پٹ ءُُ پول یک گار ءُُ بیگوائیں چیزے ءِ درگیجگ ءُُ آئی ءِ یک راستیں رنگے ءَ مردمانی دیم ءَ آرگ ءِ نام اِنت۔پولکاری ہما وہد ءَ بندات بیت کہ یک جیڑگے ودی بیت ،آ جیڑہ ءِ گیشواری ءَ چیزے توجیل درگیجگ بنت ءُُ ہمے جیڑگ سائنس رہبندانی کمک ءَ گیشوارکنگ پولکاری گشگ بیت ۔
پولکاری تاں وہدے سرجم نہ بیت دانکہ آئیءِ راستی ءُُ گواچنی پدر مہ بیت۔کجام یک جیڑگے بہ بیت آئی ءِ گیشواری ءِ بازیں دروشم بوت کن اَنت بلئے شرتریں گیشواری ہما اِنت کہ پولکاری ءَ سر دیم ءَ بئیت اِنت ۔
اے راستی ءِ شوہازی ءَ باز سکی ءُُ سوری سگگ لوٹ ایت۔پولکاری ءِ کار انچوش پہ سرسری ءُُ اشتاپی نہ بیت بلکیں ایشی ءِ ھاترا پولکار ءَ را کمیٹڈ بوہگ اژدری اِنت ،آئیءَ را چہ پولکاری رہبنداں شری ءَ سوگہ بوہگی اِنت دومی پولکاری درائیں کاراں وتی جند ءِ ہب ءُُ واہگ بوہگ المی اِنت.
کجام ہم کارے ءَ دانکہ وتی جند ءِ ہُب ءُُ واہگ ہوار مہ بنت آئیءِ آسر جوان بوت نہ کنت۔پولکار بائد دائم انچیں کارانی چک ءُُ پداں بہ بیت کہ چراہی ءَ لبزانک ءُُ دپتر ءَ گیشی بئیت اِنت۔
انوگیں وہد ءَ زبان،لبزانک ،راجدپتر،یا ربیدگی کجام ہم تہرے بہ بیت آہانی شوہازی ءُُ پولگ سائنسی دروشم ءَ کنگ بوہگ ءَ اِنت۔وتی زبان ءُُ دودمان ءِ شوہازی ءَ زبانزانت ءُُ زمین زانت(انتراپولوجسٹ) کار کنگ اَنت۔
بلوچستان ءِ ڈولیں یک پد منتگیں راجے کہ آئیءِ گورا چشیں وس ءُُ واکے نیست ءُُ سرکاری سروکی ءَ چہ زبہریں راجے آاوں وتی کمی گشادی ءَ ہمے کاراں داں حدے ءَ کنگ ءِ جہد کنگ ءَ اِنت ۔بلوچستان ءُُ بلوچ راج ءِ بابت ءَ وہد پہ وہد نوکیں لیکہ دیم ءَ پیداک انت بلئے ایشانی گواچن ءِ زانگ ءَ پولکاری ءِ رہبندزانگ المی اِنت۔
یک راجے ءِ پولکاری ءَ شرتریں پولکاری ہما زانگ بیت کہ آئی ءِ بنکی ہند ءُُ دمگاں ابید دمبانی پولگ سائنسی ءُُ پولکاری رہبنداں گوں بہ بیت۔دمبانی پولگ ءَ ہما کمب ءُُ بُت کہ شوہازگ بنت آہانی چار ءُُ تپاس کنگ بہ بیت،ایشانی گوں دنیا ءِ اے دگہ شوہاز اِتگیں چیزاں گوں کنگ بہ بیت ،بلکیں یک جوانیں آسرے دیم ءَ بئیت ءُُ راجانی سیادی ءِ راستیں رنگ پدر بہ بیت ۔
بلوچی راج ءِ راجدپتر ءِ باروا ءَ تنی وہدی سائنسی رہبند ءَ کس ءَ پولکاری نہ کرتگ ۔دری دمب زانت ءُُ پولکاراں ایوک ءَ بلوچستان ءَ درکپتگیں نگرہ ءُُ گران بہائیں سامان گوں وت برتگ اَنت کہ آہانی نہاد دری مارکیٹاں جوان اِنت۔دومی بلوچ راجدپتر ءُُ زبان ہچبر گوں دری یک دپترے یاکہ زبانے ءَ گوں دیم پہ دیم کنگ نہ بوتگ اَنت اے تک ءَ ایوک ءَ یک چیزے الم بوتگ آ ایش کہ بلوچ دودمان ءِ کوہنی زاہر بوتگ کہ بلوچانی راجدتپر چنچو کوہن ءُُ گیدی اِنت۔
بلوچ قوم ءِ یک پدمنتگیں پولکارے اگاں اے درگت ءَ کار کنت آاوں ایوک ءَ ہما چاپ ءُُ شنگ بوتگیں نبشتہی نکاناںیکجاہ کنت بائد آ وت ہما جاگہ ءَ بروت ءُُ وتی چماں گوں ہما چیز ءَ ہما جاگہ ءَ چار ءُُ تپاس بہ کنت ۔
بلوچ کہ اے جاگہاں انوں آباد اَنت اے ہزاراں سال پیسری گپ انت ،بلوچانی لڈ ءُُ باز دائم است بوتگ است اِنت آہاں بازیں جاہاں لڈ ءُُ بار کتگ ءُُ پدا واتر اِش کتگ راجدپتر ی ھساب ءَ بلوچ بہہ یک جاہے ءَ نہ بوتگ برے بچار آ ایرن ءِ روٹکی ءُُ زرباری دمگاں نشتگ ،یک وہدے بلشگان اَنت ،برے عراق ،برے شام ءُُ برے اوگانستان ءِ ابیلاں نشتگ ۔
ہما جاہ ءَ کہ بلوچ نشتگ آ جاہ ءِ دمب ءُُ آ جاہ ءِ بنکی مردمانی گوں بلوچاں ہمدپ کنگ بہ بنت ءُُ ایشانی پولکاری ءَ سائنسی رہبندکاربندگ بہ بنت گڑا یک جوانیں آسرے درکپت کنت ایوک ءَ کتابی گپ پہ چشیں پولکاری یے ءَ بس نہ اِنت۔
پدمنتگ ءُُ لگت مالیں قومے بلکیں چشیں کارے کت مہ کنت بلکیں یک حدے ءَ وَ اے کار بوت کنت بائد ہمیش اِنت کہ دمباں چہ شوہازاِتگیں چیزے کوہن کدگاں( میوزیم) ایر کنگ بہ بنت ءُُ ایشانی چار ءُُ تپاسی ءَ دمب زانت ءُُ زمین بہ کن اَنت۔بلئے تنی وہد ءَ چشیں بلوچے ءَ جہہ نہ جتگ کہ آ اے گرانیں ڈبہ ءَ وتی کوپگاں زرت بہ کنت ۔دومی اے کار بید سرکاری کمک ءَ کنگ سک انت بلئے حیف پہ مئے سرکار ءُُ سرکاری مردماں۔۔۔۔۔۔
!پولکار ی کنگ دور اِنت اے پولکاراں دلبڈی دیگ ءَ جاڑی نہ اَنت ۔لبزانکی تک ءُُ پہناتانی اگاں گپ بہ بیت داں انوں جوانیں رنگے ءَ کار بوہگ ءَ اِنت۔اے درگت ءَ ایم فل ءُُ پی ایچ ڈی بوہگءَ اِنت۔
ہمے اسکالر رند ءَ لبزانکی جتا جتائیں تک ءُُ پہناتاں پولکاری داب ءَ کار کن اَنت ءُُ لبزانکی مڈی ءَ گیش کن اَنت۔اگاں وتی ہُب ءُُ شوق ءُُ ایمانداری گون بہ بیت ۔ بائد اے راج نوں دری ءُُ تہی لبزانک ءُُ لبززانتانی بارو ءَ نبشتہ بہ کنت ،تاک ءُُ ماہتاک چاپ بہ بیت ،اکیڈمیءُُ لائبریانی تہا گیشی کنگ بہ بیت،ایشانی تہا دنیا ءِ درائیں پُرارزشتیں کتاب ایر کنگ بہ بنت،نوک نوکیں تجربت کنگ بہ بنت نوکیں تجربت نوکیں شاچستکار ودی کنت ۔
بلوچی لبزانک ءِ بنداتی دروشم ماراچہ شاعری رسیت بلئے نوکیں دور ءَ شاعری ءَ ابید آزمانک ،گدار ،کسمانک ءُُ اے دگہ لبزانکی پڑاں پولکاری کنگ بہ بیت ۔ہردے شاچستکار گیش بنت لبزانک ءِ مڈی گیش بیت ءُُ لبزانک ءِ مڈی گیش بیت گڑاں لبزانک ءَ پہ پولکاری ءَ نوک نوکیں بنگپ ودی بیت ۔
اے ڈول ءَ زبان ءُُ لبزانک ہردو زْرنگ ءُُ توانا بنت۔زبانزانتی چشکہ وت یک جتائیں پڑے ایشی سرا جتا کار کنگ بہ بیت آئیءِ لیکہانی سرا نوک نوکیں لیکہ ءُُ ھیال دیم ءَ بیااَنت اے درائیں کار ایوکءَ پولکاری ءِ منت ءَ اتک کن اَنت۔
اے رد ءَ پولکاری تاک چاپ بہ بنت،اے پیمیں تاک ءُُ تاکبندانی اگاں یکشل ءَ چاپ کنگ بہ بیت داں نبشتہ کارانی کچ گیشتر بیت ءُُ ہمک پڑ ءَ جوانیں رنگ ءَ کار کنگ ءُُ کس اِش کتگیں گپاں بیسہ نہ کنت بلکیں گوں وتی چماں راستی ءَ چارگ ءِ جہد کنت انچو کہ ’’یکے ءَ گشت سہر اِنت،دومی ءَ گشت نا سبز اِنت،وہدیکہ من وت دیست گڑاں زرد اَت‘‘ہمے رنگ ءَ پولکاری ءِ کار اوں ہمیش اِنت کہ اِشکتگیں گپاں بہہ بیسہ مہ کن دانکہ وت ہمائی ءَ نہ گند اِت ۔