انوگیں وہد ءَ اگاں ما بچاریں ما وت ءَ موبائل ءُ سوشل میڈیا ءِ زندان ءَ بندیگ جوڑکتگ، چیزیں سال پیسر موبائل ایوک ءَ راہوت ءِ وسیلگ بوتگ ہمک مردم ءِ گورا نہ بوتگ بلے انو ما گندیں مزنیناں ابید چُک چُک ءِ گورا موبائل است ءُ آ تیوگیں روچ ءَ گوں ہمیشی ءَ دلگوش انت۔ وانگ ءُ زانگ ءِ شوق ہم کم بُوان اِنت۔

ایندگہ کتاباں ابید آچہ وتی درسی کتاباں ہم دور بوان انت ۔ مئے بد بحتی ہمیش اِنت کہ مئے لیاری ءِ تہا کتاب جاہ ( Library) نیست۔ یک زمانگے بوتگ اَنت بلے کس نہ زانت آ کجا گار بوت انت ،انوں یک دو انجمن است کہ آہانی تہا کتاب ہم بندیگ اَنت بزاں کباٹانی تہا کُبل اَنت ایوک محلوک آیاں دیست کنت بلے ونت نہ کنت آ بس پہ نام کتاب جاہ اَنت ، ما اے نیمگ ءَ ہچبر دلگوش نہ داتگ کہ مئے میتگ ءَ کتاب جاہ پرچہ نیست ؟ اے باز المی اِنت دانکہ مئے چک ،مئے نودربر کتاب ،کتاب جاہ ءُ وانگ ءُ زانگ ءِ ارزشت ءَ بہ فہم اَنت ،
مئے چاگرد ءِ وانندگ ءُ سرپدیں مردم کس اے بابت ءَ نہ جیڑیت ،جہد ہم نہ کنت ایشاں وت ءَ چہ اے غم ءَ آجو کتگ ۔
چیزیں روچ پیسر یک جارے شنگ اِت کہ چہ Happy Learning School ءِ نیمگ ءَ لیاری جھٹ پٹ مارکیٹ ءَ دو روچی (Mini Book Festival)منی بک فیسٹیولے برجم دارگ بوتگ ،دل ءَ تاہیر رست کہ اے باز جوانیں گامگیج انت
فیسٹیول 25 ءُ 26 جولائی 2025 برجمینگ بوت۔ من گوں سنگتانی ہمراہی ءَ شتاں۔مراگاہ باز وش ءُ ڈولدار اَت۔ ہمک نیمگ ءَ اسٹالاں کتاب درپشگ ءَ اِت اَنت ادیب ،استاد ،نودربر ،لس محلوک ءُ زالبول ہم مزنیں کساسے ءَ ساڑی اِت اَنت،لہتیں کتاب زورگءَ اَت ۔لہتیں وتی دل دوستیں کتاب ءَ شوہاز ءَ اَت باز وشیں ماحولے اَت ِ
من منیب رزاق ،زبیر رزاق ءُ آہانی تیوگیں ٹیم ءَ گوں دل ءِ جہلانکاں مراد بات پیش کناں، شاہ زانتانی گوشگ اِنت کہ علم چہ بہر کنگ ءَ گیش بیت مئے ورنا گوں وتی علم ءِ چراگ ءَ لیاری ءِ تہاریں دمکاں رژناہ کنگ ءِ جہد کنگ ءَ انت
اے مئے درپشوکیں استال ءُ مئے باندات انت ما امیت کناں کہ اے دیمتر ءَ ہم بک فیسٹیول برجم دار انت ءُ لیاری ءِ تہا ہمے رنگ ءَ جوانیں چاگردے جوڑ کن اَنت۔۔