کوئٹہ(اسٹاف رپورٹر)بلوچستان کے ضلع نوشکی کے قریب ایف سی کے قافلے پر نامعلوم افراد کی جانب سے کئے گئے حملے میں دو اہلکار زخمی ہوگئے۔ ایف سی ذرائع کے مطابق واقعہ نوشکی کے خاران سے ملحقہ نواحی علاقے زرین جنگل میں نوشکی، خاران کوئٹہ روڈ پر پیش آیا جہاں ایف سی کی چھ گاڑیوں پر مشتمل قافلہ گزر رہا تھا ۔ اس دوران نامعلوم افراد نے قریبی پہاڑوں سے فائرنگ کی جس کے نتیجے میں دو اہلکار زخمی ہوگئے۔ جوابی کارروائی پر حملہ آور فرار ہوگئے۔ دونوں زخمیوں کو ایف سی کیمپ اور بعد ازاں ہیلی کاپٹر کے ذریعے سی ایم ایچ کوئٹہ منتقل کردیا گیا۔ زخمی ہونے والے لانس نائیک محمد آصف کو دو گولیاں چہرے پر جبکہ سپاہی شیر علی کو بازو میں گولی لگی ہے۔
