کوئٹہ : بلوچی  اکیڈمی  ءَ  بلوچی زبان ءِ ڈیجیٹائز کنگ ءِ کاراں گیشی آراں  بلوچی زبان ءِ مستریں   لبز بلد  ’’لبزگنج‘‘   ءِ نام ءَ آن لائن  شِنگ کُتَگ۔  اے ڈکشنری  ءَ  چِلّ ہزار  ءَ گیش  بلوچی لبز ءُ آہانی معنا،  بلوچی ءِ لبزانی  انگریزی، اُردو ءُ براہوئی معنا   ہوار اَنت۔ لبزگنج     ڈیجیٹل ڈکشنری    بلوچی اکیڈمی ءِ پراجیکٹ  این ایل پی بلوچی  ءِ چیردستی ءَ  جوڑ کنگ بُوتگ۔ ڈکشنری ءِ اے کار  2023 ءَ بندات کنگ بُوتگ ءُ  ڈکشنری اولی  ورژن   سرجم کَنَگ ءُ   آن لائن شِنگ کنگ بُوئگ ءَ اِنت۔

بلوچی اکیڈمی ءِ کماش   ءُ این ایل پی بلوچی  پراجیکٹ  ءِ کوارڈینیٹر    ہیبتان عمر  ءَ لبز گنج ءِ بابت ءَ ترٛان کُتَگ ءُ گوٛشتگ کہ بلوچی اکیڈمی ءَ  چِد ءُ ساری   واجہ جان محمد دشتی ءِ شونکاری ءَ    بلوچی لبزبلد  ،  ڈاکٹر نصیر دشتی ءِ شونکاری ءَ  بلوچی انگریزی لبز بلد ءُ  انگریز  بلوچی لبزبلد ءُ پناہ بلوچ ءِ شونکاری   بلوچی ، اردو،  براہوئی ءُ سندھی لبزبلد   چھاپ ءُ شِنگ کُتَگ اَنت۔ نوں ہمے لبز بلد  ڈیجیٹل دروشم ءَ شاہیگان تر کُتگ ءُ  آن لائن  شِنگ کُتَگ۔ آئی ءَ گوٛشتگ کہ اے اولی  ورژن انت کہ  دیمترا   ایشی ءِ لبزانی   گیشی ءَ ہوار    نِزوری  دَر کَنَگ ءُ    ایشی ءِ کار  برجم دارگ بیت۔ اے آن لائن لبزگنج   پہ   بلوچی زبان ءِ نودربر، پولکار  ءُ وانوکاں  سیتّ   مند اِنت۔

بلوچی     لبز گنج ڈکشنری   بلوچی  اکیڈمی ءِ  بلوچی  زبان ءَ   ڈیجیٹائز کنگ ءُ   اے آئی ءُ کمپیوٹر ٹیکنالوجی ءِ ضرورتاں        ہمگرنچ   کنگ ءِ یک جُہدے۔ بلوچی اکیڈمی پہ بلوچی  زبان ءُ ادب ءِ پہازگ ءُ دیمروئی ءِ جُہدان انت  ءُ اے  کار  ہمے جُہدانی   برورد اِنت۔