پاپولیشن ویلفیئر ڈیپارٹمنٹ کیچ کی جانب سے 23 فروری 2025 کو تربت ملک آباد کے علاقے میں کمیونٹی بیسڈ فیملی پلاننگ آگاہی پروگرام کا انعقاد

تربت: کمیونٹی بیسڈ فیملی پلاننگ ورکر محترمہ ماہ نور شاہ نے تربت میں اپنی کمیونٹی کے افراد کے ساتھ ایک آگاہی سیشن منعقد کیا، جس میں متوازن خاندان کی اہمیت اور خوشحال زندگی گزارنے کے اصولوں پر روشنی ڈالی گئی۔

پروگرام کا آغاز حانی عبدالغفور نے تلاوتِ قرآن پاک سے کیا، جس کے بعد محترمہ ماہ نور شاہ نے شرکاء سے خطاب کیا۔ انہوں نے وضاحت کی کہ متوازن خاندان کا مطلب بچوں کی تعداد اور وسائل کے درمیان ایک ایسا توازن قائم کرنا ہے، جو نہ صرف والدین بلکہ بچوں کی صحت، تعلیم اور بہتر مستقبل کے لیے بھی فائدہ مند ہو۔

محترمہ ماہ نور شاہ نے کہا کہ “فیملی پلاننگ صرف بچوں کی پیدائش کو محدود کرنے کا نام نہیں، بلکہ یہ ایک خوشحال اور مستحکم زندگی گزارنے کا زینہ ہے۔ اگر خاندان کی منصوبہ بندی کی جائے تو ہر فرد صحت مند، خوشحال اور تعلیم یافتہ زندگی گزار سکتا ہے۔

پروگرام میں مہمانِ خصوصی محترمہ روبینہ نور اور محترمہ حسنہ بلوچ نے بھی شرکت کی اور اپنی قیمتی آراء کا اظہار کیا۔ انہوں نے کمیونٹی میں فیملی پلاننگ کی اہمیت کو اجاگر کرتے ہوئے کہا کہ والدین کی ذمہ داری ہے کہ وہ اپنے بچوں کو بہترین مستقبل فراہم کرنے کے لیے دانشمندانہ فیصلے کریں۔

انہوں نے مزید کہا کہ تربت میں ایسے آگاہی پروگرامز کا انعقاد بے حد ضروری ہے تاکہ معاشرے میں مثبت تبدیلی لائی جا سکے اور لوگ اپنی زندگی کو بہتر بنانے کے لیے بہتر منصوبہ بندی کریں۔

شرکاء نے اس معلوماتی سیشن کو بے حد سراہا اور تجویز دی کہ اس طرح کے مزید پروگرامز کا انعقاد ہونا چاہیے تاکہ معاشرے میں متوازن خاندان کے تصور کو فروغ دیا جا سکے اور ہر گھر خوشحالی کی راہ پر گامزن ہو۔

یہ سیشن کمیونٹی کی فلاح و بہبود کے لیے ایک اہم قدم ثابت ہوا، جس میں متوازن اور خوشحال زندگی گزارنے کی اہمیت کو اجاگر کیا گیا۔

سیکرٹری پاپولیشن ویلفیئر ڈیپارٹمنٹ جناب عبداللہ خان کاکڑ نے کہا کہ حکومت اور سماجی تنظیموں کو مل کر ایسے آگاہی پروگرامز کو فروغ دینا چاہیے تاکہ زیادہ سے زیادہ لوگ فیملی پلاننگ کے فوائد سے آگاہ ہو سکیں۔ انہوں نے یقین دہانی کرائی کہ پاپولیشن ویلفیئر ڈپارٹمنٹ ایسے اقدامات کی حمایت اور سرپرستی جاری رکھے گا تاکہ کمیونٹی کی بہتری اور خوشحالی کو یقینی بنایا جا سکے۔

انہوں نے کمیونٹی بیسڈ ورکرز کی کوششوں کو سراہتے ہوئے کہا کہ وہ عوام میں شعور اجاگر کرنے میں کلیدی کردار ادا کر رہے ہیں، اور امید ظاہر کی کہ تربت سمیت دیگر علاقوں میں بھی اس طرح کے سیشنز منعقد کیے جائیں گے تاکہ متوازن اور خوشحال زندگی کے اصولوں کو فروغ دیا جا سکے۔