کوئٹہ: بلوچستان میں انٹرنیشنل یوتھ ڈے کے موقع پر ایک پُروقار اور جوش و خروش سے بھرپور تقریب کا انعقاد ایوب اسٹیڈیم، کوئٹہ میں کیا گیا۔ اس تقریب کا اہتمام بلوچستان یوتھ ریسورس سینٹر (BYRC) نے کیا، جس میں بڑی تعداد میں نوجوانوں، ماہرین اور مختلف شعبہ ہائے زندگی سے تعلق رکھنے والے افراد نے شرکت کی۔

تقریب کے دوران محمد اقبال، جو مانیٹرنگ، ایویلیوایشن، ریسرچ اور کوالٹی اشورنس اسپیشلسٹ ہیں، نے خطاب کرتے ہوئے نوجوانوں کی اہمیت اور ان کے کردار پر زور دیا۔ انہوں نے کہا کہ عالمی یوتھ ڈے کا مقصد نوجوانوں کو ان کے حقوق و فرائض سے آگاہ کرنا اور معاشرے میں ان کے مثبت کردار کو فروغ دینا ہے۔ انہوں نے بلوچستان یوتھ پالیسی کے تحت نوجوانوں کی فلاح کے لیے جاری اقدامات جیسے کیریئر کونسلنگ، اسکالرشپ گائیڈنس، اسکل ڈویلپمنٹ اور اسٹارٹ اپ سپورٹ کی تفصیلات بھی پیش کیں۔

کاشف خان، ہیومن کیپیٹل ڈویلپمنٹ اسپیشلسٹ، نے BYRC کے قیام اور ترقی پر روشنی ڈالتے ہوئے اعلان کیا کہ جلد ہی BYRC کی ویب سائٹ اور ڈیجیٹل ایپ لانچ کی جائے گی تاکہ بلوچستان کے دور دراز علاقوں کے نوجوان بھی ان سہولیات سے فائدہ اٹھا سکیں۔ اس موقع پر BYRC کی سرگرمیوں پر مبنی ایک ویڈیو بھی دکھائی گئی جسے شرکاء نے خوب سراہا۔

تقریب کو مزید دلچسپ بنانے کے لیے متعدد انٹرایکٹو اور تخلیقی سرگرمیاں منعقد کی گئیں، جن میں “Find Someone Who” نامی کھیل، گروپ ڈسکشنز، ٹیم بلڈنگ گیمز اور تخلیقی اظہار کی مشقیں شامل تھیں۔ ان سرگرمیوں کا مقصد شرکاء کے درمیان باہمی روابط، اعتماد سازی اور تعاون کو فروغ دینا تھا۔

تقریب کے اختتام پر یوتھ ڈے کا کیک کاٹا گیا اور شرکاء نے یادگار تصاویر بنوائیں۔ نوجوان شرکاء نے اس تقریب کو نہایت مفید قرار دیا اور مطالبہ کیا کہ ایسے پروگرامز تسلسل کے ساتھ منعقد کیے جائیں تاکہ نوجوانوں کی صلاحیتوں کو نکھارا جا سکے۔

شرکاء کا کہنا تھا کہ اس طرح کی تقریبات نہ صرف معلوماتی ہوتی ہیں بلکہ یہ نوجوانوں میں خود اعتمادی اور قیادت کی صلاحیتیں پیدا کرنے میں بھی مددگار ثابت ہوتی ہیں۔