اوتھل: پاکستان کوسٹ گارڈز کی گزشتہ ایک مہینے کی کاروائیوں میں بلوچستان کے علاقے اوتھل، گوادر، پسنی سے اعلیٰ کوالٹی کی چرس ، آئس اور ڈیزل برآمد، منشیات کی عالمی مارکیٹ میں مالیت 73.631 ملین ڈالر کے لگ بھگ بتائی جاتی ہے، پاکستان کوسٹ گارڈز نے ماہانہ کاروائیوں کی رپورٹ جاری کردی۔

پاکستان کوسٹ گارڈز کے ترجمان کی پریس ریلیز کے مطابق پاکستان کوسٹ گارڈز نے گزشتہ ایک ماہ کے دوران اپنی انٹیلی جنس کی بنیاد پر بلوچستان کے مختلف علاقوں میں کاروائیاں کرتے ہوئے 8 لاکھ 23 ہزار 4 سو 52 لیٹر غیر قانونی ایرانی ڈیزل کی اسمگلنگ ناکام بنا دی۔

اس کے علاوہ دیگر کارروائیوں میں 135 کلوگرام میتھ آئس اور 652.5 کلوگرام چرس کی اندرون بیرون ملک اسمگلنگ کو ناکام بنایا۔ مذکورہ منشیات اور ڈیزل قبضے میں لے کر قانونی کاروائی کا آغاز کر دیا گیا ہے۔ پکڑی جانے والی منشیات کی عالمی مارکیٹ میں مالیت 73.631 ملین ڈالر کے لگ بھگ ہے۔

واضح رہے کہ پاکستان کوسٹ گارڈ ز ہر قسم کی منشیات اور غیر قانونی اشیاء کی اسمگلنگ کی روک تھام کے لئے ہمہ وقت مصروف عمل ہے اور ملکی معشیت کو مستحکم کرنے میں اپنا کردار ادا کرتی رہے گی۔