حماس نے جمعرات کو یروشلم اور تل ابیب کی جانب راکٹ داغے جبکہ اسرائیل نے فلسطینی عسکریت پسند تنظیم کو کچلنے کا عہد کیا ہے۔ البتہ امریکی صدر جو بائیڈن نے امید ظاہر کی ہے کہ غزہ میں جاری جھڑپوں کی شدت میں جلد کمی آئے گی۔

الصبح ہونے والے حملوں میں ہلاکتوں کے حوالے سے اب کوئی اطلاعات نہیں موصول ہوئیں۔ خبر رساں ادارے روئٹرز کے مطابق پیر سے غزہ میں جاری جھڑپوں اور بمباری سے اب تک 67 افراد ہلاک ہو چکے ہیں جبکہ اسرائیل میں سات اموات ہوئی ہیں۔ ہلاک ہونے والوں میں 17 فلسطینی بچے بھی شامل ہیں۔ اس کے علاوہ 400 سے زائد افراد زخمی اور ہزاروں بےگھر بھی ہوئے ہیں۔

دنیا کی بڑی طاقتیں اس وقت خطے میں جنگ بندی پر زور دے رہی ہیں اور واشنگٹن نے کہا ہے کہ وہ اپنا فلسطینیوں اور اسرائیل کے درمیان بات چیت کروانے کے لیے اپنا خصوصی نمائندہ بھی بھیجیں گے۔

صدر بائیڈن نے بدھ کو اسرائیلی صدر بنیامن نتنیاہو سے گفتگو کے بعد کہا ‘مجھے امید ہے کہ یہ معاملہ جلد از جلد ختم ہو جائے گا تاہم اسرائیل کو اپنا دفاع کرنے کا حق ہے۔’

اگرچہ صدر بائیڈن نے یہ نہیں بتایا کہ وہ یہ بات کس بنا پر کہہ رہے ہیں لیکن اسرائیلی وزیر اعظم کے دفتر سے جاری ہونے والے ایک بیان میں بتایا گیا تھا کہ نتنیاہو نے ان سے کہا تھا کہ اسرائیل ‘حماس اور غزہ میں متحرک تمام دہشت گرد تنظیموں کی صلاحیتوں پر حملے جاری رکھے گا۔’