تہران: ایرانی صدر  مسعود پزشکیان نے امریکی صدر  ڈونلڈ ٹرمپ کے خلیجی ممالک کےدورے کےدوران تہران پر تنقید کو آڑے ہاتھوں لے لیا۔

غیر ملکی خبر رساں ادارے کے مطابق ایرانی صدر مسعود پزشکیان نے  ڈونلڈ ٹرمپ کیلئے بیان دیتے ہوئے کہا کہ آپ یہاں کیا ہمیں ڈرانے کیلئے آئے ہیں؟ ہم غنڈہ گردی کے آگے نہیں جھکیں گے۔

ایرانی صدر کا کہنا تھا کہ ڈونلڈ ٹرمپ سوچتا ہے کہ وہ  یہاں آکر ہمیں ڈرا سکتا ہے، ہمارے  لیے شہادت کی موت بستر  پر مرنے سے زیادہ پیاری ہے۔

یاد رہے کہ امریکا نے ایران کے بیلسٹک میزائل پروگرام پر نئی پابندیاں عائد کردی  ہیں۔

 ٹرمپ انتظامیہ نے حالیہ ہفتوں میں ایران کی تیل کی صنعت اور جوہری پروگرام سے منسلک افراد اور اداروں پر متعدد پابندیاں عائد کی ہیں،  بدھ کو لگائی گئی نئی پابندیاں ان تنظیموں پر ہیں جو ایرانی حکومت کو ایسے اہم مواد کی مقامی سطح پر تیاری میں مدد فراہم کر رہی ہیں جو تہران کے بیلسٹک میزائل پروگرام کے لیے ضروری ہیں۔

دوسری جانب سعودی عرب کے دورے پر موجود امریکی صدر ڈونلڈ ٹرمپ نے کہا تھا کہ ممالک کے درمیان پراکسی وار کا خاتمہ چاہتا ہوں اور ایران کے ساتھ معاہدہ کرنا چاہتا ہوں، اگر ایران کے ساتھ معاہدہ نہ ہوا تو ایران پر سخت معاشی پابندیاں عائد کریں گے۔