قومی اسمبلی کے رکن (ایم این اے) گوادر-کیچ، حاجی ملک شاہ گورگیج نے آج جامعہ گوادر کا دورہ کیا، جہاں انہوں نے وائس چانسلر پروفیسر ڈاکٹر عبدالرزاق صابر پرو وائس چانسلر ڈاکٹر منظور احمد اور دیگر اہم انتظامی عہدیداران سے وائس چانسلر سیکریٹریٹ میں ملاقات کی۔

دورے کے دوران، حاجی ملک شاہ نے جامعہ کی قیادت سے تعلیمی اور ترقیاتی سرگرمیوں پر تبادلہ خیال کیا۔ وائس چانسلر نے ان کا پرجوش استقبال کیا اور جامعہ کی کامیابیوں، درپیش چیلنجز اور آئندہ کے منصوبوں سے متعلق تفصیلی بریفنگ دی۔ اس کے علاوہ ایم این اے کو یونیورسٹی کے مختلف شعبوں کا دورہ بھی کرایا گیا۔

بعدازاں، حاجی ملک شاہ گورگیج نے جامعہ گوادر کے زیر اہتمام منعقدہ بزنس اینڈ کلچرل گالا کی تقسیم انعامات کی تقریب کی صدارت کی۔ اس موقع پر انہوں نے فیکلٹی ممبران، طلباء و طالبات اور عملے سے خطاب کرتے ہوئے بلوچستان کے نوجوانوں کے لیے فنی اور کاروباری تعلیم کی اہمیت پر زور دیا۔
تربت میونسپل کمیٹی کے چیئرمین، جناب میر ہوتمان، اور دیگر مقامی نمائندگان بھی ایم این اے کے ہمراہ موجود تھے۔
تقریب کے اختتام پر بزنس اینڈ کلچرل گالا کے شرکاء میں سووینئرز تقسیم کیے گئے۔ وائس چانسلر پروفیسر ڈاکٹر عبدالرزاق صابر نے مہمانِ خصوصی حاجی ملک شاہ گورگیج اور دیگر معزز مہمانوں کو اعزازی شیلڈز پیش کیں.