کوئٹہ:وزیر اعلیٰ بلوچستان میر سرفراز بگٹی کی زیر صدارت امن و امان سے متعلق اعلیٰ سطحی اجلاس ہوا، جس میں جعفر ایکسپریس پر دہشت گردانہ حملے کے بارے میں ایڈیشنل چیف سیکرٹری داخلہ نے بریفنگ دی۔ وزیر اعلیٰ نے حملے کو ناقابل برداشت قرار دیتے ہوئے سخت کارروائی کا حکم دیا اور کہا کہ دہشت گرد ایک انچ پر بھی قابض نہیں رہ سکتے۔

انہوں نے مزید کہا کہ دہشت گردانہ کارروائی کا مقصد پر تشدد ماحول کا تاثر قائم کرنا ہے، لیکن ملک دشمن عناصر کا کیک کی طرح پاکستان کو کاٹنے کا خواب کبھی شرمندہ تعبیر نہیں ہوسکتا۔ وزیر اعلیٰ نے واضح کیا کہ ہمیں ہر طرح کی کنفیوژن سے نکل کر دہشت گردی کے خلاف جنگ لڑنا ہوگی اور دشمن عناصر بلوچستان کے امن کو تباہ نہیں کر سکتے، ہم انہیں ہر صورت ناکام بنائیں گے۔ عوام کے تحفظ کے لیے سیکورٹی اداروں کو ہر ممکن وسائل فراہم کریں گے اور دہشت گردوں کے سہولت کاروں کے خلاف بھی بھرپور کارروائی کی جائے گی۔ انہوں نے کہا کہ بلوچستان میں امن و امان پر کوئی سمجھوتہ نہیں کیا جائے گا

اور سخت فیصلے ناگزیر ہیں۔ وزیر اعلیٰ نے واقعے میں ملوث عناصر کو جلد کیفر کردار تک پہنچانے کی ہدایت بھی کی۔ اجلاس میں چیف سیکرٹری بلوچستان شکیل قادر خان، آئی جی پولیس معظم جاہ انصاری، آئی جی ریلوے پولیس رائے طاہر سمیت متعلقہ حکام نے شرکت کی۔