کوئٹہ : وزیر اعلیٰ بلوچستان میر سرفراز بگٹی کی زیر صدارت دُکی مائینز ایریا میں سیکورٹی انتظامات کی بہتری سے متعلق اہم اجلاس منعقد ہوا، جس میں امن و امان کی بحالی اور ترقیاتی منصوبوں پر تفصیلی تبادلہ خیال کیا گیا۔
وزیر اعلیٰ بلوچستان نے غیر رجسٹرڈ مائینز کی فوری رجسٹریشن کا حکم دیتے ہوئے کہا کہ مائینز رائلٹی ریٹس پر نظرِ ثانی کی جائے تاکہ حاصل ہونے والا ریونیو مقامی ترقی پر خرچ کیا جا سکے۔ انہوں نے مزید کہا کہ علاقے میں امن و امان کے قیام کے لیے ایف سی، پولیس اور لیویز کے درمیان مربوط رابطہ کاری ناگزیر ہے۔
اجلاس میں وزیر اعلیٰ نے آئی جی پولیس بلوچستان کو ہدایت دی کہ دُکی مائینز ایریا کی سیکورٹی کے لیے 200 جوانوں کو میرٹ پر بھرتی کیا جائے۔
اجلاس میں وزیر مائینز میر شعیب نوشیروانی، چیف سیکرٹری بلوچستان شکیل قادر خان، پرنسپل سیکرٹری بابر خان، ایڈیشنل چیف سیکرٹری داخلہ شہاب الدین، آئی جی پولیس بلوچستان معظم جاہ انصاری اور دیگر اعلیٰ حکام شریک تھے۔
وزیر اعلیٰ نے واضح کیا کہ حکومت دُکی مائینز ایریا میں امن و استحکام کے لیے ٹھوس اقدامات کر رہی ہے تاکہ مقامی آبادی کو ترقی کے مساوی مواقع فراہم کیے جا سکیں۔
Leave a Reply