مروچی بزاں ۲۸ مئی ۲۰۱۷ ءَ بلوچی اکیڈمی کوئٹہ ءِ نیمگ ءَ یک روچی مجلسے پہ بلوچی ڈیپارٹمنٹ کوئٹہ ءِ ایم فل ءُُ پی ایچ اسکالرانی نیام ءَ جم دئیگ بوتگ ۔دیوان ءِ پاگواجہی بلوچی اکیڈمی ءِ کارمستر واجہ ممتاز یوسف ءُُ سنگت رفیق ءِ ہمرائی ءَ بلوچی ڈیپارٹمنٹ ءِ کارگشاد واجہ حامد علی بلوچ ءَ کتگ ۔

دیوان ءِ جارچی بلوچی اکیڈمی ءِ جنرل سیکرٹری شکورزاہد ءِ کوپگاں بوتگ ۔دیوان ءِ حاسیں مہمان واجہ اسحاق ءُُ ڈاکٹر سلیم کرد ءِ ہمرائی ءَ بلوچی کدگ ءِ اسکالر بوتگ اَنت ۔دیوان ءِ وش اتکی تران واجہ ممتاز یوسف ءَ کتگ اَت آئیءَ وتی تران ءَ گشتگ ات کہ وانگ ءُُ پولکاری ءِ ارزشت ما بیست ءُُ یکمی کرن ءَ سک باز ھاجت دارایت ءُُ بید چہ ایشیءَ ہچ راج دیمروئی کت نہ کنت ۔

ہما راج کہ پولکاری کدگاں پشت ءَ بیت آئی ءِ ہستی ماں جہان ءَ بیگواہ بیت ۔واجہ ممتاز ءَ گشتگ اَت کہ بلوچی اکیڈمی کوئٹہ ءِ ہمے واہگ اِنت کہ آ وتی پدمنتگیں اسکالراں ہرچند کہ کمک ءُُ مدت بوت کنت بدنت دانکہ راج ءَ را جوانیں مواد ءُُ نکان پولکاری دروشم ءَ دست ءَ بیا اَنت ۔

مجلس ءَ گوں وائس چئیرمین آف بلوچی اکیڈمی واجہ سنگت رفیق ءَ اکیڈمی ءِ گوں بلوچی ڈیپارٹمنت ءَ سیادی ءِ بابت ءَ تران کنان ءَ گشتگ اَت کہ ہردو بہرگانی مول ءُُ مراد یک اِنت ءُُ ہردو بلوچی زبان ءُُ لبزانک ءِ دیمروئی ءَ چاڑکگ اَنت ۔آئیءَ وتی تران ءَ بلوچی اکیڈمی ءِ ۱۹۹۵ ءِ کردان بگر داں انوگیں دیمروئی ءِ بابت ءَ گونڈگری ءَ تران کت۔آئیءَ گشتگ اَت کہ ہر دو یکجاہ کار بہ کن انت ۔واجہ رفیق ءَ مجلس ءِ اسل مول ءُُ مراد بزاں پولکار ءُُ پولکاری ءِ بابت ءَ سرپد دات ءُُ اے ہم جار جت کہ بلوچی اکیڈمی کوئٹہ وتی اسکالرانی پولکارانی کدگاں کمک ءُُ مدت دئیگ ءَ دلمانگ ا،نت ءُُ ہما پولکاری آسراتیانی بابت ءَ ءُُ پولکار ءِ جیڑگانی بابت ءَ ہم گشواری ءَ تران کت۔

درائیں پولکار بلوچی اکیڈمی ءِ بہر اَنت ءُُ ہردوکانی مول یک اِنت ءُُ ہماآنی کمک ءُُ جیڑگانی گشواری کنگ بلوچی اکیڈمی ءِ یکروچی مجلس ءِ مول ءُُ مراد ہمے بوتگ۔دیوان ءِ پاگواجہی واجہ حامدعلی بلوچ ءَ بلوچی اکیڈمی ءِ آسراتی مول ءُُ مرادانی بابت ءَ وتی حیال درشان کت اَنت ءُُ آئیءَ گشتگ اَت کہ پولکاری پہ وت نہ بیت بلکیں پہ قوم ءَ کنگ بیت پمشکا پولکار انچیں بنگپ پہ گچین بہ کن اَنت کہ آئیءِ نپ ءُُ سیت درائیں راج ءَ یک ھساب بہ رسیت ۔

آئیءَ گشتگ کہ پولکاری بائد یونیورسل بہ بیت کس یک زبانے ءَ باونڈ مہ بیت۔ پولکاری بائد بنکی سورس ءِ نیمگ ءَ در بہ کپ ایت ءُُ آئیءِ راہ ءِ دائیں اڑ ءُُ جنجالانی یک کسانیں گیشواری اکیڈمی ءَ وتی کوپگاں زرتگ اَنت کہ آئیءَ مالی کمک کنگ بیت ۔ پمشکا پولکاری بنگپ impactable بہ بنت ءُُ وتی کار ءَ گوں مخلص بہ بنت ۔
مراگش ءِ دومی بہر اکیڈمی ءِ ہمے پولکاری کمک ءِ بابت ءَ جست ءُُ پرس ءُُ وتی ھیال درشانی اَت ۔

ہمے بہرگ ءَ بلوچی ڈیپارٹمنٹ ءِ نودربرانی جست ءُُ اکیڈمی ءِ کارگشادانی پسو اِتاں ۔دیوان ءَ وحید عامر ءِ جست کہ ’’ اکیڈمی اسکالراں چون ءُُ چے ڈول ءَ کمک کنت؟‘‘ ایشیءِ پسو ءَ واجہ ممتاز یوسف ءَ گشتگ اَت کہ اکیڈمی ہمک اسکالر ءِ پولکاری درائیں ہرچ ءُُ درچاں وتی کوپگاں زورایت ءُُ آئی ءِ پولکاری کتاب ءَ ہم چاپ کنت ۔

دگہ یک جستے ءِ پدان واجہ رفیق ءَ گشتگ اَت کہ اکیڈمی وتی مالی کمک ءَ قسط وائز دنت ءُُ ہما مردمانی کہ پولکار بنگپ گچین کنگ بنت آہانی چارگ ءُُ تپاس ءَ رند نوں آئیءَ را اولی قسط پہ کار کنگ ءَ دئیگ بیت۔

عزیز بلوچ ءُُ قدیر احمد ءِ جستانی پداں کہ اکیڈمی پولکاری بنگپاں وت دنت یاکہ ہما اسکالر اِش زورایت یاکہ اکیڈمی پولکاری نگد چے ڈول ءَ کنگ بیت ؟ ایشیءِ پسو ءَ واجہ ہبتان دشتی ءَ گشتگ اَت کہ اکیڈمی درائیں بنگپاں یکبرے وتی پولکاری کمیٹی ءِ دیم ءَ پیش کنت ءُُ ہما پولکار بنگپ کہ پر ارزشت اِنت یاکہ اکیڈمی ءِ کار رہبند ءَ سرجمی ءَ اوشت ایت ہمائی ءَ اسکالرشپ دئیگ بیت ۔

مجاہد بلوچ ءُُ بانک فوزیہ ءَ گشتگ اَت کہ اکیڈمی بائد ہما درائیں مواد کہ اسکالرانی دز رس ءَ دور اَنت ہما اوں دیم ءَ آرگ بہ بیت ءُُ دری ملکی مواد گیشتر انگریزی ءَ اَنت کہ وانگ اِش گران اِنت آ درست بلوچی ءَ رجانک بہ بنت ۔اے بابت ءَ واجہ ممتاز بلوچ ءَ گشتگ اَت کہ اے ھیال الم کار بندگ بیت ءُُ آوکیں وہد ءَ ایشیءِ سرا اوں کار کنگ بیت ۔
دیوان ءِ گڈی ءَ واجہ شکور زاہد ءَ گشتگ اَت کہ بلوچی اکیڈمی ءَ وتی کتابجاہ یک ریفرنس دروشمے داتگ ءُُ درائیں اسکالر بائد اِنت چہ ایشیءَ نپ ءُُ سیت بزور اَنت ءُُ اکیڈمی ءِ دروازگ پہ درائیں وانوک ءُُ اسکالراں دائم پچ اَنت۔ واجہ حامد علی ءَ دیوان ءِ گڈ سرا بلوچی اکیڈمی ءِ چیزے منگانی بابت ءَ سرپد ی دات کہ ہما اسکالر کہ اسکالرشپ دئیگ بنت آ یک یک پولکاری پیپرے پہ بلوچستانیات ءَ نبشتہ بہ کن اَنت ،ہما اسکالر کہ اکیڈمی آہاں کمک ءُُ مدت دنت آ وتی جند ءِ رضا ءَ دو دو ہپتگ اکیڈمی ءِ کارانی تہا کمک ءُُ مدت ءَ ساڑی بہ بیت ءُُ ایشیءِ مز چہ اسکالرشپ ءَ جتا آئیءَ را دئیگ بیت ۔دیوان ءِ گڈ بہر گوں چا ہ ءُُ چہر ءَ رند آسر کنگ بوت۔