17 مئی 2022 کو سپریم کورٹ نے بالآخر ڈیڑھ ماہ بعد آرٹیکل 186 کے تحت صدر کی جانب سے بھیجے گئے ریفرنس پر اپنے رائے کا اظہار کردیا۔ گو کہ کئی سیاسی رہنما اسے عدالتی فیصلہ کہہ رہے ہیں تو انکی درستگی کرنا چاہتا ہوں کہ یہ صرف صدر مملکت کو بھیجی گئی رائے ہے کوئی فیصلہ نہیں، جس پر فوری عمل کیا جائے یا ماضی قریب میں ہونے والے اسمبلیوں کی رائے شماری پر اثر انداز ہو۔
ملکی تاریخ میں دوسری بار جمہوری دورمیں حکومت کے خلاف اپوزیشن کی جانب سے تحریک عدم اعتماد لائی جارہی ہے۔ ویسے تو ملکی تاریخ میں یہ تیسری بار عدم اعتماد کی تحریک ہوگی۔ پہلی دفعہ سن 1989 میں بے نظیر کیخلاف تحریک لائی گئی اور ناکام ہوگئی۔دوسری دفعہ شوکت عزیز کے خلاف جنرل پرویز مشرف کے آمرانہ دور میں نواب اکبر خان بگٹی کے قتل کے بعد عدم اعتماد لائی گئی ،جس میں وزیراعظم کو ہٹائے جانے کے لیے مطلوبہ ووٹ حاصل نہ کیے جاسکے۔ پیپلزپارٹی کی جب حکومت آئی تو 18ویں آئینی ترمیم میں آرٹیکل 63 اے کی بھی ترمیم کی گئی۔