کراچی: لیاری کے علاقے نیپئر میں پولیس اور رینجرز سے مقابلے میں گینگ وار کے اہم ملزم صادق گڈانی سمیت 7 ملزمان مارے گئے جب کہ ملزمان کی فائرنگ سے ایک پولیس اہلکار اور ایک رینجرز اہلکار زخمی ہوئے ہیں۔ لیاری کے علاقے نیپئر میں پولیس اور رینجرز نے دہشت گردوں کی موجودگی پر سرچ آپریشن کیا تو اس دوران ملزمان نے فائرنگ کردی جس کے بعد پولیس اور رینجرز کی جوابی فائرنگ سے گینگ وار کے اہم ملزم صادق گڈانی سمیت 7 ملزمان ہلاک ہوگئے جب کہ مقابلے میں ایک پولیس اہلکار عبدالرحمان اور رینجرز اہلکار شاکر اللہ سمیت راہگیر خاتون بھی زخمی ہوئیں۔ پولیس کے مطابق صادق گڈانی 50 سے زائد قتل کی وارداتوں میں ملوث تھا اور اس کا تعلق گینگ وار کے بابا لاڈلہ گروپ سے تھا جب کہ ملزم کی سر کی قیمیت 25 لاکھ روپے مقرر کرنے کی سفارش بھی کی گئی تھی۔ پولیس کے مطابق ملزمان سے مقابلے میں زخمی ہونے والے سب انسپکٹر اعظم خان کی حالت تشویش ناک ہے جنہیں فوری طبی امداد کے لیے اسپتال منتقل کردیا گیا۔