راولپنڈی: کری روڈ پر واقع امام بارگا قصر سکینہ کے باہر دھماکے سے 2 افراد جاں بحق اور متعدد زخمی ہوگئے۔ راولپنڈی میں ہائی وے کے قریب کری روڈ پر واقع امام بارگاہ قصر سکینہ کے باہر زور دار دھماکا ہوگیا جس کی آواز دور دور تک سنی گئی اور اس سے قریبی عمارتوں کے شیشے بھی ٹوٹ گئے جب کہ دھماکے کے نتیجے میں 2 افراد جاں بحق اور متعدد زخمی ہوگئے ہیں، دھماکے کی اطلاع ملتے ہی ریسکیو ٹیموں نے موقع پر پہنچ کر زخمیوں کو قریبی اسپتال منتقل کرنا شروع کردیا ہے جہاں بعض کی حالت تشویشناک بتائی جاتی ہے۔ کری روڈ پر دھماکے کے بعد پولیس اور دیگر قانون نافذ کرنے والے اداروں نے علاقے کو گھیرے میں لے لیا ہے جب کہ پمزاور پولی کلینک اسپتال میں ایمرجنسی نافذ کردی گئی ہے۔ ذرائع کا کہنا ہےکہ دھماکے کی نوعیت کے بارے میں فوری طور پر پتا نہیں چل سکا ہے تاہم قانون نافذ کرنے والے اداروں نے جائے وقوعہ سے شواہد اکٹھا کرنا شروع کردیئے جب کہ بم ڈسپوزل اسکواڈ کو بھی طلب کرلیا گیا ہے۔