بلوچستان ءَ پیرا میڈکس اسٹاف ءِ زہرشانی ءَ اے وہدءَ ۲۷ روچ بیت بلئے کسی گوش ءَ مورے نہ وارت کہ اے مردم چیا زہرشانی کنگان انت ؟ ءُُ نیکہ حکومت ءَ اے درچ ءَ چشیں گامگیجے زرتگ کہ اشانی گپ گوشدارگ ءُُ اے مردماں دپی تسلہ یے دئیگ بہ بیت۔

اے بابت ءَ مردم مدام اے گپ ءَ جن اَنت کہ اے ملک ءِ مردم بے جست ءُُ پرس ءَ وتی دل ءِ تب ءُُ مئیل ءَ زہرشانی کن انت ،وہدکہ ایندگہ ملکاں مردم زہر شانی ءَ ساری مہلوکءِ اڑ ءُُ جنجالاں چار انت بلئے اے گپ ءَ کس گیرام نہ کنت کہ ایندگہ ملکاں چک گریوگ ءَ ساری شیر میچینگ بیت ۔

پمشکا مردماں گیشیں جاک ءُُ کوکار ءِ حاجت نہ بیت بلئے مئے ملک ءِ مردم دہ دہ روچ شہ زہرشانی ءَ پد ہم دپی جستے کنگ نہ بنت گڑا بیچارگیں پیرا میڈ کسانی بازار چے اِنت؟ پمشکا مردم اے گلہ ہم کن انت کہ دنیا ءِ ایندگہ بند ءُُ جاہاں ایوک ءَ ایمنی ءَ گوں زہر شانی بیت ءُُ ہچ وڑیں پرشت ءُُ پروش نہ بیت ءُُ ننکہ کسے سرکار ءُُ مہلوک ءِ مال ءُُ ملکتاں تاوان بارکنت ۔

اے بابت ءَ ہم گشگ بوت کنت کہ اگاں حاکم وت اے وڑیں ربیدگے دیم ءَ بیارانت کہ ہما مردم کہ ایمنی ءَ زہر شانی کن انت آہانی گپ گوشدارگ ءُُ جیڑہ ایولّہی ءَ گشوار بہ بنت گڑا پرشت ءُُ پروش کنوکیں زہر شانی کنوکانی وت دلبڈی نہ بیت ءُُ دیمتر ءَ مہلوک وت وتی لوٹ ءُُ گزراں گوں ایمنی ءَ سرکار ءِ دیم ءَ ایر کنت بلئے اگاں مہلوک سدّک بہ بیت کہ بید ء پرشت ءُُ پروش ءَ کسی گپ گوشدارگ نہ بیت،گڑا اے وڑا بزاں سرکار وت مہلوک ءَ پہ ’’بے ایمنی ایں زہر شانی ءَ سکین دئیگان انت ۔

چوکہ پیسریگیں حکومت ءِ وہد ءَ گوں ’’ معذوران‘‘ کنگ بوتگ ءُُ ہمے وہد ءَ وہدے کابلی گاڑیانی واہنداں کوئٹہ ءِ دگاں پرشت ءُُ پروش کت گڈا آہانی درکانودی لوٹ ءُُ طلب ہم حکومت ءَ من اِت انت بلئے مسکینیں ’’ معذورانی‘‘ حق ءُُ اسلیں لوٹ ءُُ گزر منگ نہ بوت انت پرچکہ معذوراں چو کابلی گاڑیانی کاروبار کنوکاں شہر ءَ دگانی سرا پرشت ءُُ پروش نہ کت۔اے وہد ءَ ہمے حال بلوچستان ءُُ پیرامیڈکس ئیگ انت ۔

اے بیچارگ ءُُ مسکین داں روچ مرچی گوں ایمنی ءَ زہرشانی کنگان انت بلئے سرکار ءُُ واک دارانی گوش ءَ مورے نہ وارت ۔وہدیکہ اے وہد ءَ کوئٹہ شہر ءَ ابید درائیں بلوچستان ءَ سرکاری ہسپتال بند ءُُ پرائیوٹ عیش ءَ انت ۔پرچکہ درائیں سرکاری ہسپتالاں ہمروچی کاراں ہمے پیرامیڈکس اسٹاف کنت۔ او پی ڈی ءِ کار بہ بنت یاکہ آپریشن تھیٹر ،دار ودرمان بہ بیت یا پٹی ءُُ مرہم، درائیں کاراں ہمے پیرا میڈکس اسٹاف کنت ۔

میڈیکل آفیسر ایوکءَ نادراہاں چار انت ،ایندگہ کاراں ہمے جہلی اسٹاف کنت نوں اگاں درائیں بلوچستان ءَ پیرامیڈکس اسٹاف کار ءَ نہ انت گڈا بلوچستان ءِ مہلوک ءِ حال چے بیت ؟ یکے وَ بلوچستان ءَ سرکاری ہستپال نیست اگاں دور ،دور ءَ یکے است آ ہم زہرشانی ءِ سوب ءَ بند انت گڑا مہلوک پریات ءَ کجا بروت ءُُ پیرامیڈکس چونیں مستریں گامگیجے بزور اَنت؟