کوئٹہ:بلوچستان کے مختلف علاقوں میں طاقتور مغربی موسمی سسٹم داخل ہورہا ہے اور آج سے بلوچستان کے مختلف علاقوں میں بارشوں، آندھی اور طوفان کے ساتھ ساتھ پہاڑوں پر برفباری کا امکان ہے محکمہ پی ڈی ایم اے کے مطابق ایک اور طاقتور مغربی موسمی سسٹم بلوچستان کی جانب بڑھ رہا ہے، یہ سسٹم آج 2 مارچ کو بلوچستان میں داخل ہونے کا امکان ہے جب کہ اتوار کی دوپہر سے شام تک مغربی لہر بلوچستان کو متاثر کرسکتی ہے۔

محکمہ موسمیات نے ماہ رمضان کے دوران بارشوں کی پیشگوئی کی ہے پی ڈی ایم اے حکام کا کہنا ہے کہ چمن، زیارت، نوشکی، مستونگ، پشین، قلعہ سیف اللہ، قلعہ عبداللہ، چاغی، خاران، قلات، سوراب، خضدار، بارکھان، ہرنائی، دکی، موسیٰ خیل، ژوب اور شیرانی سسٹم کے زیر اثر رہیں گے۔

پی ڈی ایم اے حکام کے مطابق 2 مارچ سے بارش، آندھی، گرج چمک اور پہاڑوں پر برفباری کا امکان ہے لہٰذا برفباری، طوفان اور سیلاب کے دوران مسافر اور سیاح غیر ضروری سفر سے گریزکریں۔پی ڈی ایم اے کی جانب سے تیز ہواؤں کے دوران شہریوں کو گھروں میں رہنے اور احتیاط کرنے کی ہدایت کی گئی ہے جبکہ تمام متعلقہ اداروں کو بھی الرٹ رہنے اور ضروری اقدامات کی ہدایات جاری کی گئی ہیں۔