چوناہا اے اُستا گال ءِ بزانت زانتکار، سوہو، کواس ءُ کیمیاگِر انت ءُ سکیں زیبدار ءُ پُر معنائیں لبزے بلے بدبحتی ءَ مئے دودمان ءَ اے لبز رد کارمرز بیگ ءَ بیتگ ءُ انگت بیگ ءَ اِنت ءُ رواج گپتگ۔ہمےگال کہ بندرا یک ہنرے بوتگ کہ رندا بُرتگ ءُ یک ٹکّ ءُ بولکی رنگے دیگ بوتگ۔
بندرا راستی چوش نہ اِنت۔ اے گال ءَ گوں ٹک ءُ بولک ءَ ہچ سیادی نیست۔ اُستا مئے دودمان ءِ ہما محلوک اِنت کہ آیاں پہ راج ءَ کِشت ءُ کشاری ازباب :ننگار ءُ جُگ ءُ مرز ءُ شَت، داس، تپر، کونڈال ءُ برد ءُ دگہ بازیں ازباب جوڑ کتگ. آ وہد ءَ جنگانی دْرچ ءَ ہمے محلوک ءَ پہ جنگی لشکر ءَ زحم، اِسپر، کاٹار، کارچ ءُ اپسانی واستا نال جوڑ کتگ ءُ جنگ ءَ گوں محلوک ءَ ہمکوپگ بیتگ اَنت۔
آ زمانگ ءَ گیشتر محلوک ءِ روزگار گوں کِشت ءُ کشاری ءَ بیتگ۔ اے ازبابانی جوڑ کنگ ءِ ڈُبّہ گڑا اُستا ءَ زرتگ، یک حسابے ءَ اے محلوک مئے دودمان یا مئے بندفتر ءِ انجینئر گْوشگ بیتگ انت۔بلے پہ نادلگوشی مئے چاگرد ءَ ہمے کار ءُ کسب ءَ یک ٹکّ ءُ بولکے ءِ بزانت ءَ زرتگ۔
پہ زالبولاں ایشاں وڑ وڑیں سہت ءُ زیور جوڑ کتگ، چوش کہ: دُرّ، کپگو، کید، سنگو، ٹِک، کید، منگلیک ءُ باہوبند ہمے وڑیں چیز پہ زالبولاں جوڑ کتگ۔ سکیں محنت کشّیں محلوکے بیتگ، پدا رندا مئے چاگرد ءَ ہمے کار ءُ کسب برتگ ءُ ہمیشانی ٹک ءُ بولک جوڑ کتگ کہ سکیں ردیں حبرے۔

دومی گال: لوڑیگ
لوڑیگ ءِ لفظی معنا لوٹوک اِنت، پرچاکہ ایشاں وہدے تئی واستا کِشت ءُ کِشار، رون ءُ موش ءِ ازباب جوڑ کتگ اَنت گڑا گلہ ءُ برنج ءِ رون ءَ، امین ءَ، جوپاگ ءَ، سورو رون ءَ آتکگ اَنت گڑا وتی حق اِش چتّو لوٹ اِتگ بلے پہ پنڈگ اِش نہ لوٹ اِتگ، پرچاکہ دھل ءءَ لوڑیگ ءِ جہد ہم ہوار بیتگ۔آیاں وتی حو رون ءُ موش ءِ وہد ءَ چتّو لوٹ اِتگ۔ہمے سوب ءَ ایش مردم اِش لوٹوک گوشتگ اَنت۔ دیمتر ءَ ہمے گال لوڑیگ جوڑ بیتگ۔
مئے کماشے واجہ مولداد ء محمد ءَ اے ٹک ءِ بارہ ءَ مزنیں پولکاری ئے کتگ اَت۔انی بیران بوتگ، نیست اِنت، (اللہ پاک آئی ءِ جاہ ءَ وش بہ کنت) گْوشت ئِے کہ اُستا یا لوڑیگ زاتے نہ اِنت، یک کار ءُ کسبے۔ءُ ہمے کارءَ را محلوک ءَ یک ٹک ءُ بولکے جوڑ کتگ کہ اے سکیں ردیں گپے ءُ آئی ءَ اے ہم گوشت کہ اُستا میر شکّل ءِ نماسگ ءُ پدریچ اَنت، میرشکل ہم بلوچے بوتگ،چو ایدگہ بلوچاں۔ آئی ءَ اے بارہ ءَ منا سک باز گْوشت،دانکہ من یکروچے گْوشت کہ “واجہ من ایشاں نبشتہ بکناں؟”. گْوشت ئِے “شر اِنت”۔ پد ءَ منی وتی جند ءِ سُستی, مرچی باندا، مرچی باندا، تاکہ واجہ مولداد بیران بوت، بلے آئی ءَ اے سکی ءَ گوں گْوشت کہ اے ہم منی تئی ایدگہ قومانی وڑیں بلوچ اَنت، بلے ایشاں ہمے کار کتگ انت اے نام ئے پر لچتگ۔
نی منی دسبندی ایش اِنت کہ اے درگت ءَ پٹ ءُ پولے بہ بیت پرچاکہ اے بلائیں سماجی ناروائی ئے کہ مئے بازیں محلوک ہمے لوڑیگ ءُ اُستا ءِ گال ءَ ٹک ءُ بولک سرپد بنت حالانکہ اصل گپ اے وڑ ءَ نہ اِنت۔
چوش کہ اُستایانی بلائیں ارزشتے بیتگ۔ اے سکیں محنت کشّیں مھلوکے بیتگ۔ چہ درستیں قوماں جوڑ بیتگ، اُستایاں رِند، لاشاری، رئیس ءُ دگہ دگہ بازیں قوم ہوار اَنت۔ ہرکس ءَ کہ آہن کاری یا سُہر ءِ کار ءُ بار بزاں زرگر یا تحت ءُ منجو ءُ ایدگہ ساز ءُ سامان جوڑ کتگ آ اُستا گْوشتگ اِش ءُ مزن مزنیں جنگانی نیام ءَ اُستا گون بیتگ اَنت، جنگی ازباب کہ پْرشتگ اَنت گڑا ہمے اُستایاں جنگ ء میان ءَ ہمے ساز ءُ سامان پد ءَ اڈ کتگ ءُ داتگ اَنت۔
نی بدبحتی ایش اِنت کہ ہمے محنت یا ہمے کار مئے محلوک ءَ زاتے یا ٹک ءُ بولکے جوڑ کتگ۔ بلے راستی اے وڑ ءَ نہ اِنت، واجہ مولانا روانبد گْوشیت:
کُل بلوچ یکیں لوگ ءِ فرزند اَنت
گوں ہمے یکیں جامگ ءُ شلوار
نی اے اُستایانی توک ءَ رِند ہم بیت کنت، حوت کم بیت کنت، لاشاری ہم بیت کنت، رئیس ہم بیت کنت ءُ دگہ دگہ بازیں قوماں ہم ہمے کار کتگ گڑا آیاں ہم ہمے اُستا ءِ نام اِش گْوشتگ، بلے راست چوش نہ اِنت، راست اے وڑ ءَ اِنت کہ مولانا روانبد ءَ بچار کہ چے گْوشیت کہ
کل بلوچ یکیں لوگ ءِ فرزند اَنت
گوں ہمے یکیں جامگ ءُ شلوار۔

اد ءَ من دگہ گپے گیش کنگ لوٹاں کہ من ءَ میر امین اللہ میر چاکر کہ ہستیں وہد ءِ ٹک ءُ بولکانی مزنیں پٹ ءُ پولکارے آئی ءَ ٹک ءُ بولکانی دْرچ ءَ سک پٹ ءُ پول کتگ، ءُ باز شریں شریں چیز ئِے دیم ءَ آؤرتگ، گڑا آئی ءَ من ءَ یک روچے اے ہم گْوشت،انچش کہ من بُرز ءَ نبشتگ کہ واجہ مولداد ءَ گْوشتگ اَت، آئی ءَ اے ہم گْوشت کہ اُستا ٹّک ءُ بولکے نہ اِنت بلکیں اے ہنر ءُ کِردے۔
میر چاکر ءِ مات ءِ پت میر شیحان ولد شہسوار ولد میر شہداد، ولد نوروز کہ میرجلال حان ءِ بْرات بیتگ۔ آ سُہر ءِ یک بلائیں تاجرے بیتگ، آئی ءَ سُہر ءِ کار ءُ بار کتگ۔ افغانستان داں ایران ءُ ہرچی کہ نزیک گْور ءِ ملک بیتگ اَنت،آئی ءِ سُہر ءِ کار ءُ بار بیتگ، آئی ءَ گْوشتگ ہرچی کہ زرگر اَنت اے گیشتر رِند اَنت، اے گیشتر چہ رِند ءِ قبیلہ ءُ ٹک ءَ اَنت بلے چوش کہ ایشاں ہمے سُہر ءِ کار ءُ بار کتگ گڑا ایشاں ہمے اُستائی نام پِر لِچّ اِتگ۔

گُڈسر ءَ من واجہ میر امین اللہ ءِ منّت ءَ گراں کہ واجہ ءَ گوں من اے پٹّ ءُ پول ءِ دْرچ ءَ سک باز مدت ءُ کمک کتگ۔