لیاری کراچی شہر ءِ چہ درستاں کوہنتریں حلک ءُ دمگ انت ،لیاری بلوچی لبزانک ،ساز ءُ زیمربلوچی دودءُ ربیدگ ءِشہ رگ پہمگ بیت ادامزن نامیں گشندہ ءُ سازندہ ودی بوتگ انت آیانی تہا فیض محمد بلوچ ،استاد ستار بلوچ ،جاڑوک ،شفیع بلوچ ، عزیز بلوچ، ولی محمد ، نورمحمد نورل ءُ دگہ بازینیں اے لڑءَ ہوار انت ، اے گشندہاں بلوچی سازءُ زیمر نوکیں رنگے ءَ دیم ءَ آؤرتگ ایشاں ایوک کراچی ءُ بلوچستان ءَ نہ بلکیں مزن ہورءُ ایندگہ ملکاں وتی شِرکنیں توار ءِ سحر تالان کتگ چہ ھمیشاں یک نامے واجہ رحیم بلوچ ئیگ انت
 رحیم بلوچ 1947ء ءَ لیاری ءِ دمگ نوکیں لین ءَ ودی بوتگ ، چونہا آئی ءِ پت واجہ اسماعیل بن ءَ کلانچ ءِ مردم انت بلے آگوں وتی کہول ءَ چہ کلانچ ءَ لڈاِتگ ءُ لیاریءَ جہمنند بوتگ، رحیم بلوچ چہ کسانی ءَ سازءُ زیمر ءِ شیدائی بوتگ ءُ سئوت گشگ ءِ شوق ئےِ بوتگ شکر ورنائی ءَ لاپءِ شوھاز ءَ چہ ادا درکپیتءُ امارات ءَ رؤت1970۰ ءَ واجہ چہ امارات ءَ کراچی ءَ وتی آروس ءَ کئیت ، اے وہدءَ ٹیپ ریکارڈ ءِ دؤر بوتگ لیاری ءَہوٹل بہ بنت یا دکان ہرچ گورا ٹیپ ریکارڈ الم بوتگ ۰جاھے جاڑوک ءِ سئوت پر انت ،جاہ ئے استاد ستار، عزیز ءُ جاھے فیض محمدءِ سئوت پر انت ،اے زمانگ ءَ لیاری ءِ تہاکسے ہم آروس بوتگ گڑا ورائٹی پروگرام ءُ بلوچی دیوان الم بوتگ ، رحیم بلوچ ءِ آروس ءَ ہم دیوانے بوتگ آ دیوان ءِ تہا جاڑوک ، غلام ، قادوک ءُ بینجو ماسٹر استاد رحمت بوتگ انت بلے اے دیوان ءَ رحیم بلوچ ءِ سنگت ھُج کن انت کہ تو ہم گشندہ ئے مروچی سوتے بہ جن ما ترا گوشدارگ لوٹیں،رحیم بلوچ بندات ءَ سئوت جنگ ءَ راضی نہ بیت کہ آ وت سالونک انت بلے سنگتانی بازیں گوشگ ءَ آلاچار بیت ءُ اے سئوت ءَ گشیت۔
 تو رنج مہ بو منی مات من کہ رواں دبئی ءَ
 ارساں مہ ریچ پہ من زندگ بیاں من کایاں
 چہ اے سئوت ءِگوشگ ءَ رند ہمینچو گشندہ اِت انت دراہ حیران بوت انت آئی ءِ توار اش سک دوست بوت گڑا ہمے وہد ءَ استاد رحمت ءَ سلاہ جت کہ روچے بیا منی کلب ءَ ،اے دؤر لیاری ءِ تہا بازیں کلب بوتگ انت کہ ہر کس ءَ زیمل ءِ حب بوتگ چہ ہمدا ساز ءُ زیمر اش دربرتگ گشندہ جوڑ بوتگ انت، چیزیں روچاں رند رحیم بلوچ رؤت استاد رحمت ءِ کلب ءَ استاد گوشیت تئی توار باز وش انت من ءَ دوست بوت من لوٹاں تئی توار ءَ دو سئوت گراموفون کمپنی ءَ ریکارڈ بہ کناں رحیم گَل بیت کہ گراموفون کمپنی ءَ منی سئوت ریکارڈ بنت ، استاد رحمت َ وتی جوڑ کتگیں دو دھن گوں شعراں رحیم بلوچ ءَ دنت کہ تو دھن ءُ شعراں یات گر دو سئے روچ ءَ رند تئی ریکارڈنگ بیت چہ ایں شعراں یک شعرے حضرت شاہ ئیگ ات ۔
 کندان ءَ سر ءَ وتی رندان ءَ
تئی سیاہ ماریں زلفاناں
 منی جان کت اش من ءَ دیوانہ
 ءُ دومی شعر خیر جان ئیگ ات
 او منی جانی تو چوں بے گمان ئے
 من ءَ وللہ تو دوستی نہ زان ئے

 چہ اے سئوتانی ریکارڈ ءُ شنگ بوئگ ءَ رند کندان ءَ سر ءَ وتی رندان ءَ سک باز نامدار بوت چہ ایشیءَ رند رحیم بلوچ ءِ جوانیں نام ءُ پجارے جوڑ بوت مردماں آئی ءِ توار ءُ سئوت گوشگ ءِ داب سک دوست بوت آ نامدار بوت کہ آئی ءِ توار گوں ہندوستان ءِ نامداریں گشندہ محمد رفیع ءَ گوں باز نزیکی کنت،
 رحیم بلوچ ءِ سئوت کراچی ءُ بلوچستان ءَ ابید مزن ہورءَ ہم باز گوشدارگ بوت انت لیاری ءِ ہمک ہوٹل ءُ دکان ءَ رحیم بلوچ ءِ ریکارڈ پر اَت ءُ گوشداروکاں وشنود کنگ ءَ ات
 چیزے سال ءَ رند رحیم بلوچ ءَ رفیق او کے ءِ کلب ءَ یک المبے کت آئی ءِ سئوت
 دل ءِ سوچگ ءَ اے شراب ءَ ور آں
 مروچی دگہ ڈول ءُ داب ءَ ور آں
 ءُ دومی
 غمانی آس روک انت دل سچان انت
 جدائی دلبر ءِ پہ من گران انت
 باز گوشدارگ بوت انت پدا آ ہمک آروسی دیوان ءِ براہ جوڑ بوت، کراچی ءِ بازیں آروسی دیواناں سئوت ئےِ جت، دیواناں آئی ءَ لہتیں نوکیں پر بند ہم گوشتگ آ ہم نامدار بوتگ انت، چو کہ
 گُل کندان ءَ چو مہ رو ملان ءَ
 کنت انت نظر ترا اے ظالمیں زمانہ،
 بیا او بارگ بیا
 من تئی سر ءَ دل کن آں فدا
 1990 ءِ دہک ءَ گلشن اقبال کراچی ءَ یک آروسی مراگشے ءَ سہیل بلوچ ءُ رحیم بلوچ رونت آوہد ءِ اردو ءِ جوانیں گشندہ سلیم جاوید ہم اے دیوان ءَ ہوار ات ۰رحیم بلوچ آدگہ سئوتانی ہواری ءَ کندان ءَ سر ءَ وتی رندان ءَ ہم گوشیت سلیم جاوہد ءَ اے سوت سک دوست بیت۰رحیم بلوچ ءَ گوشیت کہ ہمے دھن ءُشعر ءَ من ءَ بدئے ، دیمتر ءَ ہمے دھن ءَ اردو شعرے ہوار کنت بلے برز ءِ بند ءَ مٹ نہ کنت ہمے بلوچی ئےِزرت
 کندان ءَ سر ءَ وتی رندانءَ
 دیوانہ میں تیرا دیوانہ
 تو شمع میں ہوں پروانہ۔
اے سئوت ہم باز نامدار بوت،
 رحیم بلوچ اصغر لعل ءَ گلگدارے
 ءَ گوشیت کہ 1968 من امارات ءَ رو آں اود ءَ لہتئں انچیں سنگت شوھاز اِت کہ آہاں گشندھی ءُ تامُر ءِ شوق ات ،اود ء َ یک کلبے ہم است ات من آ کلب ءِ باسک جوڑ بوتاں ہمک پنچ شمبے ءُ آدینگ ءِ روچ ءَ دیوان بیتگ بے ساز ءَ درستاں سئوت گشتگ ءُ من گیشتر محمد رفیع ءِ غزل گشتگ انت اودءَ بازیں مردم اتکگ سئوت ءِ گوشدارگ ءَ ،
 1968 ءَہمک دبئی ءَ ہمک نیمگ ءَ محمد رفیع عکس لگ اِتگ ات انت ما سر پد بوتاں کہ مراگشے بوئگی انت ، چہ درستاں پیسر من ھما اسپانسرءُ آئی ءِ ڈس ء ُ نشان ءِ شوھازگءَ سوبین بوتاں ، آئی ءِ نام عباس ات رپت آں آئی ءِ لوگ ءَ ، لوگ ءِ دیم ءَ ہم رفیع صاحب ءِ بلائیں عکسے لگ اتگ ات من دروازگ ٹُک ات مردمے اتک من گوشت عباس بھائی ءَ بگش رحیم بلوچ اتکگ ھما دمان ءَ عباس بھائی اتک ءً من ءَ وش آتک ئےِکت
 لوگ ءَ برت ئےِ ،گوشت ۓِ من زانتگ تو الم من ءَ شوھازئے آئی ءَ فرمائش کت کہ تو پیسرا من ءَ محمد رفیع ءِ غزلے گوشدارین ،من غزل گوشدارینت آوش بوت من ءَ مراگش ءِ ٹکٹ ئےِ دات بزاں اے مرد بوتگ کہ ما کلب ءِ ڈن ءَ دیوان کتگ غزل گوشتگ اے ہما گوشداروکاں ہوار بوتگ ۔
 مراگش ءِ روچ ءَ ما دراہ رفیع ءِ لوٹوک آئیءِ گِندگ ءُ دو گپ کنگ ءَ اوشتاتگ ات ایں کہ عباس بھائی رفیع صاحب ءِ ہمراہیءَ اتک ءُ آئی ءَ منی پجار کنائینت کہ اے رحیم بلوچ انت تئی توار ءَ سئوت گوشیت آئی ءَ بچکند ات ءُ گوشت” ما الم ترا گوشداراں “مراگش ءَ پد آئی ءَ من ءَ گوشداشت آباز وش بوت چہ ایشی ءَ رند مئے یک ءُ دومی ءَ گوں نزیکی بوت۔ (کتاب” زیمر تران “)
 1972 ءَ رحیم بلوچ امارات ءِ آرمی ءَ بھرتی بوت ، بلے ساز ءُ زیمر ءِ دنیا ءَ یک گشندہ ءِ جہتےءَ آئی ءِ یک جوانیں پجارے جوڑ بوت،
– [ ] وھدے ہندوستان ءِ گشندہانی ٹیمے امارات ءَ پروگرام ءَ کئیت آ پروگرام ءَ رحیم بلوچ ہم روت گوں آہاں گِند ءُ نند کنت آیاں گشیت کہ من ہم گشندہےآں شمئے مراگش ءَ سئوت گوشگ لوٹاں ،آاجازت دیئنت بیا بہ گوش ،سئوت گوشگ رند آچہ رحیم بلوچ ءِ توار سک متاثر بنت ءُ وتی ٹیم ءَ ھوارئےِ کن انت۔
 1073 ءَ آ اولی رند ءَ ہندوستان ءِ شہر ممبئی ءَ روت ، ممبئی ہما شہر انت کہ ہندوستان ءُ درملک ءِ مردم وتی بحت ءِ چکاسگ ءَ کاینت باز جہد کن انت لہتیں پشت کپ ایت ءُ لہتیں سوبین بیت زوت استال جوڑ بنت،
– [ ] واجہ رحیم بلوچ ءَ ہم موہ رسیت کہ ہندوستان ءِ سرڈگار ءَ وتی ازم ءَ پیش بہ دار ایت آوتی ٹیم ءِ ہمراہیءَ بازیں مراگشاں سئوت گوشیت بازیں زیمری ءُ گوشندہاں گوں گِند ءُ نند کنت ، بپی لہری ، نوشاد ، ءُ انو ملک ءَ آئی ءِ سنگتی بیت۔
 رحیم بلوچ قصہ کنت کہ یک روچے رفیع ءِ لوگ ءَ شتاں ہمود ءَ دیوان کت رفیع صاحب ءَ شعر گوشت پدا من ءَ گشت ئےِ کہ نوں تو شعرے بہ گوش وہدے من سئوت ءِگوشگ ہلاس کت آئی ءَ گوشت کہ مروچی من ترا نامے دیاں ”روحِ رفیع “ رحیم بلوچ اولی بلوچی گوشندہ انت کہ آئی ءَ ہندوستان ءِ مزن نامیں گشندہ محمد رفیع ءَ روحِ رفیع ءِ لقب داتگ ۔
 رحیم بلوچ باز رند ءَ ہندوستان ءَ شتگ ساز ءُ زیمرءِ مراگشاں بہرئےِ زرتگ آئی ءِ گوشگ ءِ ردا یک رندے آئی ءِ گند ءُ نند گوں ہندوستان ءِ نامداریں زیمر کار موہن خان ءَ بیت آئی ءَ رحیم بلوچ ءِ آواز دوست بیت آرحیم ءَ گشیت کہ منی تامر ءَ دو سئوت بہ گوش اے واجہ رحیم بلوچ ءِ بحت ات پرچا کہ ہندوستان ءِ جند ءِ مردم اے جاہ ءَ سر بوئگ ءَ باز جہد کن انت بلے بازیناں موہ نہ رسیت رحیم بلوچءَ اے موہ رستگ ات کہ وتی توار ءَ سرجمیں دنیا ءَ سر بہ کنت آ دو تامرانی سئوتاں گوشیت یک تامر ےءِ نام ” سمرین“ دومی ءِ نام ”ہم سب اکیلے ہیں “ آ سئوتاں ریکارڈ کنت
 ہم سب اکیلے ہیں شعر ایش ات
 جھوٹے زمانے کے میلے ہیں
 ہم سب اکیلے ہیں
 بلے ادا رحیم بلوچ ءِ بحت وفا نہ کنت دوئیں تامر ریلیز نہ بوت انت، ایں تامر ریلیز بوتین انت گڑا الم رحیم بلوچ ہندوستان ءِ یک Play back singer ءِ جہت ءَ نامدار بوتگ ات ، رحیم بلوچ مئے ہما گوشندہ انت آئی ءَ وتی ازم ہندستانءِ ساز ءُ زیمر ءِ دنیا ءَ تالان کتگ ، ہندوستان تامری دنیا ءَ جوانیں رنگے ءَ سوبینی نہ رسگ ءِ مزنیں سبب زیمر ءِ علم ءَ نہ آشنائی ات آئی ہرچے زانتگ ات ھدائی داد ات چہ رسمی زیمر ءِ استادے ءَ علم ئےِ در نہ برتگ ۔
– [ ] ہندوستان ءِ تہا رحیم بلوچ ءَ مزن نامیں ازمکار دلیپ کمار ، امیتابھ بچن ، لتا منگیشکر، ہیمامالنی ، شتروگن سنہا ، محمد عزیز ءُ دگہ بازیں ازمکاراں گوں گِند ءُ نند کتگ،
– [ ] آگوشیت کہ یک رندے راج کمار ءِ تامر ءِ شوٹنگ بیت من لوٹاں کہ راج کمار ءَ بہ گنداں دوگپ بہ کناں بلے اودء َ متھن چکرورتی ءُ شرمیلا ٹیگور ساڑی ات انت آیاں گوں گپ ءُ حال کت ءُ راج کمار ءِ جست کت آیاں گوشت کہ آ میک اپ روم ءَ انت بلے انوں آ گوں کس ءَ دوچار نہ کپیت من ءَ اوپار نہ شت دروازگ ٹُک ات چہ تہاراج کمار آواز ات کہ تو کے ئے ؟ من درائینت رحیم بلوچ چہ پاکستان ءَ بلوچستان ءَ ترا گندگ لوٹاں گڑا آئی ءَ من ءَ تہا لوٹ ات ،تہاشتاں من ءَ وش آتک ئےِ کت شریں وڑے ء َ حال احوال بوت گڈی درائینت ئےِ دکہ رندے اگا ہندوستان ءَ تئی سر کپت پہ من بلوچستان ءِ زمین ءِ چنکے ھاک بیار چیا کہ من ہمودا لورالائی ءَ پیدا بوتگاں ، چیزے روچاں رند پدا من شت آں کراچی ءُ پدا بلوچستان ءَ شت آں اودا پہ راج کمار ءَ حاک زرت وتی گورا ایر کت انت چیزے وہد ءَ پد منی رؤگ ممبئی ءَ بوت بلے اے وہدءَ راج کمار ءَ اے دنیا یل کتگ ات ءُوتی دائمی جاہ ءَ شتگ ات من حاک برت لوگ ءَ آئی ءِ بچک ءَ دات انت کہ تئی پت ءِ واہگ بوتگ کہ پہ من بلوچستان ءِ حاک ءَ بیار ۔ (رحیم بلوچ ، گلگدار ” زیمر تران“)
– [ ] رحیم بلوچ 1980 ءَ لیاری یل ءَ کنت ءُ کراچی دمگ گارڈن ءَ جہمنند بیت ، آداں 22 سال ءَ امارات آرمی ءَ بیت 1992 ءَ ریٹائرڈ بیت ،
– [ ] گڈ سر ءَ نادراہی ءِ آماچ بیت 30 جنوری 2025ءَ پنچ شمبے ءِ روچ ءَ اے کوڈہیں جہان ءَ یل ءَ کنت ءُ گڈی حنکین ءَ سر بیت
– [ ] آئی ء ِ قبر میوہ شاہ قبرستان کراچی ءَ انت ،
– [ ] رحیم بلوچ ءَ وتی ازم ءُ گوں دلکشیں توار ءَ محلوک ءِ دلاں جاگہ کتگ آئی ءِ وشیں توار ءِ سحر ءَ مزن نامیں گشندہ ، زیمرکار ءُشاعر گرفتاربوتگ انت ،
– [ ] رحیم بلوچ ءِ وڑیں ازمکار مئے راج ءِ مڈی انت بائد انت آئی ءَ ستک شانی پیش کنگ ءِ حاترا آئی ءِ سالروچ دارگ بہ بیت،
‎ واجہ رحیم بلوچ ، بلوچی ساز ءُ زیمر ءِ بن دفتر ءُ وتی لوٹوک ءُگوشداروکانی دلاں زندگ 
زندگ انت