کوئٹہ : آغاز حقوق بلوچستان پیکج میں انوکھے انکشافات، اکاﺅنٹنٹ محمد عبدالقدوس نے طلبہ کے اسکالرز شپ منسوخ کردیے۔ آغاز حقوق بلوچستان پیکج کے تحت بلوچستان کے طلبہ کو ملکی اور غیر ملکی اسکالرز شپ دیئے گئے تھے

لیکن اس میں بدعنوانی کے بہت سے واقعات سامنے آئے ہیں، حال ہی میں طلبہ نے ایسی دستاویز مہیا کیں جن میں ان کے اسکالرز شپ اکاﺅنٹنٹ محمد عبدالقدوس نے منسوخ کیے ہیں۔

یاد رہے کہ اسکالرز شپ کو منسوخ کرنا ایک اکاﺅنٹنٹ کے اختیارات میں نہیں آتا، لہٰذا موصوف نے اپنے اختیارات سے تجاوز کیا ہے

جو کہ ایک غیر قانونی عمل ہے۔ اس سلسلے میں میڈیا نے اکاﺅنٹنٹ کا موقف جاننے کی کوشش لیکن ان کی طرف سے کوئی جواب نہیں دیا گیا۔ طلبہ کا کہنا ہے کہ وہ اس اندھیر نگری اور جنگل کے قانون کیخلاف سول کورٹ میں اکاﺅنٹنٹ کیخلاف کیس دائر کریں گے اور انہیں جتنے نقصان ہوئے ان کا ازالہ بھی طلب کریں گے۔

اس کے ساتھ انہوں نے صدر پاکستان آصف زرداری، چیئرمین ایچ ای سی، وزیرتعلیم اور وزیراعلیٰ سرفراز بگٹی سے مطالبہ کیا ہے کہ محمد عبدالقدوس کیخلاف انکوائری کی جائے اور اپنے اختیارات سے تجاوز کرنے پر ان کیخلاف سخت سے سخت ایکشن لیا جائے۔ واضح رہے کہ اس سے قبل بھی بلوچستان کے مختلف میڈیا ہاﺅسز نے اس پروجیکٹ کے حوالے سے ایچ ای سی سے معلومات طلب کی ہیں لیکن 7 ماہ گزر جانے کے بعد بھی ایچ ای سی معلومات دینے میں ناکام رہا ہے۔