اے ملکءَ اگاں کسے واجہانی مردم یا ملکءِ واہُند ءُ حاکمانی چُکءُ فرزندءِ بِہ بیت گڑا اختلافءِ دارگ کسانیں گپے، تُری زاہ ءُ بَد بِہ کنت یا چوکءُ چار راہءَ بےہوشیءُ سرمستیءَ ناسرپدیں کار ءُ گپے بِہ کنت، ہم بخشگءُ برداشت کنگ بیت چو کہ جاوید چودہدری وتی وی لاگء٘ علی امین گندا پُورءِ ہڑتالانی دورءَ پنجابءِ انصافیاں ( تحریکِ انصاف) شِگان جنت ءُ گوشیت کہ پنجابءِ مردم تہنا وشیانی دورے ہمبراہ انت وہدے کہ سَکّیانی دور بیاینت پنجابءِ مردم دُور ءُ دَرءَ نندگءُ ندارگءِ چارگ زان انتءُ بس،ہاں! البت حبر اگاں ووٹءِ بِہ بیت گڑا ووٹ اے دورءَ انصافیاں دی اَنت۔ ہمے وڑیں گپّ نزیر ناجیءِ سُولیں بچ اَنیق ناجی ہم کنت ءُ گوشیت کہ رنجیت سنگھ ءُ بھگت سنگھءَ ابید پنجابیانی راج دفترءَ قربانی دیّگ، سَکّیاں برداشت کنگءُ گوں حاکماں دیم پہ دیمیءَ مِڑءُ جنگءِ “عیب” یا عنصر مان نسیت چدودیم ڈاکٹر اشتیاق احمدءَ ملکءِ جند ءُ بانیانی بابتءَ بازیں حبر جتگ ءُ نبشتہ کتگ اَنت کہ چاگردی رسانک در ءَشنگ ہم بوتگ اَنت بلے ایشاں کس دپی جستےنَہ کنت پرچہ کہ اے ملکءِ واہندہانی چُک ءُ وارث انت پرے حاترا چَہ اے حقّءُ راستیں حبراں دوگام دیماترءَ اگاں دروغ بہ بند انتءُ آپءِ تہا آس روک کنگءِ جُہدءَ بِہ کن اَنت پدا ہم ملکءِ حاکم وتی تبءُ مئیلءَ بدل نہ کن انت نیکہ گِلّہ ءُ زاری کن اَنت ۔چہ واجہانی جندءِچُکّاں ابید ایشانی نوکرءُ کاردار اِدا مردم چوش بُگوشیت کہ واجہانی پگری سنگتءُ ہمکار اگاں ملکءِ دفترءَ پچ یا تاک تاک بکن اَنت کسّ ئے ملامءُ بُلُم نہ کنت ،ایشیءِ سَوَب بوت کنت کہ ہمے بِہ بیت کہ اے ملکءِ رواج ہمیش اِنتءُ اِدے واجہانی جندءِ دپءِ گپ ءُ گال دِگر ءُ دلءِ حبرءُ حال دِگر اَنت بزاں کہ ایشانی باطنءُ ظاہر یک نَہ اَنت اے درگتءَ اگاں ما امریکہ دژمنیءِ مثالءَ دیمءَ بکنان ءُ بچاراں گڈا سر ظاہر ءَ اے ملکءِ حاکم ءُ واجہ امریکہءِ بدتریں مخالف ءُ بدواہ اَنت بلے تہءُ توکءَ بچارئے گڑا ہر انسان ہمے آسر ءَ سر بیت کہ اے ملکءِ حاکمانی ساہءُ نفس ہم چَہ امریکہ ءِ رضا ءَ ابید بال نہ کنت کہ اے وتی گڈی جاہ ءُ دَوار بُرؤ اَنت ءُ امروزءِ چِست ءُ ہیر ءُ جنجالاں بُہ چُٹ اَنت اے مئیلءُ حیالءَ چو کہ رواج زُرتگ پرے واستا مردم اے چیزءَ “بُروت حیل ءُ مہ روت عادت”ءِ بستارءَ سرپد بِہ بیت شرتر اِنت دانکہ کسےءَ دماغی بیماری ءُ بےبنیادیں جیڑگے سرءُ بحتءَ مہ کپیت ءُ ذہنی مریضے مہ بیت
اے گپّاں بیان کنگءِ مقصد ہمیش اِنت کہ یک بلوچ سروکےءَ ” تکانسریں زند “ءِ سر حالءَ کتابے نبشتہ کتگ۔ کتابءِ یک ءُ دو بابءِ نبشتانک من ونتگ اَنت دیمترے بابانی تہا بگندئے نگرہ بندیں گپ ءُ حیال مان بہ بیت کہ ورناہ آہانی بابتءَ نبشتہ بہ کن انت ءُ وتی دُرّیں حیالاں دَرشان بِہ کن انت ۔اِے جاگہءَ من اے حبرءَ ہچ چیر نہ دَیاں کہ من تا ہَست ءُ زندگاں اے سروکءِ عزتءَ کناں کہ چراہانی مجلس ءُ دیوانانی نندگ ءُ پادآہگءَ من بازیں گپءُ حبرئے در بُرتگ ۔اے تکءَ اگاں بچارئے گڑا واجہ ءِ عزت کنگ بلوچ چاگردءِ رواجانی حسابءَ منی سرا فرض بیت، البت گوں واجہ ءِ حیالءَ لیکہءَ تپاک کنگ یا نہ کنگ من بِباں یا دگرے بہ بیت، کسّی سرا لازم نہ اِنت ایشیءِ عقلی دلیلءُ سوب ہمیش اِنت کہ انسان دانکہ زندگ اِنت وانئیت ، نیٹورکاں کُوہنءُ نوکیں دورءِ زانتکارانی گپءُ حبراں گوشداریت ءُ وت ہم پگر کنت ءُ پہ وتا تچک تریں راہ ءُ در درگیجگءِ جُہدءُ کوشستءَ کنت، تاں جہان است اِنت علمءُ زانت یا پٹءُ پولءِ جُہد ہلاس نہ بیت کہ ہر کس ئے پہ وتی جندءِ شوہازگءَ کنت ئے !
واجہ وتی کتاب ءِ ہمے بابانی تہا جمہوریت ءُ جمہوری جُہد ءُ سیاستءِ پَلّہ مرزیءَ بازیں گپ ءُ حبرے کنت اِدا من بُگوشاں کہ سروک گوں ملکءِ دفترءَ انصاف نہ کنت گڑا گپ دروغءِ نہ بیت پرچہ کہ اے حبرءَ انوگیں دورءِ ہر مردم سرپد بیت کہ اے ملکءَ جمہوریت ءُ جمہوری جُہدءَ ہچ معنا نیست نیکہ ملکءِ حاکمانی تبءُمئیلءِ تہا بدلی آہگءِ نشانیءُ آثار گندگ بنت کہ کسے امیتءِ بِہ بندیت ءُ وتی دلءَ تسلا بدنت کہ دیمترا گوستگیں دور دوبر واتر نہ کنت؟ اِدا راستی ہمیش اِنت کہ وہدے دیمروئیءِ ہمبرائیءَ ملکءَ جمہوریت ءُ جمہوری جُہدءِ حالت روچ پہ روچءَ بَدتر بُوان انت۔ گپ ایش انت کہ ملکءِ بنداتی دورءِ گچینکاریاں ہم مسلم لیگ ملکءِ انتظامیہءَ پہ زبردستیءُ ٹپٌہانی سہارا برتگ اے کہ مرچاں ” ٹپّے پہ ٹپّہ ” نعرہ ئے جوڑ بوتگ ایشیءِ بندات ہما دورءَ بوتگءُ مسلم لیگ پہ زور دیما آؤرتگءُ کامیاب کنائینتگ اے درگت ءَ اِدا ما اگاں ڈاکٹر اِلہان نیاز صاحب پروگرامےءِ تہئے گُوشتِناں دیما بہ کناں گڑا بوت کنت کہ باوست تچک تِر ءُ قابلءِ باور بِہ بیت۔ ہمے سرحالءَ ڈاکٹر اِلہان نیاز اردوءَ چوش گوشیت کہ” ہمارے یہاں 1951ء میں پہلی دفعہ پنجاب میں انتخابات ہوئے تو اُس میں مسلم لیگ نے دبا کر انتظامیہ کے ذریعے مداخلت کی اُن الیکشن کے متعلق 1956ء کی رپورٹ بتاتی ہے کہ پچاس سے زائد حلقوں پر انتظامیہ نے مداخلت کے ذریعے مسلم لیگ کو زبردستی جتوایا تو ہمارے بانی قائدین (جن میں لیاقت علی خان قابل ذکر ہے) نے ابتدا سے ہی یہ فیصلہ کیا کہ ہم نے اس ملک میں کوئی جائز الیکشن نہیں ہونے دینا ہے اگر ہم نہیں جیتتے تو وہ الیکشن ہمارے لیئے قابل قبول نہیں ہے اس مقصد کے لیے ان لوگوں نے مخالفین کو نااہل کرانے کے لیئے مختلف ایکٹ نافذکیے نتیجہ یہ ہے کہ الیکشن کے ریزلٹ کو پرانی حکومت ، اپوزہش یا پھر اسٹیبلشمنٹ نہیں مانتی ہے ) دیمترا ڈاکٹر صاحب چوش گوشیت کہ “آج ظفر اللہ صاحب نے ایک سیاسی کارٹون ٹویٹ کیا تھا جس میں سُہروردی کا بیان تھا کہ جب بھی الیکشن ہو گی مسلم لیگ ہار جائے گی اور ابھی بھی آپ کِہ سکتے ہیں کہ جب بھی الیکشن ہوگی مسلم لیگ ہار جائے گی نتیجہ کیا ہے کہ الیکشن نہیں ہونے دو، الیکشن کی معیاد کو آگے بڑھا دو ” اوّلی گچینکاریانی بابتءَ تاریخءِ یک ڈاکٹرےءِ اے حبر پَدّر کن انت کہ چہ بنداتءَ اے ملکءِ ووٹ ءُ الیکشن یا نمائندگ چہ عوامءِ ووٹاں دارگ نہ بوتگ اَنت ءُ عوامی گچینکاری ءِ تعریفءَ ہیر نئیتکگ انت کہ کسے ایشاں جمہوری راہءُ راہبندانی الیکشنءِ نام ءُ لقبءَ بِدنت۔
دومی دورءَ ایوب خان گوں فاطمہ جناحءَ دیم پہ دیم بوتگ،اے گچینکاریانی بابتءَ ہم ملکءِ وانندہ ہمے گوش انت کہ فاطمہ جناح پہ زورءُ زبردستیءَ دور دیّگ بوتگ چہ واجہانی نیمگءَ غدّاری یا بدواہ ءُ دشمنیں ملکاں گوں ہمکاریءِ لقب ہم ہمے دورءَ تراشگءُ جوڑ بوتگءُ پہ مفتء ناحقءَ سیاسی مخالفانی سرا جنگ بوتگ اے لقبءِ اوّلی نشانگانی تہا یکّے فاطمہ جناح بوتگ ”
کے گوشیت مارا دُژمناں کُشتگ
مارا دوستاں پہ جیءُجاں کشتگ” فاطمہ جناحءَ گچینکاریانی ناکامیءِ شکلءَ سزا بگندئے چہ قُدرتءِ نیمگءَ رسئیتگ کہ آہاں پہ ملکءِ جوڑ کنگءَ مزنیں کِرد ءُ کارے کتگ پرے واستا شکستءُ ناکامیءِ حقدار بوتگ۔ ملکءِ 1970ء گچینکاریانی بابتءَ گوشگ بیت کہ ملکءِ دفترءِ سپا تریں گچینکاری بوتگ اَنت بلے ہمے گچینکاریءِ بابتءَ ملکءِ نامداریں صحافی سہیل وڈائچ یک پروگرامےءَ زبیر عمرءَ دیم پہ دیما چوش گوشیت کہ 1970ء گچینکاریءَ تئی کماشءَ زر بہر کتگ۔ نامداریں زانتکار شجاع نواز ہم اعزاز سیدءِ یک پروگرامےءَ ہمے گپاں کنت کہ ووٹانی وہدءَ پی ٹی ویءَ انگلش نیوزانی نگران ءُ مستر بیت
اِدا اے گپءِ نیمگءَ دلگوشءَ گُور کنگ ضروری اِنت کہ یکءُ تہنائیں پارٹی ئےءَ حکومتی واکءُ اختیار دیّگ مہ بنت، بگندئے دائمءَ حکومت ہواریں پارٹیانی دستءَ بِہ بیت اے پالیسی نوک نہ اِنت ملکءِ حاکمانی چَہ بنداتءَ ہمے حیل ءُ ہُنر بوتگ کہ یک پارٹی ئے دیما میئیت ءُ نیکہ کُلّی دروشم ءَ اختیار دار بِہ بیت کہ بلکیں ملکءِ حاکماں چیلنج بِہ کنت ءُ ایشانی ہستءُ نیستیءِ واک ءُ اختیارءَ پچ بِہ گپیتءُ ملکءَ جمہوری راہءُ راہبندانی سرءَ رہادگ بِہ کنت عوامی لیگءَ حکومت نہ دیّگءِ ایدگہ مقصدانی گوما اے ہم یک مقصدءِ بوتگ کہ عوامی لیگ ءُ نیپءَ اگاں حکومت دیّگ بہ بیت گڈا بوت کنت کہ اے پارٹی ملکءِ مقتدرہ ءُ پنجابءِ واک ءُ اختیارءَ پچ بِگر انت ءُ یک انچیں آئین ءُ قانونءِ جوڑ بکن اَنت کہ واک ءُ اختیار کُلّی صورتءَ ملکءِ صوبَہانی دستءَ بُروت یا پنجابءِ جاگہءَ بنگال اختیار دار بِہ بیت زانتکار گوش انت کہ بھٹّو گوں حاکماں نزیک بوئگءِ سوبءَ آہانی تبءُ مئیلءَ سرپد بوتگ گڑا اے دورءَ بھٹوءِ صلاح ءُ سوجءَ ءُ گوں بھٹوءَ ہَوار مقتدرہ ءِ لہتیں سری ئیں سروک یحیٰ خانءَ گوش انت کہ تو حکومت اگاں عوامی لیگءَ دات گڑا تو چو ملکہِ الزبیتھءِ وڑا بےاختیار بئے!! دیمترا زانتکار گوش انت کہ یحیٰ خان ہر کسی دیما اے گپّءَ کنت کہ من وتارا ملکہِ الزبیتھ کنگ نہ لوٹاں ہمے دورءَ” اُدھر تم ، اِدھر ہم” نعرہ جکسیت چدودیمءَ ہمے بیت کہ یحیٰ خان عوامی لیگءَ حکومتءَ نہ دنت ءُ ملکءِ حالات حراب بنت ، ہڑتالءُ شورش بندات بنت ءُ ملک اے نوبتءَ سر بیت رندترے ووٹ ءُگچینکاریانی حال گنتر ضرور بوتگ بلے شرتر نَہ بوتگ اَنت ( اے درنیامءَ بھٹو ءِگوں بلوچءُ پشتون سروکاں بلاہیں قصہءُ حبرے ھست اِنت کہ رندترءِ نبشتانکانی بہرےءَ بیان کنگ بیت) کہ کسے وتی سُنٹءَ چِست بِہ کنتءُ گُشتانکءِ دیّگ بندات بہ کنت کہ چہ بنگالءِ وئیلءَ ءُ پد ملکءِ واجہ ءُ حاکماں وتی تبءِ تہا بدلی آؤرتگ ءُ جہانءَ جمہوریتءِ مستر ءُ سرخیل جوڑ بوتگ اَنت اے گپ ءُ حبرانی مقصد ہمیش اِنت کہ ملکءَ ہچ گچینکاری پَہ ساپ ءُ پلگاریءَ نہ بوتگ کہ کسے ملکءَ جمہوری جُہد ءُ نمائندگیءِ سرا پہر بِہ بندیت یا باور بِہ کنت کہ ملکءِ عوام ءَ جمہوری جہدءِ برکتءُ آسرءَ وتی حقءُ اختیار رس انت ءُ آ واکدار بنت کہ وتی فیصلہاں وت بِہ کن انت ءُ په وتا سنگینیں گامگیج بُزور اَنت
سروک وتی دورءِ حکومتءِ تعریفءَ کنت کہ ما “ایش” کتگ ءُ ما” آ “کتگ بلے مئے حیالءَ کارءِ معنا ہمیش اِنت تُری بلوچ راج بِہ بیت یا ملکءِ ایدگہ نِزوریں قوم بہ بنت ،آہانی سروکانی مستریں کامیابی ہمے بیت کہ ہر قوم ءِ وتی سر ڈگارءَ بگر تا وسائلانی ءُ ساحلءِ اگاں کسےءِ کرّا ساحل است وت واجہ ءُ واہُند بہ بیت ادا اے ہم کہ کمءَ چَہ کم ملکءِ تہا وتی فیصلہاں وت بِہ کنتءُ گام گیج بُزوریت ءُ اے درگتءَ چَہ سروکءِ کتابءِ یکءُ دوئیں نبشتانکانی وانگءَ ظاہر بیت کہ سروک وتی تہی کار ءُ حکومتی فیصلہانی چو کہ وت مستر نہ بوتگ پرے حاترا مردم آئی ءِ سرکارءَ کامیاب ءُ جمہوری حکومتءِ گوشت نہ کنت ایشیءِ جاگہءَ آئیءِ دورءِ حکومت ساری ءِ حکومتانی وڑیں نِزور ءُ بےاختیاریں حکومتی دورے گوشت کنت پدا اےہم یک نقطہ ئے کہ آئیءِ سرکارءِ زُورگءِ فیصلہ چو کہ سروک وت گوشیت پارٹیءِ ڈسپلنءِ رِدءَ جمہوری راہءُ رہبنداں ءُ پارٹیءِ ہواریں فیصلہءَ نہ بوتگ بگندئے یک مردمےءَ چَہ بلوچستانءَ دُور ءُ دَر اسلام آبادءَ نشتگ ءُ حکومت زورگءِ فیصلہ کتگ اے درگتءَ باز ورناہ ءِ گُمان ہمیش اِنت کہ سرکارءَ زُورگءِ فیصلہ پارٹیءِ جاگہءَ یکّیں واجہءَ پہ” کُوہنیں بیرگیری” ءِ حاترا کتگ .دومی اے کہ پہ بلوچ راجءَ بلوچستانءِ مستریں مسئلہ ءُ جنجالانانی تہا یکّے ٹپءُ ٹوری ئیں لاشانی ءُ ہمک روچ بلوچ ورناہانی گار ءُ بیگواہیءِ ءُ دومی بلوچ جُہد کارانی گوما ملکءِ واجہ ءُ حاکمانی نیمگءَ گپءُ ترانے ءِ واکءُ اختیارءِ دیّگءِ بوتگ دانکہ اعتمادے بحالی ممکن بہ بیت چرے کاراں پد بلوچ راجءُ بلوچستانءِ دیمروئیءِ کار کاینت اے درگتءَ واجہ وت ہم گوشیت کہ منی گوں بلوچ سروک براہمندغ بگٹیءَ گپ ءُ تران بوتگ براہمندغءَ بلوچ رواجانی حسابءَ منءَ عزت داتگءُ منی حِزمتءِ کتگ واجہءِ گوشگ ایش اِنت کہ براہمندغ گوں ملکءِ حاکماں گپ ءُ ترانءَ راضی ہم بوتگ واجہءِ حیالءَ براہمندغءِ گپ ءُ شرائط چوشیں نہ بوتگ اَنت کہ پورا کنگ مہ بنت اے ہم کہ آئیءِ کلّیں شرائط پہ بلوچ راجءُ مہلونکءِ گہبودیءِ حاترا بوتگ اَنت دیمترا واجہ تچکءَ چوش گوشیت کہ گپ وہدے کہ دیما شُتگ اَنت گڈا من محسوس کُتگ کہ حاکمانی تَہئے بازیں مردم وش نہ اَنت کہ اے جنگ ءُ چوپءِ سلسلہ بند کنگءُ ہلاس بہ بیت واجہ وتی نبشتانک ءِتہا گپ ءُ ترانانی ناکامی ءُ نامرادیءِ ذمہ دار ملکءِ اختیار دارءُ حاکماں سرپد بیت کہ واجہئے حیالءَ آہانی یک بہرےءَ نہ لوٹیتگ کہ گپ ءُ تران کامیاب بِہ بنت ایشی ءِجاگہءَ آہانی حیال ہمے بوتگ کہ بلوچ جُہدکاراں ما پہ زور پروش داتءُ ناکام کُت کنیں
بلوچ سوال بابتءَ اے نبشتانکءَ ما ہمنچو دیما بِہ براں شُت کنت بلے چَہ سر کن ءُ پِر کن ءُ مُفتیں دماغ پچیءَ شرتر ہمے بیت کہ ما سروکءِ کتابءِ جندءِگپّانی شیرگ ءُ مَجگاں دیما بہ کنیں ءُ بچاریں گڑا که اے اڈءُ جنجالءِ ذمہ دار کے اِنت ءُ کے نہ اِنت ؟وت زانگ بیت ءُ چرے گپّاں اے ہم پَدّر بیت کہ ملکءَ جمہوریت ءُ جمہوری واک ءُ اختیار یا نِزوریں راجانی حقّءُ اختیارانی سوالءِ بابتءَ تاں اے وہدءَ واجہانی ذہنیتءِ تہا ہچ وڈیں بدلی نہ یتکگءُ اے ہر کسءَ چہ وتا سِندگ ءُ جتا کنگ لوٹ انت اے گپءَ وہدے مئے وڑیں ناتجربہ کارے سرپد بیت گڑا سروک گوں وتی پارٹیءَ پہ کئی اوست ءَ ءُ کجام امیتءَ نشتگ انت کہ جمہوریت یا نزوریں راجانی سوال ءِ تکءُ پہناتاں ملکءِ واجہ ءُ حاکم وتی پالیسیاں روچےنہ روچے بدل کن اَنت اے درگتءَ اگاں کسےءَ واب گِندگءِ یا ادا مردم چوش بُگوشیت کہ مالءُ متاع جم کنگءِ فیصلہ کتگ آئی ءَ کس داشت نہ کنت اگاں نہ گڑا واجہ ٔٔءَ گپءُ تران الکاپیءَ پَدّر کن انت کہ اے ملکءِ حاکم ہما ٹِکّءِ سرا اوشتاتگ اَنت کہ ملکءِ بنداتی دورءَ بوتگ انت ءُ ایشانی تہا ہچ وڑیں بدلی ئے نہ یتکگ کہ کسے کوٹءُ قبا بہ بیتءُ حاکمی ءِ وابءَ بَہ گِندیت