چمشانک
کتاب:کسمانُک ءُ بلوچی کسمانُک
(ازم، تاریخ ءُ گچینیں کسماُنک)
اے زانگی انت کہ کسمانُک نوکیں چیز ےنہ انت کسمانُک باز کوہنین ءُ قدیمیں ازمی تہرے بلے بلوچی لبزانک ءَ کسمانک ءَ ہم چو ایندگر تہراں دیمرؤئی نه کتگ ۔البت په بلوچی زبان ءَ کسمانک یا کسمانک ءِازم یک نوکیں گالبندے نہ انت بقول ءِ ہیبتان عمر ءَ بازیں انچیں گلاں انچین جہد کتگ کہ بلوچی کسمانُک ءَ دیمروئی گپتگ۔ اے درچ ءَ بازیں مردماں ہم جوانیں جہد کرتگ،چو کہ عاقل خان مینگل، بشیر احمد ، مٹھاخان مری، کریم دشتی، ءُ دگہ بازین انچیں نام انت کہ آہاں بلوچی زبان ءَ وت کسمانک نبشتہ کتگ ءُ دگر کسمانک نبشتہ کنگ ءِ سکین داتگ انت ۔پدا ہمے مردمانی ہمے کسمانک ریڈیو ءَ شنگ کنگ ءُ ٹی وی ءَ پیش دارگ بوتگ انت ۔
اے کتاب ءِ درگت ءَ واجہ ہیبتان عمر ءَ یک انچیں جہدے کتگ کہ بلوچی لبزانک ءَ مدام گیر آرگ بیت اے کتاب آئیءَ ہفتاد سال ءِ میانجی ءِ کسمانک نگاری ءِ سر ءَ نبشتہ کتگ کہ پہ بلوچی کسمانکانی بابت ءَ مزنیں سرپدی ئے اے گپ ءَ ہوار اے کتاب ءَ آئی ءَ دگہ راجانی لبزانکاں کسمانک نویسی ءِ بابت ءَ یک شوکین پولکاری ئے ہم کتگ ۔
کسمانک یک انچین تہرے کہ مدام گوں گپ ءُ رپاں جوڑبیت ۔
اے کتاب ءَ ہبیتان عمر ءَ گوشتگ کہ کسمانُک ءِ لہتین بہر انت چو کہ اسٹیج،کرداریاکارست،پلاٹ،گپ ءُ تران ۔بلے
کسمانک ءِ حاترا اسٹیج ءِ بوئگ لازمی انت ۔ کسمانک مزنین پراہ ءُ شاگین پٹے۔ اگاں چارگ به بیت گڑا کسمانک چه جتائیں کارستانی کمک جوڈ بیت انت ۔ بلوچ ءِ کسمانک کاری سک کوہن ءُ قدیم انت انچوشکہ بلوچ ءِ زبان۔
اے کتاب 2019ءَ چه بلوچی اکیڈمی ءِ نیمگ ءَ چھاپ بوتگ۔اے کتاب ءِ شری ایش انت کہ استادانی وڑا چھاپگ نه بوتگ کہ نبشتہ کار ءِ کھاتہ کتابے گیش به بیت بلکیں اے کتاب ءَ کسمانک ءِ سرا پٹ ءُ پولی کار کنگ بوتگ
اے کتاب ءِ درستی 10 در انت۔9 دراں نبشتہ کار ءَکسمانک ءِ بندات،بن دفتر پدا کسمانک ءِ ازم،دنیا ءِ ایندگہ زباناں کسمانک ءِ ربیت ءُ دیمروئی،پدا بلوچی کسمانک ءِ بندات ءُ دیمروئی ءِ سرا تران کتگ۔ دہومی در کتابیات انت۔اولی درا کسمانکءِ پجار ءُ آئی ءِ ازم ءِ سرا نبشتہ کنگ بوتگ۔دومی درا ایندگہ زبانانی کسمانک چارگ ءُ ٹپاسگ بوتگ۔ایندگہ دراں کسمانک ءِ تہر ءُ بہرانی سرا تران کنگ بوتگ گڑ سرا بلوچی کسمانک نویس ءُ آہانی کسمانکانی سرا چمشانک دیگ بوتگ ہمے درا کسمانکی کتابانی سرا ہم نگدی تران کنگ بوتگ۔اے کتاب ءِ بابت ءَ سنگت رفیق ءَ تران کتگ ءُ نبشتہ کتگ”بلوچی آزمانک یا گدار یا ایندگہ ساچینکی تہراں ڈرامہ اولی ات بلے بلوچی سرپدی ئیں لبزانتاں پشت جتءُ اے گوشت کہ نوکیں تب ءُ میئلاں نبشتہ کار لاچار کتگ بلے اے گپ سرپدی ئیں مردمانی تب ءَ نه کپت کہ ہرکس ءَ وتی جندءِ نزوری ءُلاچاری ءَرا وہد ءِ گردن ءَ تنچ ات ءُ ہکٌل ات بلکیں ہیبیتان عمر ءَ ہم تب نه بوتگ پمیشگہ آئیءَ جہدے کتگ کہ دنیا ٹیکنالوجی(تماہ ءُ واہگانی ناں !) ءَ چه آزمانک ءُ گدار ءَ سستگ ءُ ڈرامہ ءِ بلیک ہول ءَ دور داتگ”اگاں وانوک اے کتاب ءَ بوان انت آ نه تہنا کسمانک ءِ بن دفتر ءُ دیمروئی ءِ بابتءَ سرپد بنت بلکیں بلوچی کسمانک ءِ بندات ءُ دیمروئی ءِ بابتءَ ہم سر پد بنت ۔اے کتاب په بلوچی بی ایس،ایم فل ءُ پی ایچ ڈی کنوکاں اژدری انت