اے کتاب نیلسن منڈیلا ءَ وت نبشتہ کتگ بزاں آئی ءِ زند نامگ انت ۔اے ردا اے کتاب پہ جنوبی افریقہ ءِ تاریخ ءِ واستا ایوک ءَ یک درونتے نہ انت بلکیں سرجمیں بنی آدم ءِ جد ءُ جہد ءِ یک درے۔ اے کتاب افریقی قوم ءِ په وتی آزادی ءَ قربانیانی یک سرجمیں داستانے۔
اے کتاب ءَ منڈیلا وتی جندءِ زندمان ءَ یک چوشیں بستار ےنہ دنت بلکیں وتی سْیاست ءُوتی سیاسی لیکہ ءَ دیم ءَ ایر کنت۔ اگاں کہ آ بازیں سالاں زندان ءَ کنگ بیت بلے گڑی وہداں پہ جنوبی افریقہ ءِ آزادی ءَ یک مزنیں کردے پیش داریت،تنکہ افریقہ آزادی ءِ روچ ٹک دنت ۔

کتاب چہ منڈیلا ءِ ہما ہنکیں ءَ بندات بیت کہ یک لاچاریں دمگے۔ چوشکہ منڈیلا وتی بنداتی زندمان ءَ ٹک ءُ دود ءُربیدگانی میان ءَ بندات کنت چوشکہ آ ئی ءِ واجہیں پت ءِ بیرانی ءُ ”گارڈین شپ “ عیل گرگ ۔
اے کتاب ءَ منڈیلا گوشیت کہ منڈیلا ءَ چوں افریقی رواج ءُ رسم دربرُت انت ءُ رند ءَ چوں یک مزنیں نامے ءِ واہند بوت ۔چہ کتاب ءَ ہمے معلوم بیت کہ منڈیلا ءَاے سرجمیں داستاں چہ زندانءَدربرُتگ انت
منڈیلا ءَ وتی نسل ءِ بابت ءَ باز معلوم داری است ات کہ سْیاہ پوستیں مردماں جنوبی افریقہ ءِ انَدْر ءَ چوشیں بستار نیست۔منڈیلا ءَ سْیاہ پوستیں مردمانی حاترا ،اسپیت پوستیں مردمانی حلاف ءَ کار کت ۔ منڈیلا ءَ وہدئے قانود ءِ وانگ سرجم کت گڑا رند ءَ افریقی نیشنل کانگریس بزاں ANC ءَ ہوار بوت۔ ءُ گوں گشادی ءَ وتی توان پیش داشت۔ منڈیلا ءَبنداتءَ پرامن جدءُ جہد ءِ نعرہ جت وہدئے ملک ءَ وتی ظلم ءُ زوراکی گیش کت انت بزاں جنگ ، کشگ ءُ گارءُ بیگواہ کنگ گڑا منڈیلا ءَ جنگی گوریلہانی حمایت کنگ بندات کت ۔ منڈیلا ءَ ہمے سما بوت کہ غلامیں راجانی واستا غلامی په مدامی نہ انت ۔ منڈیلا گوں وتی لفظاں نبشتہ کنت کہ منی مقصد گوریلہانی حمایت کنگ نہ بوتگ،بزاں جنگ ءِحمایت نہ بوتگ بلکیں ہمے قانودءِ گارءُ بیگواہ کنگ ءِ واستا من جنگی گوریلہانی حمایت کتگ کہ ہمے قانود بنی آدم ءِ دژمن انت۔ ہمے قانود کہ ظلم ءُ زوراکی ءِ زور ءُ کمک انت ۔
منڈیلا 27 سال ءَ ”روبن آئی لینڈ “ ء ِزندان ءَ کنگ بیت کہ ہمے بندی جاہ ءَ منڈیلا ءَ سک لٹ ءُ کٹ کنگ بیت انت بلے اے لٹ ءُ کٹ منڈیلا ءَ انچوش توانگر کن انت کہ آئی ءَ اسپیت پوستانی ہچ گپ نه من ات۔وتی دوست ءُ سنگتاناں ہم ہنچیں سکین دات کہ وتارا ہچ وڑا کمزور مہ کن ات۔
وہدئے منڈیلا چہ زندان ءَ آجو کنگ بوت گڑا اے وہد ءَ ملک خانہ جنگی ءِ آماچ ات بلے منڈیلا ءَ امن ءِ راہ گپت۔ ءُ اسپیت پوستیں مردماناں ءَ ایمنی ءِ یک شوکیں راہ ئے پیش داشت۔وتی ہمے رہبندانی پشت ء اولی رند ات کہ جنوبی افریقہ ءَ جہموری ووٹ بندات بوت انت ءُ اولی رند ات کہ یک سْیاہ پوستیں مردمے ملک ءِ کماش بوت۔ منڈیلا ءَ ہمے گپ جت کہ سْیاستدان ءُ سْیاسی بادشاہ بوئگ یک مزنیں گپے نه انت بلکیں مزنیں گپ مردمانی میانجی ءَ بوئگ انت ءُ مردمانی میانجی ءَ مہر ودی کنگ انت، په بنی آدماں عزت ءُ احترام پیداک کنگی انت۔ اےکتاب ایوک ءَ نیلسن منڈیلا ءِ وتی جندئے قصہ نہ انت بلکیں اے یک کرنے ءِ تاریخ انت یک کرنے ءِ سبق انت پرچہ کہ اے کتاب ءِ وانگ ءَ رند مردم ءث معلوم بیت کہ آزادی ءِ گرگ ہنچ ارزان نہ انت بلکیں باز ہمت ءُ ہاٹیگ لوٹیت۔باز سکی تکلیف برداشت کنگ لوٹیت ءُ صبر ءُ اوپار ہم۔