جیوانی کے علاقے دران میں لائٹ ہاؤس کے قریب پاکستان کوسٹ گارڈ (پی سی جی) کی گشت کرنے والی پارٹی پر آج شام تقریباً 7 بج کر 20 منٹ پر دیسی ساختہ بم (آئی ای ڈی) سے حملہ کیا گیا۔ دھماکے کے نتیجے میں ایک اہلکار شہید ہوگیا۔

تفصیلات کے مطابق گشت پر مامور پی سی جی اہلکار معمول کے مطابق اپنی ڈیوٹی انجام دے رہے تھے کہ اچانک ایک زور دار دھماکہ ہوا۔ دھماکے کے بعد علاقے میں خوف و ہراس پھیل گیا۔ سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے۔

دھماکے کی نوعیت کا تعین کیا جا رہا ہے، اور متعلقہ حکام نے واقعے کی مزید تحقیقات کا آغاز کردیا ہے۔ شہید اہلکار کی لاش کو قریبی ہسپتال منتقل کر دیا گیا ہے۔

دھماکے کی مذمت کرتے ہوئے حکام نے کہا ہے کہ دہشت گردی کے خلاف جنگ میں کسی قسم کی کوتاہی نہیں برتی جائے گی اور مجرموں کو جلد انصاف کے کٹہرے میں لایا جائے گا۔