منی مہتریں سنگتے سرکاری کارگسےءَ19 گریڈءِ اگدہءِ سرا کارءَ انت۔ایندگہ وہداں بلوچ راج دوستیءِ سرا واجہ ءَ بھاشن پہ بھاشن انت۔فیننءِ افتادگانء خاک ئے پہ‌دل یات انت۔ منڈیلہءِ جہدانی قصہاں انچو کاریت،گوش ئے زاناں افریقہءِ آجویءِ جہد ءِ وہداں مردکارءِ جند گون بوتگ گوں۔کارل مارکس،ہو چی منہ،ماؤےءِ بلائیں منوگرے۔شپءَ انچو انقلابی انت تو گوش ئے زاناں صحبءَ سواساں آپ‌جنتءُ دڑامبءَ رؤت بلئے صحبءَ جناحءِ فریم کتگیں عکسءِ چیرا ٹئیروک والا کرشیءِ سرا انچو ملاران انت،گوش ئے زاناں اے زمین گوکءِ کانٹءِ سرا ناں بلکیں واجہ ءِ لنکُکانی سرا ایر انت۔
بیا کہ یکروچے بیگوائیں بلوچانی مات ہمے کارگسءِدیما گوں لہتیں عکساں نندانکے ءَ نشت انت۔منی ہمے 19گریڈءِ آشوبی ئیں سنگتءِ کارگسءِ دیما ہمے زہگءُ زالبولانی سرا لّٹءُ کٹ کنگ بوتءُ،سریگ چکگ بوت انت،کم شرف کنگ بوت انتءُ چہ اوداں پاد کنگ بوت انت۔من کمے حبکہ بوتاں کہ اے کارگسءِ تہا ہو چی‌منہ،نیلسن منڈیلہ،لینین،مارکسءُ ماؤےءِ پگری ہم سنتیں بلوچ آشوبی ئے نندوک انت! اے وڑ چون بوت کنت کہ ہمے کارگسءِ دپءَبلوچ زالبولانی سریگ چه سرادور کنگ بہ بیت.؟
مرُدنی منی‌دلءَلوٹ ات کہ‌واجہءَ بگنداںءُ جست ئے بگراں بلئے پدا سما کت شپءِ نمب شپءَ شلیت۔ واجہ ءِ راج دوستیءِ سرا شق کنگ شریں کارے نہ انت۔ بگندئے اے وہدءَ کہ ڈنءَبلوچ زالبولاناں گرٌان کنگ بیتگ، چہ واجہءِ کوٹیءِ سیاہیں دریگاں اے ندارگ درا نہ بوتگ انت ۔ واجہ بلوچ دوستے بلئے 19 گریڈءِ کرشیءِ لزت انچو باز انت کہ یلہ کنگ نہ بیت۔ واجہ راجدوستے وتی راجءِ بزگیءَ ماریت بلئے سرکاری کارگسءِ سارتیں گوات،زپتیں شیرچاہ،بارگیں سگریٹءُ دل کشیں آسراتیانی یلہ کنگ گرانیں بارے۔ واجہ آشوبی ئے بلئے آرامیں زندمان،پرلزتیں چاگردءُشادمانی واجهءِ دیما میلانک انت۔

من اے واجہ کارءِ ترانگءَ ہما وہدا کپتاں وہدے ہمے زوتاں پبلک سروس کمشنءِچکاساں سوبمند بوتگیں ورناہاں مبارکی دؤکائی ات کہ” اے ہما ورناہ انت کہ بلوچ انت،ہاسٹلانی بزگی،بے زری،واری،درپہ دریءُہمک پیمیں سارتءُ گرمءَ پد اے جاگہاں سربیتگ انت”۔ منا اشانی وانگی جہدءُکوشستءِ سرا ھچ وڑیں شقے نیست بلئے بیا کہ باندا ہمے ورناہ چو منی ہما مہتریں سنگتءَٹئیروکی ئیں کرشیءِ سرا سگریٹءِدوتاں گوں وشنود بنت وہدیکہ دریگءَ ڈن پیریں زالے وتی بیگوائیں بچءِ عکسءَ دلبندءَ سرا دارانءَ چہ چدا کم‌شرف ءُلٹّءُ کٹ کنگ بیتءُ آئیءِ سریگ سرکاری سپاہیانی 19 لمبرءِ بوٹانی چیرا لگتمال بیت،گڑا چون کن ئے؟

مردکارےءَ سوشل میڈیاءَ پہ شان نبشتہ کتگ ات کہ” اے سوبینی پہ بزگیں راجءَ مزنیں مستاگے”۔گڑا منا بزکاریں ماتانی اے گپ یات اتک کہ
“ہور گواریت کہ مئے نگن کپّے،ہور نہ گواریت کہ مئے نگن کپٌے”.