں بہ کنت۔ آ زمانگءَ کہ پاکستان جوڑ بوتگ ڈاکٹر اشتیاق احمد ءِ گوشگ ہمیش انت کہ پاکستانءِ بانیانی مول ءُ مراد بس ہمے بوتگ کہ ہندوستان بہروبانگ کنگ بہ بیت کہ بگندئے گوں سوویت روسءِ ہم کمک بہ بیت ءُ سرمایہ دار دنیاءِ واستا جنجال ودی بہ کنت۔

آ دور ءَ دنیا دو کیمپانی تہا بہر بوتگ پہ پاکستانءِ جوڑ کنگءَ ہچ پارٹی ءُ تنظمےءَ چوشیں جہدے نہ کتگ نیکہ کسےءَ قربانی ئے داتگ کہ آئیءِ جُہدءُ کوشستءِ آسر ملکےءِ شکلءَ دربئیت مسلم لیگ اگاں کہ بوتگ بلے نزور ءُ ناتوانیں پارٹی ئے بوتگ ڈاکٹر اشتیاق احمد گوشیت کہ وہدے چہ جناحءَ پاکستان ءِ ملکےءِ بستارءَ وتارا دارگءِ بابتءَ جُست کنگ بیت کہ پاکستان وتارا چوں داریت گڈا جناح جواب دنت کہ پاکستان روسءُ امریکہءِ مفاداتانی درنیامی ملکے بیت، اے دیم یا آ دیم ءِ کمکءَ وتارا داریت ڈاکٹر اشتیاقءِ اے گپّاں دیما بکنئےءُ بچارئے گڑا مردم ہمے آسرا سر بیت کہ پاکستان تہی بزاں عوامءِ گوں حاکماں اختلافاتءُ تضاداتانی بنیادءَ جوڑ نبوتگ بگندئے اے بنیادءَجوڑ کنگ بوتگ کہ سپر پاورانی چوکیداریءَ بہ کنت ءُ وتارا بداریت ڈاکٹر اشتیاق چوش ہم گوشیت کہ جناح جمہوری سوچءُ پگر داروکیں سروکے نہ بوتگ آ گوشیت کہ جناحءِ ہمے پگرے اثر انت کہ پاکستانءَ جمہوریت پرے حالءَ سرگردان اِنت ءُ چہ کِشکءُ راہ ءَ گسر کپتگ پاکستان جمہوری راہءُ راہبنداں جوڑ نہ بوتگ اے حبر ملکءِ بِنداتی دورءَ چَہ سرحد( اے وہدے کے پی کے)ءُ سندھءِ سرکارانی زوریں بَدلیءُ بلوچستانءِ سرا زبردستی قبضہءَ ہم پَدّر بیت پدا اے ہم کہ قوم ءُ ملکاں سیاستدان محکم ، منظم ءُ جمہوری راہبندانی سرا رہادگ کن انت وہدے کہ پاکستانءِ پارلیمانی پارٹی ءُ سیاستدانانی حال چہ ہچ کسّءَ چیرءُاندر نہ انت چہ اے ملکءِ پارلیمانی پارٹیءُ سیاستدانانی تہا ہر کس جُہدءَ انت کہ مے نمائندہ ءُ امیدوار بھرتی کنگ بہ بنت وتی ظاہری گپ ءُ گالانی بنیادءَ پاکستانءَ مقتدرہ ءِ مخالفیں مستریں پارٹی عمران خان ءِ تحریکِ انصاف زانگ بیت بلے آ ہم ملک ءُ عوامءِ جاگہءَ مقتدرہ ءِ گوما نزیکی ءِ جُہدءَ انت ءُ کامیابی ءِ نشانی ءِ ظاہر بُوّان اَنت اے درستیں گپّانی معنا ہمیش انت کہ پاکستانءَ پارلیمانی ءُ جمہوری جُہدءَ ہچ معنا نیست نیکہ پارلیمانیءُ جمہوری جُہد آسرے کاریت وہدءِمفتیں زوالی ئے۔

پاکستانءَ جمہوریءُ پارلیمانی جہدءَ ملک ءُ عوام زندگ در گور کتگ انت البت اے وڑیں جُہد ءُ پارلیمنٹءِ برکتءُ آسر ءَ پارلیمانی سیاستدانانی جندءَ بِلّ، آہانی نوکرءُ کاردار ہم ھمنچو سیر ءُ آباد انَت کہ بازاری چُوٹ مَلّگ ہم میر،امیر ءُ معتبر اَنت کہ گام ہم تچکیءَ جت نہ کن انت