انٹرنیشنل کرکٹ کونسل (آئی سی سی) نے رواں سال انگلینڈ میں ہونے والی چیمپیئنز ٹرافی کے لیے شاہد آفریدی سمیت 8 سفیروں کے ناموں کا اعلان کردیا جنھوں نے مجموعی طورپر 1774 ایک روزہ میچوں میں 48 سنچریوں کی مدد سے 51 ہزار 906 رنز بنائے اور838 وکٹیں حاصل کیں۔
آئی سی سی کی جانب سے جاری کیے گئے اعلامیے کے مطابق مستقبل کی نسل کو کھیل سے متاثر کرنے اور ٹورنامنٹ کی مقبولیت کو بڑھانے کے لیے رواں سال یکم جون سے 18 جون تک کھیلی جانے والی چیمپیئنز ٹرافی کے لیے 8 سفیروں کا اعلان کردیا گیا۔
آئی سی سی نے پاکستان کرکٹ ٹیم کے سابق کپتان شاہد آفریدی کو بھی کرکٹ کے مشہور کھلاڑیوں کے ساتھ سفیروں کی فہرست میں شامل کیا ہے۔
شاہد آفریدی کا کہنا تھا ‘میں خوش ہوں کہ مجھے آئی سی سی چیمپیئنز ٹرافی کا سفیر مقرر کیا گیا، جن کھلاڑیوں کے خلاف بین الاقوامی کرکٹ کھیلی تھی ان کھلاڑیوں کے بہترین گروپ میں شامل ہونا خوش قسمتی ہے’۔
پاکستان کے سابق کپتان نے چیمپیئنز ٹرافی میں 13 میچ کھیلے جہاں انھوں نے 14 وکٹیں حاصل کیں اور 167 رنز بھی بنائے۔
ان کا کہنا تھا کہ ‘چیمپیئنز ٹرافی ایک ایسا ٹورنامنٹ ہے جس کو پاکستان نے کبھی نہیں جیتا اور اب انڈیا، جنوبی افریقہ اور سری لنکا کے ساتھ ایک مشکل گروپ میں ہے’۔
مایہ ناز آل راؤنڈر نے کہا کہ ‘پاکستانی ٹیم کو اپنی صلاحیت پر بھروسہ کرنا چاہیے اور ہر میچ میں لطف اندوز ہونے کی کوشش کرنی چاہیے کیونکہ کامیابی کے لیے کوئی شارٹ کٹ نہیں ہوتا اور ان کھلاڑیوں کو بھی اپنے سابق کھلاڑیوں یا دیگر بہترین ٹیموں کی طرح ہی کام کرنا ہوگا’۔
آئی سی سی کی جانب سے اعلان کردہ کھلاڑیوں کی فہرست میں سری لنکا کے سابق کپتان کمار سنگاکار اور نیوزی لینڈ کے سابق تیز ترین باؤلر شین بونڈ جیسے مشہور کھلاڑی شامل ہیں۔
چمپیئنز ٹرافی کے سفیروں میں پاکستان کے شاہد آفریدی، بنگلہ دیش کے حبیب البشر، انگلینڈ کے آئن بیل، نیوزی لینڈ کے شین بونڈ، آسٹریلیا کے مائیک ہسی، ہندوستان کے ہربھجن سنگھ، سری لنکا کے کمارسنگا کارا اور جنوبی افریقہ کے سابق کپتان گریم اسمتھ شامل ہیں۔
آئی سی سی کے چیف ایگزیکٹیو ڈیوڈ رچرڈسن نے کہا کہ ‘چمیئنز ٹرافی کے آغاز میں 50 دن باقی ہیں اور ہم ان 8 بہترین کرکٹرز کو اپنے چمپیئن ایمبسیڈرز کے طور اعلان کرتے ہوئے خوش ہیں۔
ان کا کہنا تھا کہ ‘یہ پروگرام ان عظیم کھلاڑیوں کو نئے کرکٹ کےمداحوں کی نئی نسل اور کھلاڑیوں کو یکجا کرے گا کھلاڑیوں ہماری کرکٹ کے ذریعے اچھے پراجیکٹ اور کھیل کا سدا بہار ورثہ چھوڑیں گے’۔
آئی سی سی کے چیف ایگزیکٹیو نے کہا کہ ‘یہ کھلاڑی آئی سی سی کی ویب سائٹ کے ذریعے مداحوں کو اپنے مہارت اور اچھے مشوروں سے نوازیں گے اور مجھے یقین ہے کہ چمپیئنز ٹرافی کے 15 میچوں میں ہم سب ان کے تجزیوں کو پڑھ کر محظوظ ہوں گے’۔
چمپیئنز ٹرافی کا پہلا میچ میزبان انگلینڈ اور بنگلہ دیش کے درمیان اوول میں کھیلا جائے گا جبکہ تمام میچز انگلینڈ اور ویلز کے تین مقامات اوول، ایجبسٹن اور کارڈف میں کھیلے جائیں گے۔
